[معلومات العضو الحر]

صح الله لسان الشاعر

وابن وقيان كفو الله يرحمه

ومن ناحية رده الابل من ال مره فهو والمساعره واحد واذا غابو يسد عنهم واذا غاب يسدون عنه


واذكر سالفتين لابن وقيان (كلها سامعها من شيباني)


السالفه الاوله ان ابن وقيان وربعه من الشكره وخلطهم من باقي الدواسر غازين وكان جد ابوي مسافر ومر على ديرتهم ولايدري انهم غازين

جدي مسعري وقال بيسلم على بني عمه ويبيت عندهم ويسرح اليوم الثاني ويوم جا قلطوه العرب وعلموه بان ابن وقيان غازي وبيعود قريب

وجلس يتقهوى وماخذا الا يوم صاح الصياح البل غارو عليها حنشل (والله اني ناسي من اي قبيله)

وماكان في الديره الا القليل لان اكثرهم مع الغزو

بنت ابن وقيان او اخته راحت مع الابل واذا قالو لها اللي خذو البل ارجعي يامره قالت البل لها اهل بيردونها وتعيي ترجع (وكان عيب عند العرب انهم يذبحون او يتعرضون النسوان)

جدي بلحاله مامعه احد لا من جماعته المساعره ولا من غيرهم

قفا جدي الحنشل حتى اظلم الليل والبنت مع ابل اهلها وتقول لها من يردها

ويوم اظلم الليل نطحهم جدي مع مضيق وقام يرمي ويتعزوى(خيال صخاف الشول انا ابن مسعر) وهذي عزوة المساعره

يوم سمعوه القوم قالو لبعضهم سلمنا من ابن وقيان وطحنا في المساعره

يظنون ان اللي نطحهم كلبو المساعره لكثرة الرمي والعزاوي وكان جدي الله يرحمه

متقي ويشوفهم وكل شوي يذبح واحد منهم من جهه ويروح للجهه الثانيه ويذبح غيره

وانحاشو القوم ويوم رد البل وينطحونه الناس وكلن يقول انا اللي رديتها لانهم في ليل

جا ابن وقيان وكلن يقول انا اللي رديت البل قال ابن وقيان ذا الحين بندري من اللي ردها

صب الفنجال ياصبي وتعالي يا فلانه ميد بنته او اخته من نسوق الفنجال له قالت سقه للمسعري

ولا لجدي فضل ولامن.. الشكره بني عمه

السالفه الثانيه

يقولون فيه شيخ من شيوخ شمر كريم واسمه هذال قال تعرفون احد اكرم مني قالو لا

قال واحد منهم انا اعرف اكرم منك قال منهو قال سميك هذال ابن وقيان الدوسري

قال الشيخ الشمري انا بسير على سميي الدوسري واعرف من اكرم انا ولا هو

يوم جاه الشمري واخوياه فرق الدوسري على الشمري بشي واحد انه قدم التمر لخيول الشمامره

يوم عشاهم قال الشمري هذي السالفه وانت طلعت اكرم مني لانك سبقتني باكرام الخيل وهذي فاتتني

وسلامتكم

وسامحوني على الاطاله

.....الحـــــر.....