السلام عليكم ورحمة الله وبركآته
عمتم مساء يا اعضاء منتدى قبيلة الدواسر
اهدي لكم هذه القصيده وهي لجدي الشاعر :عبدالعزيز بن معجب بن عوضه الشملان الحقباني البالغ من العمر 87 سنه الله يحفظة ويمده بالصحه
وهي قصيده عمرها يتراوح بين 6 الى 5 سنوات و ينخى بها ابن عمه هادي بن محسن ال شملان الحقباني في الاحسا بأنه لا يشرهـ عليه
لتقصيره بزيارتهم
ويحكي فيهآ بقوله " في ايام مضت فيها من روحات وجيات لربعي وجماعتي في اية مكان ولا يردني عنهم
اي شيء وقتها كان شوفي جيد ونشيط والحين قصر شوفي وقل نشاطي
وقلت روحاتي وقلت هذه القصيده انخا فيها
ابن عمي هاي بن محسن ال شملان الحقباني في الاحساء بأنه لايشره علي واقول فيهآ
من أول أروح واتي وأجيب علوم = وجدي على وقتن مضى يا هادي
من يوم قل الشوف ماعاد في عزوم= أعالج عيوني والدواء اليوم مافادي
وأنا يابو محسن عبرتي جات بالحلقوم = ليمن طرا لي طاري قضت فؤادي
تراكم على بالي وفي الليل اجيب حلوم= شفقن على شوفك ومشي ومقعادي
لي جيت ربعي انبسط واظهر المكتوم = لازاف عشب الروض من عقب رعادي
أهالي دلال قدمت ريحها يعوم = لافاح ريحه كن في الرأس عدادي
ماقدموا ثلاجتن خشمها مقطوم = من شربها يأتيه في الكبد قدادي
لاجا مجال قيل نعم مهوب رخوم = أهل دلة في مقدم البيت وشدادي
ذباحة الخرفان والحايل القحوم = يشرونها بأغلى الثمن غنم الأجوادي
كل أل شملان عسى عزهم يدوم= أهل الحسا والبر وسكانت الوادي
لا من لفيت الخرج تلقى الشحم وقروم = مافيهم اللي لي لفا الضيف صدادي
وعيال تغلب سلة السيف للمظيوم = لي جاهم اللي يرفع الصوت وينادي
يشهد لهم بدران يومه لهم قيدوم = الشرف جابوها عريبين الاجدادي
بدران راعي حربتن حدها مسموم = يراد بها لا اخد على الخيل بسنادي
ومن كان جده مرثة زايد الملطوم = ارث شغاميم على الموت ورادي
ابن مطرف يوم جاهم وهو مزحوم = ردوا طليبة شارب كاس ألانكادي
غريم الدواسر لو رقد مايجيه النوم = تيتم عياله والمَره تدخل حدادي
كلام العياضي يفهمه من يرد علوم = أفعالنا من قبل شداد ابن عادي
صلاة ربي عدد ماهبت السموم = وتمت وصلى الله على المصطفى البادي
نقلا من الجد والشاعر: عبدالعزيز بن معجب بن عوضه ال شملان الحقباني
أخوكم \ صقر الحقباني