[معلومات العضو راشد المسعري]

أشوف ديّاني وقف لي على الباب = يبي الوفا منيّ ويطلب حسابه

ماينسيّ دينٍ تقفّاه طلاب = الدين مايوفيه كثر الطلابه

يافيصل أودعّك توديع الاحباب = لاتحتريه انّه يجي من غيابه

غيبة دهر ماهي شهر عدّ وحساب = في مظلمٍ ينهال فوقي ترابه

ابيك ماتجزع وتفزع وترتاب = انّ جاك من ينعي ويشلع ثيابه

عمر البكا مافاد حيٍ ولاثاب = لوّ سرّ غيرك كان سرّ الندابه

اعزم وشم وأصعد من المجد مرقاب = واطلب لبوك انّه يخفف عذابه

وعليك بخوانك وربعك والاقراب = حقيّ عليك مواصلك للقرابه

ومن بينكم لاينقل الهرج سبّاب = ترى دمار الدار نقل السبابه

ومن الرجال الى تخيّرت الاصحاب = تخيّر اللي مايغيّر جوابه

مغلاق باب الشر حلال الانشاب = زبن الدخيل الى تنصىّ جنابه

وابعد عن الدوني ولوّ مرةٍ طاب = لزوم يظهر لك مرادٍ عيابه

وانصى الرجال الى تخيّرت الانساب = كل يعوّض به ياكود النسابه

وانشد عن المربى ترى العرق جذاّب = عرق الردى لابد يجذب جذابه

بلغتك الاعلام من غير نجّاب = والحر يعرف من خطاه وصوابه

الله الله من أجمل ماقرأت من القصائد المؤثرة والمليئة بالنصح والحكمة رحم الله الامير سليمان بن تركي السديري وبارك في ذريته سيرة مختصرة وافية اخوي فيصل وننتظرك من المزيد من قصص وقصائد هذا البطل الرائد تقبل ودي وتقديري ،،،،