ساقت مشاوير الشقا واردف الليل=وسريت ودروب السهر سرمديه
ازريت اسوق الهم واحط وأشيل=وتعــبـت أكابر والمواجع نــديه
والحيل مل من التعب مابقا حيل=والجفن ماله بالسهـــــر مقدريه
الهبذله والليل صارت غرابيل=ابطال وسنين العمر مسرحيه
والهم والحرمان والحزن والويل=ضيوف وجروح الوفاء شاذليه
والصمت والهوجاس بوح التعاليل=والخوف مسرى والليالي مطيه
يالله عسا درب السنع بالمقابيل=وألا الليالي اللي مضت جرهديه
حرن كفخ واستاسرته المحابيل=وعقب السماء الرحبه هوى للوطيه
حرن غدر فيه الزمن والمداخيل=مقرود وكفوف العطايا رديه
غلطت عمر منها جنيت البهاذيل=وذنوب غيري حطها الله عليـه
غلطه ودحدرها الزمن بالمحاصيل=ورضيت بالمسوم غصبن وجبريه
تناقــــلتها شـلة القــال والقـــيـل=وحطوا عليها لين صارت قضيه
وقامت تناهشني رخوم الرياجيل=اهــل الملامه والعـلوم الرديــه
اللي تجيك أخبارهم بالتفاصيل=ويحرفون الهرج عن سو..نــيـه
بالله قلي يا أسود الوجه ياليل=وضح النوايا كيف صارت خطيه
قل لي من اللي ضلل الحق تظليل =ومن علم الوافي يخون بخويه
ومن بروز الأوهام خدعه وتمثيل=ومن طلسم الواقع وخان الوصيه
ومن قال لي دربك سهود وتساهيل=ومن علم الضحكات تمشي عليه
ومن كفن دموع الوفاء بالمناديل=ومن هو جزاء الحسنه بمليون سيه