[معلومات العضو ناصر آل جزاء]

السلام عليكم رحمة الله وبركاته


هذه قصيدة قيلت في إحتفال آل نابت الغييثات في عيد الفطر المبارك لعام 1428 هـ

وذلك في بلدة الخرفه في محافظة الأفلاج ..



قالها الشاعر : سلطان بن محمد بن وقيان آل جزاء الغييثات ..

ألا مرحبا ترحيبةٍ تبدي سوات النور = تراحيبٍ سوات النور في جو السما العالي
عدد ماشالوا الشيله عدد ماجروا المجرور = عدد مابان في جو البسيطه شمس وهلالي
هلا مرحبا بالضيف والطرقي وراعِ الدّور = أقوله بالنيابه عن حزامي والله الوالي
أقوله عند ربعي عزوتي يوم الأمور عسور = جبالٍ في الجزيره في ذراها يامن الجالي
وفارسهم بوقت الحرب واحد عن مية طابور = يورّدها لو ان الجمع يزمي كنّه خيالي
مواقف شهيره يوم كلٍ له فعل مشهور = ليانٍ للرفيق وخصمهم يعطونه الصالي
وعليّه بالحرام إن الليالي ماعليها قصور = لكن اسم ربعي عزوتي في خافقي غالي
على الخرفه واهلها سلامٍ بالوفا مغمور = هل اليمنى الكريمه يوم سيف الجوع قتّالي
( وأنا غييثي من ارجال الدواسر مركزي معمور = على وجه البسيطه لو تميل الأرض ما مالي )
تدور دهور ولا عصور ولا سنين ولا شهور = قوي الباس ماينداس يبقى منزله عالي
تموت البوم فبيوت الخرابه والصقور صقور = عوايدنا الدواسر نزلنا فالعز ما زالي
وأنا شاعر ليا جيت المحافل مكسبي جمهور = ليا أرضيته يكفيني عن الدنيا والاموالي
وصلاة الله على الهادي عدد مابان ضوح النور = عدد ما بان ضوح النور في جو السما العالي

وســلامــتــكــم ..


أخوكم / ناصر آل جزاء ..