اخوانا وأعزائنا أعضاء موقع قبيلة الدواسر الرسمي
لقاءنا اليوم فريد من نوعه ، فهو مع شخصيه اجتماعية رفيعه سواء على مستوى قبيلته أو على مستوى الجتمع بشكل عام ، استطاع ان ينال هذه المكانة أولاً بايمانه القوي بالله ثم بحسن أخلاقه وعلمه وبعلاقاته الطيبه التي تربطه مع ابناء مجتمعه مما جعله يحصل على أعلى نسبة أصوات في محافظة وادي الدواسر في أول انتخابات بلدية تشهدها المملكة العربية السعودية ، وليصبح نائب رئيس المجلس البلدي بمحافظة وادي الدواسر ثم رئيسا ً للمجلس البلدي مؤخرا ً.كما ان شخصيتنا التي سوف نتحدث معها اليوم رجل أعمال معروف على مستوى المنطقة وهو نائب رئيس الغرفة التجارية بوادي الدواسر .
لكن من الناحية الأخرى لشخصيتنا هذه هو أنه راوية وباحث تاريخي من الطراز الأول لتراث قبيلة الدواسر ، كما أنه شاعر معروف له قصائد واسهامات شعرية جميلة .
اخواني لانطيل عليكم لقاءنا اليوم مع
الشيخ ماجد بن حسن آل ناهش الودعاني الدوسري
الشيخ ماجد بن حسن بن شارع آل ناهش الودعاني
س : الوالد بوحسن نريد منك نبذة شخصية بسيطه للأخوة القراء وأعضاء موقع قبيلة الدواسر الرسمي؟
ج : والله الساعة المباركه ، أولا ً شي الله يحييكم ومرحبا ً بكم ، وهذه فرصة طيبه ويوم مبارك الذي التقينا بكم فيه .
الاسم : ماجد بن حسن بن عبدالله بن شارع آل ناهش الودعاني الدوسري
كنت اعمل في قطاع التعليم ثم تفرغت بعد ذلك للأعمال الحرة والتجارة وللمشاريع الزراعية
والأن رئيس مجلس البلدي لمحافظة وادي الدواسر
ونائب رئيس المجلس التنفيذي في الغرفة التجارية بوادي الدواسر
ورئيس اللجنة الزراعية في الغرفة التجارية بوادي الدواسر
س : هل ممكن ان تعطينا نبذة عن قبيلة آل ناهش الوداعين ؟
ج : والله قبيلة آل ناهش من الوداعين ، ويعتبرون في (زايد الصغير) وزايد الصغير يعتبر خاص بأهل الفرعة ويجتمع فيه أربع قبائل من الوداعين وهم قبيلة آل ناهش وقبيلة آل عريمة( آل ناصر) وقبيلة آل عويمر وقبيلة آل معني ، وكلهم يرجعون في زايد الصغير وسكنهم في فرعة الودعاني ومعروفة فرعة الوادي .
وقبيلة آل ناهش تكاثرت بما منحها الله من استقرار وخير ببركات حكومتنا الرشيده واصبحت لها مكانتها بين قبائلها والحمدالله رب العالمين ، لهم الأن من المساكن والمزارع والأعمال الحره وهم منتشرين في الوادي وخارجه .
س : هل يوجد من ابناء من قبيلة آل ناهش من هاجر خارج الوادي ؟
س : والله فيه ناس بالشرقية وحتى في العراق والأردن ومازالوا يعتبرون انفسهم من الوداعين من آل ناهش ,
س : هل لديك معلومات عن آل ناهش المتواجدين بالعراق ؟
ج : والله مازرتهم بس جو ناس من اهل الوادي من جماعتنا يقولون زرناهم ولقيناهم قايمين هناك في الزبير والبصره ،اما اللي في الأردن فهم بين الأردن وسوريا .الكلام ذا قبل خمسة عشر سنة
س: ماهو وسم الابل لقبيلة آل ناهش الوداعين ؟
ج : وسم آل ناهش المبيعيج وهو معروف وسم للوداعين كلهم، ولهم شاهد على الرقبة على مثناة الرقبة .
س:اشتهر احد أفراد قبيلة الدواسر سابقا بكرمه الكبير واسمه( غانم بن دليعة) ، هل ممكن ان تحدثونا عنه بصفته ينتمي لقبيلة آل ناهش الوداعين ؟
ج : غانم بن دليعه سجل كرمه الغوينمي في قصيدته الثمان السوالف فاحدى قصصه في الكرم سجلت هي من ضمن الثمان السوالف للوداعين ، ومعروفة و يمكن بعض الرواة اغفلها .
والبيتين هي :
منها المسمّى(غانم بن دليعه ) = ذبح ذلوله عامد ٍ زوالها
راح الجنينه ضايف = بغى يضيف فضافته هشّالها
وهي موجوده في نفس في قصيدة الغوينمي (المصلحه) وموجوده في كتاب ابن حمير الرجباني وتجدها في مجلدات أخرى ، ولكن بعض الرواة الله يسامحهم لايذكرونها في القصيدة ، لا أدري هل تغافل منهم ؟ او عدم ادارك؟ .
غانم بن دليعه من آل مترك من آل ناهش واشتهر بكرمه في الفرعه لدرجة انه يوقد النار (الضو) فوق السطح لأجل الضيفان مايضيعونه اذا جاؤوه .
وتعرف الدنيا دورات ومتقبله و تجذب وتمحل ومره يجي ربيع ومره تمحل الأرض ، ولحق الزمان مره بغانم بن دليعه ، لدرجة انه شحم نخلته لضيفانه عندما جاؤوه وضيفانه من البادية (بدو) لم يروا في حياتهم شحم النخيل .
ويمكن انتم أيضا ما ادركتوا شحم النخل ، النخله فيها رمانه في علوّها(أعلاها) مثل الكوره كانوا في السابق ايام الجدب يشحّمون النخل حتى مايبقى الا هذه الرمّانه، ثم يقدمونها للأكل ، ولكن البدوي والذي ليس راعي ديره مايستسيغها .
المهم ان غانم بن دليعه شحم نخلته وقدمها لضيفانه وكانو من (البدو) ولايعرفون شحم النخل وكانت اخر ماعند غانم بن دليعه وقلطها على ضيفانه ، وقال لهم :
سموا الله يحييكم على أغلى ماعندي ، وانا دخيل المشدود من العاري
(العاري اللي ماجرب الدنيا ومشاكلها اما المشدود فهو اللي جرب الحياه).
المهم فهمها اللي فهمها وكلوا الضيفان ، ولينهم بدو مايعرفون شحم النخل ، جاملوه ويوم قاموا وسروا من عنده .
فقال احدهم : لعنابوا ذا الودعاني جاعلنا ليف نخله .
حول رفيقه وقصفه بالعصاه (وكان قد فهم كلمة ابن دليعه) وقاله لزميله :
حسبي الله عليك ، الرجال قد تدخل عندي هذا اخر ما عنده نخلته ،اغلى ماعنده وشحمها عشان يكرمك ، ما كان تسبّه .وسروا في طريقهم .
وغانم بن دليعه ماله بقاء في الديرة ماعاد عنده شي ، خذى عبده( فرج) ، وذلوله ، وراح وكانت اقرب القرايا للفرعه وللوادي (بيشه) و(رنيّه) ، مئتين كيلوا تقريبا ، المهم راح لين حوّل على أحد القرى وجاهم في ليل وماضيّفه احد ، مهوب من قل كرمهم لكن ماعرفوه ولا دروا به ، فجاء عندهم ومالقى احد يضيفه ، فعقل ذلوله وامسى مع عبده ، واثناء ممساهم (نومهم) ، جاء ركب لبيشه ومالقوا احد يضيفهم ولقوا ما لقاه ابن دليعه وكان ليل والجو شديد البروده ، وكان من بين اهل الركب احد كان قد ضاف على غانم بن دليعه بالوادي وشاهد كرمه ، وهو لايدري ان صاحب الذلول المعقوله اللي بجانبهم هو غانم بن دليعه ، فقال هذا الرجل لربعه : عمري يابن دليعه ليت ابلنا نوّخت عند غانم بن دليعه .
(يعني لو انا نوخنا عند غانم بن دليعه كان ضيّفنا) .
سمعه غانم بن دليعه وكان ممسي وقال لعبده : قم رد راس الذلول (أي انحرها) .
فقال العبد : ياعم ماعندنا الا ذي الذلول.
فقال ابن دليعه : قم رد راس الذلول ! والله ان ماترد راس الذلول ان يخالفك راسك (اقتلك).
فقام العبد ورد راس الذلول وقام غانم بن دليعه وراح للقوم ، وقالوا : ويش علمك ؟ ، قال : انا غانم بن دليعه ، تمنيتوه بعيد وجاء قريب ، طقوا على اهل البيوت خلوهم يعطونا مواعين نعشيكم .
ويجيبون المواعين وعشى اللي قدامه وعشى الضيفان اللي عنده وصارت قصيدته المعروفة .
وكان الشاعر الدبّاية الودعاني قصير لابن دليعه في الفرعه ، وقال هذه القصيدة بعد ان فقد ابن دليعه وفقد كرمه عند رحيله لبيشه :
يانديبي من على عملية = كن الجراد مرتب ٍ بعذارها
دار ٍ غدى منها المسمى (غانم) = اقول لا لعل الحيا بزبارها
هو شيخنا وأبوه قبله شيخنا = هيف الغنم لامن دنى جزّارها
ياما جعل من كرامة ٍ معبيّة = من جفنة ِ يملى الفراش بزارها
قصيرته ماهيب تمسي خايفه = ولا يوايق مع فتوق جدارها
جاك رايح يبغي الجنينة ضايف = بغى يضيفه فضافته خطّارها
والقصايد التي قيلت في غانم بن دليعه كثيرة ، وتوارث ابناءه الكرم ومنهم مترك الناهشي .
س : هل ممكن ان تذكر لنا احدى قصص مترك الناهشي ؟
ج : بكل سرور ، هذه قصيدة لمترك الناهشي
ومناسبتها ان واحد ٍ من اليامية من آل العرجا يقول : ( لولا المساعرة خذينا الوداي)
فالوادي له حاضره وله بادية ، حاضرته الوداعين ، وباديته المساعره والمخاريم والرجبان وبدو الدواسر كلهم ، المساعره عند ابلهم ويفكونها ويغزون القوم ويجيبون ابلهم ويغزونهم ، وحاضرة الوادي الوداعين هم اللي قايمين به وحامينه .
فوصل كلام العرجاني لمترك ، فرد عليه بقصيده ، يخبره فيها ان( المساعره) اخوانا وبني عمنا، وأن الوداعين هم الثابتين دائماً في الوادي وحامينه ، لأن البدو يروحون ويجون ويشدون مع ابلهم ويغزون البدو الأخرين والبدو يغزونهم ، والوادي فيه ناس يحمونه ..حتى ان اهل الوداي الوداعين في وقتهم من شروطهم يوم انهم يحمون الوادي ، ناقتهم لا خذاها قوم وعرفت عند اي واحد من اهل الوادي يجب انه يردها للوداعين واسمها (التارده) ورفاقتنا كلبوهم يعرفون التارده.
حتى الشيخ مناحي بن حزيم الرجباني من شيوخ الرجبان يقول :
ان كان يطرون سكّان البلد = فأهله (وداعين) توطي العايله
التارده من كل مخّاذ ٍ ترد = وان كان ماقلته فكلن ٍ قايله
فالتاردة هي:
اذا اخذوا قوم معادين ابل من الوداعين وجات عقب سنين وعرفت عند واحد من الدواسر يردها للوداعين .
المهم ان مترك رد على العرجاني بالقصيدة التالية :
يالله يالمطلوب ياجزل العطا = ياخالق نفسي وهو معبودها
تغفر ذنوبي في نهار الماقف = لا نصبت الميزان ننظر عودها
من عقب ذا ياراكب ٍ عمليّه = بنت آركٍ يعجبك زين خدودها
تزهى الموارك والعقيلي فوقها = والزور منها ماينوش عضودها
يركب عليها (مجدل) برساله = سلام احلى من حليب صعودها
ينشر من (الفرعه) اليا من صلى = عند ابن شيبان يرز وعودها
ياخذ مع (الفاو) المسمى مجنب = تنصى (ابن مجحود) وهو مقصودها
تلقالهم حول السليل منازل = لازم اليا جيته تشوف وفودها
تنصى (الحرير) وذاك بيته بيّن = له ربعة ٍ كل الرجال ترودها
نصيحة ٍ خص الرجال بذنبهم = وخل الرجال الطيبين وجودها
قل ذا شاعر ٍ جانا كلامه مشطف = والهرجة اللي جات له مردوها
عزالله انه طايح ٍ في غبّه = والأجواد تقتاس البحور بعودها
انشهدنه عايل ٍ مستكبر = وما جات به امه في ليالي سعودها
حنا (وداعين) رفاع مباني =نوشم عليها للضيوف وقودها
وانّا الشجرة اللي يظل ظلالها = حن جذعها والبدو مثل فنودها
خبل ٍ رفاقتنا يعيرنا بهم = هم الصقور وحن مثل زنودها
في كف (أبوبادي ) وهو زيزومها = شيخ الجهامة غازي ٍ بجرودها
حوافة الغدرى يغيرون الضحى = كم حلة ٍ منهم عوى مفرودها
وكم من قطيع ٍ جاووبه من منزله = حلبوه ورعيانه تحف كبودها
وعلى الحدود تشوف جرة خيلهم = وكم من صراة ٍ شاربين عدودها
وان كان تطري الذم فالذم عندك = عند (ابن ساره) جرها ويقودها
جماعتك مايطلقون لسانك = ذمك كلوه وسندوك حيودها
هي تحت رجلك بالديّر = ردّت بوجهك حاظر ٍ شهودها
في كف أبوبادي : الأمير ابن قويد
ابن مجحود وابن ساره : من شيوخ ال عرجا من يام
(الفرعة) : فرعة الوداعين بوادي الدواسر .
قصد مترك بالذم بقصيدة هذه : ان شبنان المصارير غزى مع جماعه له غزوا صوب الياميه ويوم غزوا لحقوهم الياميه وكان الغزو شوي ، وتمكنوا من الغزوا ، وشبنان معه فرس ، ولحقه واحد من الياميه وقام شبنان رفع بندقه وقال : امنعني وفرسي.
قال اليامي : انت بوجه ابن مجحود.
واليامي يقول هذا الكلام وهو نفسه مهوب ابن مجحود ، قام شبنان ورفع البندق وعطاه الفرس ، ويوم راح مع اليامي عقب ماخلصت الهيّه ، قال اليامي لشبنان : يادوسري مالك الا السلام الفرس مهيب لك جنّبها .
قال شبنان : انا ماهديت فرسي الا في وجهك .
قال اليامي : مالك فرس.
وعوّد شبنان ، ويوم جت قصيدة مترك الناهشي الأخيره ، جات لها سبب ، فقام ابن مجحود شيخ آل عرجا وراح صوب ابن ساره وحضر شبنان المصارير وراحوا صوب عارفتهم .
وقال ابن مجحود لابن ساره : الفرس مردودة ٍ في وجهي .
قال ويش تقول ياشبنان ؟
قال شبنان : اقول انا حضرنا في الغزوة في الفلانية واني مافكيت فرسي وبندقي الا في وجه (علي بن مجحود) .
قال ابن مجحود : ويش تقول يابن ساره ؟.
قال ابن ساره : هذا دوسري كذوب وهاذي فرسي ماخذها .
فقال ابن مجحود : في وجههي وفي وجه أبي وعلي الطلاق ان تجي .
وأدى الفرس غصب ابن ساره العرجاني لشبنان المصارير الدوسري .
وخذى الفرس شبنان المصارير وقال لابن مجحود : يابن مجحود فرس ٍ فكيتها ، الله عطاك اياها
قال ابن مجحود : والله ما يتعالمون رجال يام اني ماخذ فرسك عقب مافكيتها ، الا هاذي ناقتين معها والله يستر عليك مع فرسك .
ويوم رجع شبنان المصارير لأهله خذى من نخيلهم وملاى المزاهب ورد الناقتين معها ناقتين اخرى صوب ابن مجحود .
وهذي من علوم الأولين الطيبه وسوالفهم الزينه .
س ماهي قصيده الشيخ ابن هادي القحطاني في الوداعين ومامناسبتها؟
ج : محمد ابن هادي بن قرمله شيخ قحطان ، و جاء عنده جار ٍ له من الدواسر من الرجبان ، وجاوره ومنح الرجباني ناقه ، وراحت الأمور وتفارق القحطاني مع الرجباني ، وتوفى الشايب الرجباني ، وجو عيال الشايب الرجباني ومعهم ودعاني ومروا على ابن هادي يسلمون عليه .
قال ابن هادي : انتوا ياعيال الشايب اللي خذى الناقة ابوكم لاعطاني فيها دراهم ولا ردها
قالوا العيال :يارجال الشايب توفى يطلبك البيحه وانا لك في المردود وانا ماندري عن ناقتك الا الحين وان شاء الله بندزها عليك .
قال الودعاني : انا كفيل لهم ياطويل العمر لين يرجعون الديره ويعطونك غرامة ناقتك ولاتسوي لنا حقوق وماحقوق .
قال ابن هادي : روح ياودعاني وتراك كفيل .
راح الودعاني وابطى ما رد لابن هادي ، وابن هادي يدوّر الوداعين يبغي ينشد فيهم .
فارسل قصيدة للوداعين يبغي يستنبشهم فيها وهم قد ردوا له جزء من غرامته ، فارسل ابن هادي ذي القصيده :
ياراكب من فوق طلق الذراعين = يطوي مسير اليوم في قدر ساعه
مرباه في الظفره بلاد النسيين = يعجبك في الأرض السماح ارتباعه
يافاطري ياللي ثمنها ثلاثين = ولا معانقة الجمل باندفاعه
يبرى لها قب ٍ سواة الشياهين = قب اليا هد القواصر قطاعه
ياما رعت من مربع زاهره زين = وميرادها عد ٍ تعاوى سباعه
يافاطري عجي قصور (الوداعين ) = حني حنين كل من سمعه راعه
حني حنين عند قصر الخماسين = واختص عبدالله صبي الوداعه
حدر على (الرجبان) هم و(القثانين) = ومن مثلهم حط الوداعه بضاعه
ولا على (الجريان) نزاعة الدين = شراية ٍ للمدح لاجاء مباعه
ان كانهم باروا ولاهم نقيين = باروا وبرّاهم ولي الشفاعه
نجد سلاطين العرب منه زارين = قله ترى قومي غدوا به قلاعه
الله يثبتنا على كلمة الدين = دين النبي ياحي ذيك الشفاعه
جاءت القصيده ورد عليها الشاعر مبارك بن مويم من الخماسين الوداعين ويرد على ابن هادي يبين له : ان حنين ناقتك مهوب اللي بيرهب الوداعين والدواسر ، قد جوهم الاتراك والاشراف وآل سعود والقيمان من كل مكان وماتحركوا وثابتين في مكانهم ولا حطوا على الوادي حضار (سور) ، حضاره يمانيهم وارواحهم .
يالله ياجزل العطى مرقب العين = يابا الجمايل منك نرجي الشفاعه
جعلك تزينها وتظهر على الزين = وترفع مقام اللي رفيع ٍ شراعه
مبارك بدع قاف ٍ يشوق المغنين = صعب القوارع ذلّله لين طاعه
زعته وجاني مثل ورد محيمين = مال النذير من مفاليه زاعه
صاح المصيح سابره شاف بالعين = واستلحق الصياح باقي الفزاعه
فياراكب من فوق طلق الذراعين = اوراك ماوقفت في المباعه
مامنهن اللي خرق خشمه ولاهين = وماسيقت في زرع الليالي وداعه
ومربعاتن صوب حدبا (الكليبين) = ومن (راك تثليث) رعت من رجاعه
سحم مفاقرها وحم العثانين = وعلى الضحى تشدي المها في التماعه
تلفي لنا شيخ ٍ وراعي نبا زين = محمد ولد هادي طويل ذراعه
بحذرك من المسمار لايقرب القين = يخطر عليها قينها بانقطاعه
ومن الغلق حاذور لايقرب العين = يخطر عليها عينها بانقباعه
حنانتك ذاللي تعج (الوداعين) = حني حنين كل من سمعه راعه
ماراعنا المدفع وقبس (العثامين) = يوم غشى روس الصبايا قناعه
من جدنا في (فرعة ) البقع مرسين = وكم شيخ قوم ٍ حط فوقه شباعه
يرسخ بنا غرس ٍ وبرج ٍ من الطين =ومزين تقاود دبسها باتباعه
نذخر نقاوي تمرها في المواعين = ونضيّف الخاطر نهار المجاعه
لاحذفت حيرانها بالمعاطين = هم حرك المقداح راعي الزعاعه
لاتحسبن انا من ضمانتك سالين = ولا فنبغي من سنعها بضاعه
حطيتنا بينك وبين القثانين = والشيخ مثلك في جنابه طماعه
جاتك غرامة فاطرك جعلها البين = عنا وعنكم من البلا واندفاعه
حطيتها ذم وهي محتسب دين = وذا سالف الفراع يعطي الفراعه
دولها ياجعل تذبح بسكين = في ديرك تدعي عليها الجماعه
مستكثرينك من بواقي الحكا الشين = ومن كال لنا بالمد نوفيه صاعه
ويقصد ابن مويم بهذا البيت :
احذرك من المسمار لايقرب القين = يخطر عليها قينها بانقطاعه
قصده الفرس عندما يقومون بتحذيتها ، اذا زاد المسمار على حذاء الفرس فعندها لاتستطيع الفرس المشي ، فيقصد ابن مويم هنا ، أي لا تكثر بالكلام يابن هادي .
اما بيت :
ومن الغلق حاذور لايقرب العين = يخطر عليها عينها بانقباعه
المقصود بالعين عين بندق الفتيل ، والغلق هو المطرقة التي تنزل على الفتيل لتثور البندق ، ومعناها خلك بعيد يا بن هادي لانثور عليك .
س : هل ممكن ان تعطينا رد مترك الناهشي على قصيدة ابن هادي ؟
ج :نعم بعد مرور سنه على قصيدة ابن هادي وسالفته ، حصلت معركة (المعتلا )المشهورة بين عبدالله الفيصل واخيه سعود بالوادي وجت هية المعتلا اللي تسمعون بها ، وجاء مع عبدالله الفيصل مجموعة من القبائل من كل مكان من سهول وقحطان ومن عتيبه، وجاءت هية المعتلا وكسروهم اهل الوادي ومنعوهم ومنعوا دخيلهم يوم الله منعهم،
وصار عند الدواسر منعا كثيرون ، وصار عند مترك الناهشي الودعاني ثلاثة منعا من ربع ابن هادي من قحطان .
وجاء مترك واكرمهم وضيّفهم ، ثم أخذ مترك (ميزان المعاميل) وهو عبارة عن قدح من خشب يوزن به الماء لطبخة القهوة ، فأخذه مترك ووضع الميزان في مزهب احد ضيفانه القحاطين بدون علمهم ، وخلاهم ، وبعد ان تعشى الضيوف ووجبهم سار معهم حتى عداهم حدود الدواسر ثم تركهم .
ويوم ساروا القحاطين واخذوا لهم فترة ، تفقد احدهم مزهبه فوجد (ميزان مترك ) في مزهبه ، فقال رفقائه له : سوّد الله وجهك ، سرقت (ميزان) معزبنا الذي اكرمنا وآمننا .
قال : لا والله ماسرقته ، وطلّق انه لم يره الى الأن .
فقالوا : اذن دعه معك حتى نصل الى ابن هادي ، ونعطيه اياه .
ساروا الثلاثة حتى وصلوا لابن هادي وحكوا له القصة واعطوه (ميزان المعاميل) .
قال ابن هادي : خلوه بيجي منه علم ،
(وابن هادي خابر ان مترك شاعر وانه ماحط الميزان عبث) .
يوم درى مترك الناهشي ان ضيوفه وصلوا لابن هادي ، ارسل هذه القصيدة ، يعلمه فيها بالغزو الذي جاء للوادي وان الدواسر حموا واديهم من جموع القبايل ، وأن حنانتك اللي في قصيدتك السابقة جات عقبك ولا قدرت علينا بشيء .
يقول مترك الناهشي :
يالله يامنهوا على الناس بادي = يا ناشع الأرض السنيّه برعاّاد
أفرج لمنهو عاف حلو الرقادي = والعين ماجاها من النوم لدلاد
لو ان رزق الله يجي باجتلادي = ما كان جالك يالردي فيه ميراد
مير الله الرزّق رب العبادي = يعطي عطايا الجود ماهوب حسّاد
دنيا ً تقافت تاليتها النفادي = والعمر سيوّره اليا طال ينباد
فيا راكب ٍ حمرا ً تبوج الريادي = حدبا الظهر لاهيب هزعا ولا سناد
مرباعها من (الايسري) ل (الثنادي ) = لين الشحم عدى مناقيش الأبداد(1)
لاروّحت عجل غياها تشادي = هيج اليا ضف الجناحين حوّاد
تنشر من (الفرعة ) مع الصبح بادي = وفالعصر تمسي يابس الشور بجّاد
ليه نيرة ٍ مثل الثريا تنادي = بيته كما عد ٍ به الكل ورّاد
وله ربعة ٍ يلقا بها كل زادي = يذبح سمان الابل مع الحيل الأضماد
وله سابق تطرى مع هل الطرادي = لافرعن البيض غضات الأنهاد
كم من قليع ٍ جات صوبه تقادي = سعد ابن عمه يحتمل منه ماكاد
سلم عليه اعداد حب الحصادي = واعداد ماتذري زواعيج الانواد
فيا شيخ (ميزان المعاميل ) غادي = وانا المعزب وأي ضيفاني أجواد
هزاع عطني فيه درب القوادي = حتى السوالف الأوله فيه تنقاد
مهوب حب ٍ للقدح يا (ابن هادي) = مير انك أول من تعرّض للأنشاد
هماك (راعي الفاطر اللي تنادي ) = وتقول حني من على روس الأشهاد
وفاطرك عند صليهم بالوكادي = وخذت فينا اليوم تشعب وطرّاد
قلته وانا قومي نحاز المعادي = عيال الشريف اللي على الحرب نزداد
دون النخل لاجات حمر الجرادي = نردها من عصر عاد بن شدّاد
جانا (ابن لحيّان) يبي له ابلادي = في (المعتلا) خلوه في غبر الألحاد
مهوب حب ٍ يوم جاء للجهادي = جانا بزمله يبغي البز والزاد
في العصر ذبحوا لين ضاع العدادي = مع (ابن قينان فضى) فرد الأفراد
يانعم أهل صبحا نهار الطرادي = ارزان العدد بارودهم مثل رعّاد
كم كاعب لبسوها الحدادي = عند المحلّه يوم جاء بيع الانفاد
اللغف نادا له من الله منادي = شانت لمن خاون وزانت لمن جاد
1- الأيسري والثنادي : مناطق في هضب آل زايد .
س : هل ممكن ان تحدثونا ايضا عن بعض قصص آل ناهش الوداعين؟
ج : جاؤا آل مره غازين على راس قائد لهم يقال له (حشفل) ، وكان آل ناهش الوداعين مع معاويدهم (الابل التي تستخدم للزراعه ) ، وكان اربعة أو خمسة من آل ناهش عند معاويدهم ، فأحسّوا بالقوم ، يوم حسوا بهم قال اكبرهم وهو عبدالله بن سهل آل ناهش : القوم قريبين منا وهم ينتظرون حتى الصبح يبين لأنهم يريدون ان تصيب طلقاتهم الابل بل يريدونها ان تصيبنا ، لكن انا لدي خطه ، لاظهرت النجمة قمنا وصلينا ، واذا صلينا وخلصنا من صلاتنا الصحيحه واحتسبنا لله ، أذنت من جديد بصوت عالي ، ثم قومت للصلاه وشرعت في قراءة (الحمد) كنّي اصلي ، لأني اعرف انهم سيهجمون علينا اذا علموا اننا في الصلاة .
فنفذوا خطتهم وبعد ان صلوا صلاتهم الصحيحه ، استعدوا وكان معهم بندقين (فتيله) خذوها وتلحفوا ببشوتهم حتى ماتشاف الفتيله ، والباقين معهم الرماح ، وبعد ما أذن خويهم واقام الصلاة وقرأ الحمد ، لينهم يسمعون دبكة القوم مقبلين عليهم ، ويوم اقبلوا عليهم ذبحوا واحد منهم وقطعوا يد قايدهم حشفل وصوبوا اثنين منهم، ولاهوب واجد ، والمقصد الابل لاراحت القوم ماعينوا خير .
قام حشفل المري ينشد :
ابكيك ياكفي وشمطان لابتي = غدا عند معاويد ٍ كثير ٍ قطوعها
يانعم يالاجناب عند حلالهم =( وداعين) ماضرب المصبب يروعها
البل خذيناها ولحقت فزاعهم = وبارماحهم ردوا سواني زروعها
نعم بهم لامن لفى هاشل الخلا = ولامن لفت قدهي تخافق بجوعها
تملا مزاهبهم من البر والسري = ومثلوثة ٍ للضيف هاذي طبوعها
ويقول عبدالله بن سهل يتمنى ان ربعة اكثر عددا :
ليت من ربعنا خمسة عشر = كان بالعون مني الهم راح
عذرنا عند حسكات الوبر = يوم مادبرت وانا صحاح
جيت من دونهم مثل الوعر = والوعر من وزى فيه استراح
مجهم ٍ هد رمحه واعتذر = ما من الربع من سمّح وراح
ضربت الشيخ مالفتت عسر = حربتي يوم معطت منه ذاح
س : هل ممكن ان تعطينا قصة الجبعة آل خليّف مع صديقه القحطاني؟
ج : الجبعه من آل خليف ، كان له صحيب من القحاطين من آل عاصم ، ولامنه جاء وقت صرام النخيل ، ارسل له القحطاني ابل وملاها ابن خليف له .
يوم جاء يوم سمع ابن خليف ان صديقه القحطاني يتبجح عند ربعه بقوله : ان هاذي تملا بهيبة الله ثم هيبة آل عاصم وليس من الصداقة .
وعقب هذا الكلام ارسل ابن خليف هذه القصيدة يخبره فيها : ماهبنا اللي قبلك فنهاب منك ، كل في ديرته ، وانت على ربعك والله يستر عليك ، وانا في ديرتنا محد بجايها وحنا فيها :
يامسرهب ترحل كفيت السبب = فوق حر هميم من مناه الهذيل
ديرتي يابن عاصم ترى خرجها = المصبب مع كل سيف ٍ صقيل
ديرتي من (شطاب) الى (المردمة ) = لا (بني رمح) يهمل بهن النزيل
ديرتي كم ذبحنا بجيلانها = من عقيد ٍ لاجالها مستصيل
لابتي تكسب المدن بسيوفها = يوم كسب البداوين حشو هميل
لابتي (تسعة آلاف تفاقها ) = ثم ضاع العدد يوم رز الشليل
لابتي كالعسل يوم صفي صفا = ان تكدر فداء وشارب الداء عليل
تسعة آلاف تفاق : تسعة آلاف مقاتل
وهي أطول من ذلك
س : هل يقصد الشاعر ابن جبعة ب( تسعة آلاف تفاق) مقاتلي الدواسر كلهم او الوداعين فقط؟
ج : اعتقد انهم يقصد اللي حوله او اللي يقول عليهم .ولا اجزم بالظبط من المقصودين.
س : الا تعتقد ان تسعة الاف مقاتل عدد كبير ذلك الوقت ؟
ج : تسعة الاف كثير لكن ليس كثيرا ً على الأراضي التي نشوفها ، الأن حنا اكثر من تسعين ألف شخص بالوادي فقط والأن المساكن بعضها ماوصلنا له دليل انه كان فيه كثافة سكانيه في السابق والدليل ان البقعة التي مساحتها متين متر في مئتين متر ، فيها خمسة آبار ، هذا دليل على الكثافة السكانيه سابقاًُ.
س هل ممكن ان تعطينا بعض قصايد فرج بن دليعه؟
ج : نعم ، هاذي قصيدة لفرج بن دليعه مرسلها لصديقه سيف الهاجري.
عند العشي بادي في راس مشرافي = في راس صعفوقة ٍ تصفق هبايبها
قم يانديبي ترحل فوق موجافي = لاشان عوص النضا ماشان حاجبها
تلفي لنا (سيف) هو زيوم الاسلافي = زبن العثيرة اليا حاثت براكبها
ان شد شدوا وهو زيزوم الاسلافي = وان قام قاموا وروح له نبايبها
ياما قنا في المطاوي كل مشرافي = خور ٍ وعفر ٍ هشات محالبها
اشكي عليك الخطا قد شفت الاجنافي = دنيا ً تقلب على الأجواد جانبها
عافت الأجاويد ومعشين الأضيافي = وصارت للأرامل ورتهم عجايبها
شفت الحصيني تعلاّ راس مشعافي = وشيخ القرانيس حوّل من مهاضبها
اشوف كن الثعل من صيدهم ضافي = والذيب ما عاد نيبانه يعض إبها
من لابة من مناهم هزع الاشنافي = في فرعة البقع عفينا جوانبها
الجار نعطيه غرسٍ حمله أردافي = ثم انشد اللي من الجيران حل إبها
حامين جيلانها بحدود الأسيافي = ومنها الأصاحيب ما تنزع طلايبها
س : هل تحفظون قصيدة ابن جويّر المخاريم المشهوره؟
ج : نعم يقول ابن جويّر المخريمي :
قال المنيعي واعتلا اليوم مرقب = مربى الصقور العاليات وحاش
لي ديرة ٍ قبليها في حيضا = وشماليها المشقوق والرقاش
وجنوبيها الوادي المسمى بلادنا = ومضماه خرب ومن وراه مناش
وشرقيها الأفلاج عد آل زايد = مدهال حضران وعد قراش
لاشد راعي الغرس منه وهمّله = وطوى سريحه ناير منحاش
ثم شدوا البدوان يتلون بارق = يتلون برّاق رمى باعتاش
نزلها وداية جارها من جدارها = (مباعجة ٍ لا جاء الدهور هشاش)
يا ( مزيد) بوصيك مني وصية = ثلاث عسرات وكيف تناش
فالأوله لا اقبلت عوص النضا = قدهي تباشر بالعرب وعطاش
فعليك بالدرب العلا والله العلا = والله ولي النفس والمعاش
والثانيه لادبرت قحص الرمك = ثني خلاف التالي المنحاش
فعليك بالدرب العلا والله العلا = والله ولي الخلق والمعاش
والثالثه درب النقا فأنه البقا = يغشاك من البيضا ثياب الشاش
حتى يعد لك في المضا سوالف = لاعاد ولد الاش مايلقاش
س : المعروفة ان الوداعين حاضره ، ويقول البعض انهم ليسوا بأهل مغازي ، فما ردكم على هذا القول ؟
ج : الوداعين غزوا المدن ، بقول الشاعر :
لابتي تكسب المدن بسيوفها = يوم كسب البداوين حشو هميل
ان تكسب لك قعود هامل ولا تاخذ لك خلفات تسري بها بليل ، الوداعين يكسبون المدن ، من اللي فتح المدن إلا الوداعين وامر عليها ومن مات تحت الاعلام إلا الوداعين ، وحنا اهل مدن كاسبين المدن بنفسها ، اي المدينه واي الحاشي ، اول من سكن في الدمام الوداعين ، اول من فتح الحديده الوداعين ، اول من فتح جيزان الوداعين ، اول من ضرب في الوديعه الوداعين ، اول من نصّب في البريمي الوداعين.
يقول الهذية بن شيبان :
قصر البريمي يوم كل ٍ يهابه = ماحط رتبه كون حن ياوداعين
الوداعين اهل مدن ولاجاو شاخوا في كل مكان.
س : ذكرت ان الوداعين حاضرة لايغزون ، ولكن هناك من الوداعين اهل مغازي ؟
ج: فيه ابوفاس الجماعين وفيه هادي بن فهيد آل زويمل آل حنيش وفيه ربع من بدو الوداعين يغزون وياخذون عليهم ، اللي تبدوى من الوداعين من يغزون ويروعون ابل من ورى الرمله . لا طبعا بدو الوداعين يغزون ويش اللي يردهم .
هل قيلت قصايد رثاء في غانم بن دليعه ؟
ج : فيه قصايد لبتلا بن غانم ابن دليعه يوم مات ابوها ترثيه
تقول لا واجملنا اللي يشيل الروايا = لاقربوا للشد وثنات الاجمال
لاكان الاربع من فروقه دمايا = ماهوب من كثر العلايق بملال
ياليت من حطوا بقبره فدايا = من مصعبات مايشيلون الاثقال
لاكان في رجع فكنها معايا = واللاش ماينفع سنامه ولو طال
ولها أيضاً
يابوي ياللي للمراجل حملها = وياشايل ٍ حمله اليا طحطح اللاش
كم عاقة رفلا عدلنا ميلها = وحيل الله اقوى يوم قلن الأدباش
اللي يهون عدلها من ميلها = سيورها تفنا ولاعاد يبقاش
ومن قصصها انها كانت مسافرة مره مع والدها لبيشة ، فشاهدهم شخص هي ورفيقاتها وقال : من هؤلاء المساكين ، وسمعته البنت فردت عليه :
من شافنا يقول ذولي مساكين = وانا بنات اللي لعينك عجبها
ياناشد ٍ عنا ترانا وداعين = كم ديرة ٍ خربت واهلنا سببها
س : هل ممكن ان تعطينا بعض من قصايدك في تمجيد القبيله ؟
ج : جت هية الظيرين بين حدود عتيبه والمخاريم ، وجاء واحد من شعراء عتيبة وارسل قصيدة مهيب زينه موجهها للدربيك المخاريم منها البيت اللي يقول فيه .
انصح الدربيك ياللي رفيق ٍ له = الخطر منا على فرعة الوادي
فاعترضته :
يالله يالمطلوب ياغافر الزلّه = ربنا الفرد الصمد ماله ندادي
هاض مابي قول من كبده مغلّه = عرم ولد العرم من خلق جادي
ينصح الدربيك واللي رفيق ٍ له = ويتهدد ديرتي فرعة الوادي
رايح لسعيّد ٍ بالخبر قلّه = لانهق عير ٍ فعندي له قيادي
عندنا البلجيك والما وحزوٍ له = والرجال اللي على الحرب تزدادي
جدنا الملطوم وانا عيال له = من حربنا ماهنى عينه ارقادي
من قعد منا عسى النار مثوى له = حرمته تلبس على موته احدادي
ابن الغديراء طايح ٍ ماحد ٍ شلّه = ودبروا عنه الشيابين شرّادي
وابن جهز ماعاد لقوا علاج ٍ له = ذكروهم لابتي وقع الأجدادي
تشهد الظيرين باللي جرى كله = والمواتر وسطها النار وقّادي
والعتيبي زاد مع علّته علّه = والجروح المرمسه زادت اجدادي
من قديم والمنيعي انحاز له = حامين الحدان من وقت الأجدادي
والعدو وان شافهم بطنه يحلّه = دايم في خوف وهموم وانكادي
فالحذر يالعرم تنويكم الذله = ينثني قول التهدد تسيادي
س : الوالد بوحسن في ختام هذا اللقاء الشيّق هل من كلمة توجهونها لإدارة وأعضاء موقع قبيلة الدواسر الرسمي ؟
ج : في الحقيقة انا سعدنا جدنا بلقياكم ونتمنى ان تتبعه لقاءات اخرى في المستقبل ، واحب اشكركم من اعماق قلبي على جهودكم التي تبذلونها في سبيل وحدة وجمعة قبيلتنا العريقة ولا شك ان انشاءكم موقع القبيلة الرسمي مفخره للجميع وليس أدل على ذلك من صداه الواسع الطيب عند كافة ابناء الدواسر وثقة امراء وشيوخ القبيلة بهم وانتم ولله الحمد محل الثقة ، ونتمنى عليكم الاستمرار دائما بالحرص دائما على جمع ووحده ابناء القبيلة والتعريف بتاريخهم العريق ونبذ العصبيه المقيته ، والعمل لحاضر اوطانهم والتفاني لخدمتها في ظل ولاة أمرنا الصالحين ولله الحمد . وأشكر كافة الأعضاء والإداره مره اخرى وبالتوفيق ان شاء الله .
الشيخ بوعبدالرحمن الودعاني مع الشيخ ماجد آل ناهش
الشيخ ماجد بن حسن آل ناهش مع انجاله
وفي ختام هذا اللقاء الرائع لايسعنا الا أن نشكر الشيخ ماجد بن حسن آل ناهش على سعة صدره وحسن استقباله وكرم الضيافة التي لقيناها منه ، سائلين المولى عز وجل ان يوفقه ويرعاه .
موقع قبيلة الدواسر الرسمي
www.alduwasser.org/vb