رائعة تحمل مغزى ودلالات شعرية كبيرة سمعتها مسجلة لشاعركم المبدع نايف بن مسرع وأحببتها نقلها لكم
**** الـــعــــتــــــــب ****
العتب لاجا من امحب صار أمرن حميد=ومايعاتب فالرياجيل كود خيارها
هيه ياشعرن ذخرته مهوب أية قصيد=لاتزاحمت الهواجس فطق زرارها
إفتح إلها الباب وتجيك تنهل من مزيد=تطرب الصاحب والانذال تلعن كارها
عندي إرسالة عتب للقريب اللي بعيد=الرفيق اللي هوى الطايلة واختارها
صاحبن ياماذكرني إلى حمي الحديد=في سنين ٍ بالمعاناة شبـّـت نارها
يوم كلن من عميله تبرا مانحيد=وما سمعنا اهل الحكايا وكثر اشوارها
تمحل الدار العزيزة ولانطري الشديد=ولابنينا اغلى الصداقات عزّ جدارها
في زمان الفقر ياصاح والحال الزهيد=رفقتك عندي عزيزة لها مقدارها
ويوم زان الوقت ياكثر خلان الرصيد=والسنين المقبلة مانعرف أسرارها
ياصحيبن يجمع العز والراي السديد=الوفا عادة رجالن تشيع اذكارها
ياصحيبي يشهد الله من زودك أزيد=بس كلمة حق لازم أهتك ستارها
رفقةٍ مهيب رفقه علشان الرصيد=ماحفظها إلا رجالن علا مقدارها