أخي الغالي : المراسل 502 يحفظه الله
تحيه عطره لمقامكم الغالي
أختتم تعليقى في البيان الخاص بقبيلة المصارير العزيزة والغاليه علينا جميعا بيان يجمع ولا يفرق وهذا هو خطاب وبيان جميع الدواسر كافه من مشايخ وأمراء وجميع الدواسر عامه نعم نحن اليوم في أمس الحاجه لدعم تلك البيانات فا يد الله مع الجماعة فبارك الله في جميع الدواسر كافه وجمع بينهم بالخير وقوى من أواصر
الاخوة وأننا اخوان وأبناء عمومه وهذا أرث يجب المحافظة عليه من جيل الي جيل
وأختتم بقصيدة الشاعر والتى تتوافق مع بيان قبيلة المصارير العزيزة والغاليه .
من شعراء ديوان الدواسر / الملحمة الدوسرية
الشاعر : محمد بن مبارك العمور
بديـت باسـم اللـي يعـز العزيزيـن
الواحـد المعبـود مقصودنـا رضـاه
اللـي خلقنـا فـي شعـوب وقبـايـل
وخص الثناء باللي نصى بـاب تقـواه
قبايـلٍ فيـهـا الـكـرم والشجـاعـة
وكـلٍ علـى مايـرّث الجـد ممشـاه
سبعيـن نعـم للقبايـل بـلا نـقـص
كلٍ خذى قسمـه مـن الطيـب يزهـاه
فحنـا هـل العـادات كسّابـة المـدح
دواسـرٍ نمـلـك قـصـور مبـنّـاه
حامينـهـا بأرواحـنـا والرهـايـف
مـن دونهـا درب المهالـك وطينـاه
عيد الضيوف الي تـدوّر هـل الجـود
وسقم المعادي مـا اهتنـى زاده ومـاه
وسلومنـا مثـل الحلـيـب المصـفـا
وأفعالنـا رجـمٍ علـى عالـي عـلاه
خطـلان الأيـدي مانهـاب المعـادي
نكسـر ولا نكسـر وللـحـدّ نــذراه
ناسم عصاة الجار ثـم نهمـل الجـار
ويسير مايخشى سـوى الـرب مـولاه
والفايتـة مـا نقـري الضيـف منهـا
ولا نبيـع الجـزل منهـا ولا أدنــاه
الضيف يلقا الجود فـي ديـرة الجـود
نرخص له الغالي ونسـوي لـه قـراه
وحدودنـا مـن دونهـا كـل صامـل
بمشـوك يـرهـب قـلـوب معـنّـاه
من الخرج حتى الهضب نحمي حماهـا
ولا حمينـاهـا بـسـور ومـــذراه
حنـا سـلايـل لاد تغـلـب وزايــد
مثل الجسد ما تنفصـل عنّـه أعضـاه
اليا اشتكى عضـوٍ تداعـا لـه الكـل
مطبقـيـن شــرع رب عـبـدنـاه
مثل الجبـل مايشكـي الضيـم راسـه
شامـخ ولاهـزتـه ريــحٍ معـتـاه
مثل السباعـة لاعـوا الذيـب للذيـب
ثم احتمى له وأرخص الـروح وافـداه
جانا الدخيل الـي يبـي مـن يجيـره
يبغى ذرى لـه يحتمـي بـه ويحمـاه
يـوم ان حملـه زاد مـحـدٍ يشـلـه
وكـم عـزوةٍ عيـت لمثلـه تلـفّـاه
وخلفـه جيـوش ماتهـاب المخاطـر
شجعان ما تخشى من المـوت ويـلاه
لاشـك صلناهـم ويانـعـم صـولـة
وعقيدهـم بيـن المرابـط ربطـنـاه
حتـى كسرناهـم ويانـعـم كـسـرة
درس لهـم ولغيرهـم تاصـل أنـبـاه
فمنا هل العشـر المصاريـر الأحـرار
أهل الخوي يوم أحمـر المـوت يقفـاه
يومـه بقـاع البيـر رجلـه حسيـرة
قـدّ الحبيبـي بكرتـه وأطلـق رشـاه
وفـدى خويّـه بالـرحـول الثميـنـة
وعوّد وهو وجهـه تمـلا بـه ضيـاه
هل طعنةٍ صـارت مضـارب للأمثـال
طعنـة حـزام اللـي جـزال سوايـاه
شك الفـرس والفـارس الـي عليهـا
نعـم اليميـن ونعـم منهـو مـتـلاه
والفارس طليفيـح يـا طيـب علمـه
يا اهل السوالف وين ابلقى لـه اشبـاه
فنجـال عدوانـه نـهـار الصعـايـب
شربه عسى فـي جنـة الخلـد مـاواه
ياطـول قولـي فـي رجـال الحبيبـي
العـزوة اللـي تبلـغ القاصـد منـاه
ومنـا بداريـن لهـم كــل تـاريـخ
وعامـر بـن زيـاد شـيّـد بنـايـاه
خاض المعارك خوض مـن لا يهابـي
مخضّـبٍ سيفـه مـن الضـد ودمـاه
وارث مطاليـق لهـم رايـة المـجـد
منهم سـدارى تـورد الخصـم مثـواه
ومنـا غييثـات تضـد الخصـومـي
خيالهـم هـيّـب عـداتـه بشلـفـاه
أهل الثمان الي تنومـس هـل المـدح
سيوفهـم ضـرب الجماجـم مضـرّاه
في هيّة خريصٍ حموهـا مـن الضـد
حتى رجع مكسـور يسحـب خزايـاه
من دون عدّ خريص خاضـوا معـارك
نـدرٍ حـرارٍ والقهـر كيـف ترضـاه
ومنّـا رجـالٍ فعلهـم مــا تغـبـى
والقـاف فيهـم يرتفـع عالـي عـلاه
حقبـان لاثــارت نـهـار المـلاقـا
يـردون عـد ٍ ضدهـم مـا تهقـواه
ثمانـيـة فـكـوا ثمانـيـن هجـمـة
والضـدّ تسعيـن ولا يلحـق اتــلاه
يستاهـل البيضـا خريـص العياضـي
يقبل على العـدوان والـروح مهـداه
ووسط الحسا يشهد لهم كـل شغمـوم
بايمانهـم مـا فزّعـوا اقـرب ادنـاه
ومن زارهم يبغى الطمع راح مطمـوع
وحمـود بـن شيبـان للمجـد يرقـاه
ويكفي لمن يبغـى المدايـح عظيمـات
يطـري العرعيـر والـعـز مـطـراه
ومنـا وداعيـن الثمـان السـوالـف
والي يعـد الطيـب فيهـم فـلا امـداه
الاولـة تنصـا المبيعـيـج نـاصـر
ذبح غريـره لاجـل جـاره ومرضـاه
والثانـيـة خـويـهـم مايـضـامـي
والي يضيمـه باتـر السيـف ينهـاه
والثالثة غـرو وفـي حسيهـم طـاح
وساقـوا الديـة جـودٍ لربعـه مثنـاه
والرابعة مالبير فـي جبهـة الضيـف
عطـوه صفـراء مالمشاكيـل مهـداه
والخامسة ساقوا ديـة مـا انقصوهـا
للجـار يـوم جدارهـم طــاح وارداه
والسادسة في العسر منصـا الرجالـي
الـي تــدوّر للـكـرم دوم تبـغـاه
والسابعـة يامـن بهـم مـن نصاهـم
المجـرم الـي ضاقتـه عسـر دنيـاه
والثامـنـة جـنـودهـا تحتمـيـهـا
شجاعة مـع طيـب مـع عـزٍ وجـاه
ومنـا مخاريـم لهـا القاسـي يليـن
فالهضـب والــوادي دروعٍ منـقّـاه
لاد المنيعـي يطـربـون المسـامـع
نـدرٍ حـرارٍ تلطـم الضـد لاقـصـاه
راحـت ثمانميـة وخمسيـن لحـيـة
مـن ضربهـم فالهيّـة الـي مسمـاه
ومنـا جميـلات لهـم عـز وشــان
وفيهـم شيـوخ فعلهـم مـا جهلنـاه
نتيـفـي ٍ وكبـيـري والـغـريـري
حكـام وملـوك ٍ وشـعـار وحـمـاه
ومن كان يطري العز يطري الجميلـي
خيالهـا فيصـل ومـن كـان يشـداه
في هية الحوطة خـذوا ثارهـم وقـف
من خصمهم وابنه ومـن كـان خـاواه
ومنا خييـلات بهـم ضـرب الأمثـال
فالجـود والعـزة وللـجـار تحـمـاه
وان جات للهيـة ووجـه نطـح وجـه
مـا عندهـم هـون ولا بـه مهـاداه
مابه سوى سيف تساوى بـه اكتـاف
ولا رمـاح خـرزت مــن تنـصـاه
خيـالـة الشـرفـا الاد الخيـيـلـي
لا من رسى مدحي على بـاب مرسـاه
فـي هيـة باسـم الشيـوخ اشعلوهـا
كـل ابلـج فـزع لهـا مـن حمايـاه
سبعة شيوخ مـن سيـوف الخييـلات
مافيهـم الـي يسمـع لصـوت منـداه
ومنـا معيلـة الطـراد وهـل الفعـل
يـا سعـد منهـم فاللقـا مـن دنايـاه
فرجـان لا صـاح النذيـر وتـقـرب
للمـوت ساقوهـا ولا بــه متـنـاه
ومنا هل السـت الحـرار المداغيـش
الاد حسـن طيبهـم كـيـف ننـسـاه
ستـة ولكنهـم عـن حسـاب ستيـن
خويهـم ماخـلـوا الـقـوم تــالاه
ساقوا عليهـم فـوق سـت الركايـب
وفكـوه منهـم يـوم صـوت بمنخـاه
ومنـا مقـيـدة الجـمـل فالمـعـارك
الاد رجــب والمـنـايـا مـــدلاه
في هية المشقوق حازوا علـى المجـد
يوم الجهيمـي تكسـب الطيـب يمنـاه
ومنـا مشاويـة لهـا مجـد الأمجـاد
قبيلـة ترجـم بهـا الـعـز معـنـاه
فيهم شجاعـة سالـم الزيـر فالحـرب
وفيهـم إبـاء كليـب لا عانـد عـداه
ابـن السعـود الـي حكمهـا بسيفـه
بيـض لهـم يـوم المعـارك مـدنـاه
يستاهلـون النعـم صبيـان جـوزان
من عند ابو تركي ومن كـان شـرواه
ومنـا مساعـرة بهـم كـل منـعـور
خيالهـم ماخـاب دربــه ومسـعـاه
الـي غزاهـم مـن جنـوب بجيشـه
ردوه مـع خمسـيـن راس مغـطـاه
بالسيـف ردوا كـل خصـم لـدربـه
والفارس ابـن قويـد مجـده حفظنـاه
ومنـا الشرافـا متعبيـن المعامـيـل
ابن الحزيمي لا اقبـل الضيـف حيـاه
مـارده مـن الجـود فقـر ولا ديـن
شحّـم نخيلـه والجمـل مـا تـغـلاه
ومنا الحراجين النشامـا هـل الكسـب
كسابـة للكسـب مـن كـل منـحـاه
عدوهـم مـن مـا ملـك يمنعـونـه
واليا بغى يكسب بهـم تقصـر خطـاه
ومنا هـل الجـوخ الحمـر يلبسونـه
الاد عـمـار خـصـوم المـنـايـاه
خيالـة الجـدعـا نـهـار المـلاقـا
صبيهـم لـو ينطـح المـوت قهـواه
ومنـا الجعيـدي يكسـب الطايـلاتـي
يكفـخ كمـا حـر تـعـلا بـالاعـلاه
الاد شـعـث محـزمـه لا تـعـزوى
كـم ذود قـوم باعـدوا بـه ومرعـاه
ومنـا البريكـي يكسـب المجـد كفـه
وان جا ضحى الهية فلا احـد بيقـواه
وان جات للضيفـان فالعسـر والليـن
منهـو الـذي مثلـه جـزال سجايـاه
قلتـه وأنـا مـن نسـل لاد العميـري
لاشمّـر اللـي مـا يحسـب لدنـيـاه
يشهد لنا الي جيشـه يهـز الاصقـاع
جيش يـروع اللـي طروقـه مخـلاه
فالشـعـب رده سـربـة وايـلـيـة
من صلب جـدي تعطـي الكـل مبغـاه
واللـي حمـل رايتـه قـدم المقاديـم
خلـي طريـح ورايـة لــه تقـفـاه
ويـا هيـة فالـفـاو دون المجاهـيـم
عشرين مع عشريـن قـرم حسبنـاه
ردوهـم الشجعـان عشـرة بـلا زود
خيالنـا مـا قـال كمهـم يـا عيبـاه
وادي العقيـق الـي حمينـا حــدوده
حنـا حمـاه ودرعـه الـي تــذراه
حنـا نزلنـا بـه علـى غيـر مـنـة
بسيوفنـا الـي تحتمـيـه وتــولاه
قـول علـى فـعـل عظـيـم نـعـده
وكـم واحـد وده بمثـلـه وطـريـاه
عقيقـنـا هــو تـمـرة التغلبـيـة
فخـر لنـا مـن دون هـذا وهــذاه
ولنـا علـى الافـلاج جولـة وبيـرق
جعيري بـن حسيـن تاريخـه ازهـاه
وفالخـرج منـا سـربـة صيرمـيـة
يـوم العريـق سيوفهـم واحـمـاراه
ووسط الحساء منـا شغاميـم وقـروم
ضلـع عظـيـم للشـدايـد ذخـرنـاه
هـذا وتاريـخ الـدواسـر قديـمـي
ما احصاه من يروي ولا الشاعر احصاه
تعجـز دووايـن العـرب مـا تلـمـه
حتـى المحابـر والكتـب مـا تبنـاه
تمـت ميـة مـن فوقهـا سبعـة زود
وصلوا على المختار ما هل مـن مـاه
وأخير وليس أخر أسال الله رب العرش الكريم أن يجعل تجمعنا نصره لدينه وأن نكون لحمه قبلية بجمعنا جمع الدواسر كافه مع حكامنا الكرام آل سعود بقيادة خادم الحرمين الشريفين الملك سلمان بن عبدالعزيزآل سعود يحفظه الله وولي عهده الامين سيدي صاحب السموالملكي الامير محمد بن نايف يحفظه الله وولى ولى العهدصاحب السمو الملكي سيدي الامير محمد بن سلمان يحفظه الله سلامن لمن سالمهم وحربن لمن حاربهم تقبل كل حب وتقدير ابو صقر