رديه بين الشاعر/ محمد بن علي بن سويد آل دمنان اليامي والشاعر / محمد بن سيف بن غالب الدوسري
قصيدة للشاعر/ محمد بن علي بن سويد آل دمنان اليامي
ترسي رسوم الحد من غير تعريف=
باقوال شاعر في بيـوت ٍ طريفه
شب البحر والا فحـزوه بالسيف=
من شانكم يااهل العقـول الضعيفه
يااللي تسمي خرب رمح على الكيف=
ماشـد رمـح ٍ والوحيـدوليفه
لاينسمع لك صوت والزول ماشيف=
واصبحت تايه في ديـار ٍ مخيفه
امـا فخلـه لاتشـلـه بتحـريـف=
ولا افشلـه مـن جنوبـي منيـفـه
كـلام صـدق مايرهـم بتزييف
=تجـارة ٍ لاهـل القلـوب النظيفه
يسقيك يارمح ٍ مخال ٍ من الصيف=
بـراق نـو ٍ مقبـل فـي قنيفه
ديار عطران الشوارب هل الكيف=
دواسر خطـلان الايـدي شريفه
خيالة ٍ لصخاف الشـول مشاعيـف=
لطار ستـر ام الخظـاب العفيفه
سلام ٍ احلى من فـواق المصاييـف=
لمدلهيـن الجـار ينسـى وليفه
جعل الوطن ودياركم وارضكم ريف=
يااهل المراجل والنفـوس الخفيفـه
يوم القنا والخيل والرمح والسيـف=
كل يعـدي مـن حياضـه بسيفـه
وقد رد الشاعر / محمد بن سيف بن غالب آل حميد الدوسري بهذه القصيدة
يامل قلـب ٍ مولـع ٍ بالمشاريف=
يطرب لذبٍ في الرجـوم المنيفه
لاداج في قـاع لعشبه تصانيـف=
وبنـة فياضـه بالنسايـم لطيفه
في نجد لااسقته المزون المراديف=
من بارق ٍ يعجبك لااقبـل رفيفه
رفق الخيال اللي سحابـه مهاتيـف=
ولاحن رعـاده يعيشـك رجيفه
وترتع به الطرعات من غير تعليف=
جل العشـار اللـي لذيـذعطيفه
سود البكار اللي اذانيهـا مقاييف
شولن ليـا جيتـه قليـل ٍ وصيفـه
وسج النبات ودوجة ٍ به ليا شيـف=
مصيف مثلي لانشد عـن مصيفه
وقلبي يشوقنه اجـزال السواليف=
هذا هـوى بالـي وكلـن بكيفه
وهاض الكلام وكلش له مداريف=
وزانه مجـاراة العلـوم الطريفه
ابن سويـد ذرف القـول تذريف=
بيوت شعـر ٍ بالمعانـي حصيفه
من لابة ٍ تعرف نهـار المواقيـف=
صبيان يام اهـل الفعـول الكليفه
دمناني لامن مشى الحيف للحيف=
قوم ٍ وفاها يغلـط اللـي يضيفه
قطف زهر عذبات الامثال تقطيف=
والنور عده ريف جـاره وضيفـه
والصدق لظفران عـز ٍ وتشريف=
والظلـم طبـع للوجيه الكسيفه
ترفع له البيضا بروس الاطانيف=
يوم الوفا والصدق وجهـه حليفه
وسمعت في قوله لما سمع توصيف=
في خرب والمصبح ورمح وكنيفه
حد ٍ بيـان ثابـت ٍ دون تزييف=
واللي يزيـف فيـه مافـاد زيفه
وقبله شهد مثله رجال ٍ عواريف=
قول الحبيشي في السنين الوحيفه
وقول الخلاوي صدق ماهو بتخريف=
قول ٍ مورخ ثابت ٍ فـي صحيفه
والزايديـه يازبـون المواجيف=
ترسخ على حد السيـوف الرهيفه
ديارنا مـن ماضيـات الاساليف=
قبـل الهلالـي والزناتـي خليفه
وحدودها تعرف بكـل الاطاريف=
ومن دونها العدوان ترجـع معيفه
وجنوبها رمح ٍ عروقـه مهاييف=
وشمالها جـزع الركـا لاعريف
ومن شرق لادناها الوسيع المناكيف=
ومن قبلة قوز الشريـف وشريفـه
دار ٍ حميناها بضـرب المراهيف=
وفوق المهـار وموميـات السفيفه
وفعل القبايل وافـي ٍ دون تعريف=
والذم يرجـع صاحبـه للحسيفه