قصيدة رثاء
في عمي
البدراني الدوسري
عبدالعزيز بن جردان الجردان
رحمه الله
المتوفى
يوم الجمعة
23/6/1434
عيني تهل الدمع والقلب محزون
على حبيب ٍ مات لا و سفابه
في جمعِة ٍ وأهل الجوامع يصلون
كل ٍ يبي عفوه ويخشى عذابه
والسبت في قبره رهين ٍ ومدفون
جعل الملايك تحتفي ( ياهلابه)
فجيعةٍ موته وياليت مديون
والله لفك الدَين وابري مصابه
مير البلا موتٍ وبالموت مرهون
تحت الثرى مدفون بليّا ثيابه
جعله شهيد ٍ بالمرض مات مبطون
ويومَ الفزع يامن وياخذ كتابه
بايمن يدينه يشرب الما على هون
من حوض خير الخلق لذة شرابه
رجل ٍ نصوح ٍ واصل ٍ يبذل العون
عنده حمية للخوي والقرابه
في سلم التعليم يا اللي تعدون
درّس بنجران ٍ ودربه بدا به
ثُم ٍ غدى للخرج حولين يَكفون
ثُم ٍ رياض العز دار المهابه
و اربع سنين بدار زايد يتمون
بالشارقة درّس وعلمه زهابه
ثُم ٍ تقاعد وللمزارع يسومون
أرخص عزيز المال ثُم ٍ شرا به
زرع ٍ بديرابَ المسمى به فنون
زرع ٍ لبن جردان زرع الطرابه
فيه النخل فيه الشجر فيه ليمون
يذوق خيراته رفيق وقرابه
وايضا ضعيف الناس واللي يطرّون
يطولهم خيره عظيم ٍ ثوابه
الله أكبر عد من جو يعزون
اثنو عليه بخير وطيب ٍ مشى به
وصلاة ربي عِد منهم يلبون
على النبي وال آل ويَّا الصحابه
أحمد بن محمد الجردان
(جلاجل )