السلام عليكم ورحمة الله وبركاته:
اسعد الله اوقاتكم بالخير والمسرات
هذه قصيدة قالها الشاعر معيكل بن محمد بن غيث القحطاني
في الأخ مبارك بن محسن بن مسرع
اترككم مع القصيده
يالله يامعبود يامكون الكون = يارافع سبع بليا عمدها
يامغير الاحوال من لون لا لون = يامحصي خلقك ومحصي عددها
إنك تقديني مثل مايقولون= على بيوت ماحدن ينتقدها
وإنك تجملني على العسر والهون= وتهيي لنفس المشقى سعدها
وسلام ياشيخ له العز مكنون = من الهجوس اللي تجي في وعدها
شيخ وصدقانه وربعه يمارون = بوقفاته اللي موقفه معتمدها
ابو معدي والمخاليق يدرون = لامن زرع غرس المراجل حصدها
يعطي على كسب النواميس عربون= والمرجله عيطا بفعله صعدها
ريف الضيوف اللي من البعد ينصون = وسعد الذي نفسه تزايد نكدها
بفعاله عيال الحمايل يشيدون = والمرجله في بنك جوده رصدها
كلمة هلا يامرحبا والف مليون = طبيعة والمسعري معتمدها
حفيد ربع بالنوايب يسدون = من عادها دنيا قليل رغدها
قوم على فعل الوفاء مايسالون = كل ابلج وقفات جوده صمدها
من لابة في ساعة الضيق يثنون= لا ثارت الهيجاء وكثرت عقدها
دواسر لا قالوا بقول يوفون = قبيلة ماحد وقف في نصدها
من ضدهم وقت اللقاء مايصدون= وقفاتهم بالطيب ماحد جحدها
هذا الصحيح وكل قول له رهون = ومورد الحجه يثبت سندها
سقت المدايح في الذي يستحقون= روس الرجال اللي ينومس هددها
تمت وصلوا عد ناس يلبون = عد القنوف اللي يدرسم رعدها