السلام عليكم وحمة الله وبركاته
هذه المساجلة جرت بين
الشاعر / مقعد بن خلف بن منسي العازمي العتيبي
و
الشاعر/محمد بن باني بن عقاب المخاريم الدوسري
يقول العتيبي/
يالله يامنشي المزون المراهيش=ياللي من القبله تسوق النواشي
أنك تجنبني عن الغدر والطيش=ياعالم ماكن في وسط جاشي
اللي بعدها راح عمري تناتيش=الاوالله الا راح عمري بلاشي
أرثع مع الدنيا مع لقمة العيش=واللي حصل لي يابو باني معاشي
أبا التجاره واتنوش تناويش=وعنها لقيت الحض فيه أنكماشي
حضي تعثر دونها ياترى ليش=منها ولا حصلت حتى العراشي
هذا يابو باني زمان البخاشيش=لقيتهم مابين مرشي وراشي
دنيا تهيا للعفون الدراويش=وتبسط لهم يالقرم غال الفراشي
اللاش لو يملك عمارات حتيش =يبقى يابو باني ضعيفٍ ولاشي
وعيت تهيا للرجال المداغيش=ذباحةٍ للضيف كبشٍ وحاشي
أرسلت لك يامتعب الخيل والجيش=ياللي لفعل الطيب فيك اندهاشي
شاعر جزاله مانت شاعر عراميش=عد الروى يبهج صدورٍ عطاشي
رد الشاعر محمد بن باني
يالله ياللي تكسي الطير بالريش=وبقدرتك طار وتغذى وعاشي
لأزرت قبرٍ مضلم البطن ووحيش=أرجوك ثبتني بوقت ألنقاشي
انت الرجاء لاقصرّن المخاميش=أخشاك والا الغير ماني بخاشي
وخلاف ذا يامرحبا عد ماحيش=مالٍ على سوق المباعة يحاشي
ويا مرحبا ما يمطرن الرشا ريش=من مدلهم(ن) تالي العصر ناشي
ترحيبه ترو الكبود المعا طيش=ويوضي سناها مثل لمع الفلاشي
بكتاب منهو في سماء المجد مانيش=مقعد خلف قرمٍ على العز ماشي
رادار طيبه مايجي فيه تشويش=معشي الضيفان شحم ألكباشي
يابو خلف بشويش بشويش بشويش=فتح سموعك وسمع العلم كاشي
أيقضت شعر(ن) نايم(ن) بالنشانيش=واستأنف التطوير عقب التلاشي
ياشاعر(ن) تغرف من البحر ويطيش=بحر العرب ماهو بجغمة مشاشي
اخذ النصيحة يابعيد المناويش=من عقب سنّادك علي مابقاشي
هذا زمانٍ دوّش الفكر تدويش=ذل القروم وعز شبه المواشي
تعيش فيه أهل القلوب المغاشيش=أهل اللكاعة وأهل بيع النجاشي
وأصبر وطنش زايد الهم تطنيش=والصبر للقلب العليل أنتعاشي