::: مـنتدى قبيلـة الـدواسـر الـرسمي ::: - عرض مشاركة واحدة - التغطية المصوّرة لحفل إفتتاح مبرة قبيلة الدواسر الخيريّة بدولة الكويت.
عرض مشاركة واحدة
قديم 13-11-2010, 05:02 AM   #2
 
إحصائية العضو







الإداره غير متصل

الإداره is on a distinguished road


افتراضي التغطية المصوّرة لحفل إفتتاح مبرة قبيلة الدواسر الخيريّة بدولة الكويت.


مبارك بن بندر بن ذعار الدوسري يستهل الشعراء بإلقائه لقصيدته.

بعدها توالت الفقرات الشعرية، حيث إستُهِلّت بإلقاء الشاعر مبارك بن بندر بن ذعار الدوسري قصيدة بمناسبة حفل إفتتاح مبرة قبيلة الدواسر الخيرية، حيث يقول فيها:
ذيب شعري بين الأضلاع جايع ويعوي = إيعوي ويرد بالصوت وينك يا خوي
إيه أنا والله خويه وأنا راعي البيوت = البيوت إللي تورد على عدّ أرهوي
البيوت إللي إذا سمعها مطنوخ شاش = لاسمعها طيب الراس باله يستوي
شاعرٍ وأنقى بيوتي وأجيب خيارها = أتخيرها وتمشي معي حسب أنحوي
شاعرٍ مثلي لا جاء موقفه سد اللزوم = وشاعرٍ لا جاء لزومه وموقفه إيهوي
موقفي هذا ويلزم علي والله أحتميه = ولجله أطوي بُعد الأميال والبيداء طوي
بالنيابة عن ربوعي هلا بالحاضرين = مرحبا وأهلين والشعر جا له مطروي
مرحباً ترحيبةٍ بالشيوخ وبالحضور = أمراء شتى القبائل معى غالي ذوي
حفلنا وافي وبحضور هالجمع الغفير = زاد نور الحفل بحضوره إللي محتوي
جيت من وادي الدواسر ولربوعي عنيت = جيتنا مدعي وماني بحاجة مدعوي
جيت أشارك جيت أبارك على الفعل العظيم = فعلٍ يشجّع وصداه فالساحة قوي
المبرة وإفتتاح المبرة يا شيوخ = عزّ للصاحب وأما العدو يكوى كوي
والمبرة للدواسر وتشملهم جميع = تشمل أهل المدن وتعم من كان بدوي
والمبرة تبغي من النشاما حاجتين = دعم مالي سابقينه بدعمٍ معنوي
نعرف إنها جات من جُهد ما جت من فراغ = جُهدٍ مرتب ولاهوب جهدٍ فوضوي
جُهد شجعان الدواسر هل الفعل النزيه = فعلهم كايد وراسخ لأنه تربوي
فعلهم خيري لوجه الله الفردُ الصمد = فعل خير ونعرف الخير فعلاً نبوي
بيض الله أوجيه من طالبوا فيها وجات = وبيّض الله وجه من شار بالرأي السوي
وقبل لا أختم ما بديته إذا لي تسمحون = بمدح إللي لو أبا أحصي فعوله باغوي
لي زمن وأنا أدور على مدحه مجال = مهتوي مدحه وشعري لمدحه مهتوي
مهتوي مدح أبيض الوجه وزيزوم الصفوف = راعي الفزعات زيزومها الشيخ جلوي
طيبٍ رأسه وساسه وله رأي سديد = رأيه محنك يحل الأمر لو يلتوي
ثابتٍ صامت كريم العطاء طلق الحجاج = مدّته تشبع سباع من الجوع أتعوي
وأثني الترحيب حشمه وعزّ للرجال = حشمةٍ للي لفونا ولبّوا المدعوي
مرحباً ترحيبةٍ بالشيوخ وبالحضور = أمراء شتى القبائل معى غالي ذوي




الشاعر فالح بن تميم الخييلات يلقي قصيدته المشارك بها بالحفل.

وشارك بالحفل الشاعر فالح بن تميم الخييلات بقصيدة بهذه المناسبة . وألقى الشاعر المعروف معيوف بن مبارك آل بوسبّاع المساعرة قصيدةً بهذه المناسبة، يقول بها:
يا دكتور تزهمني وأنا قول يا دكتور = لو إن ما اتصلت أجي من المملكة عاني
من أيات واحد دوسري ما نيب معذور = ومن أيات طيب راس لو انه قاماني
بعد ما الله أعطاني من الدر والبلور = وصخر لي قلوب البشر قاصي وداني
ولا من كرهني واحد(ن) قلت له ماجور = أنا اخطي مثل ماصيب لاني إنساني
لكن والله إني ما تجاهل وف منعور = ولا نيب أعده غير واحد من إخواني
طبيعي طبيعي بس لا شفتنا الجمهور = أشوش وأنا معيوف والأرض ميداني
وأنا أقول للي حاضر(ن) حفلنا مشكور = من أبناء القبيلة والأجانيب والعاني
وعلا كل شيخ حاضر له مقام و دور = شيوخ الكويت إللي للمجاد عنواني
هذا اصل التكاتف والتكاتف يمد جسور = من العز رابط ثابت(ن) فوق سيسانني
بدينا بداية من سناها يشع النور = اهل المركز الأول ولا نقبل الثاني
مبرة على النهج الشريعة لها دستور = توصي على شد التكاتف والاحساني
تعين المريض وتقضي الدين للمعسور = وتفك السجين إللي ورا عشر بيباني
وعلى قولة إن العلم يقشع دجى الديجور = وقفتوا لطلاب الأدب وين ما كاني
هذا والله إللي ينذكر والرجال حضور = وهذا إللي يسجل في الصحف عبر الأزماني
وهذا والله إللي يدحم أهل العمي والعور = وهذا الموقف إللي ينحسب والعمر فاني
وهذا سلمنا والسلم الأول شداد الكور = وهذا فعلنا لأنّا طويلين الأيماني
وهذا إنا ليا منه حصل في الأمور أمور = وقفنا ومن ميقافنا يسلم الجاني
وهذا إنا ليا شح الزمن والليالي ادور = معا بعضنا وإن ثار في الجو دخاني
وهذا إنا علمنا فوق برج الكرم منشور = وتشهد لنا عدنان وزحول قحطاني
وهذا إنا وجار الدوسري ما عليه قصور = ناسم له عصاه ويقطع الدار وحداني
وهذا إنا خوال معزي الفارس المشهور = ملك مملكتنا بالشريعة وشاماني
وهذا إنا لنا في كل دوله رموز ودور = من الساحل الغربي ليا ساحل عماني
وهذا إنا ما يوطى حدنا والسلاح يثور = ومراكيضنا يشبع بها الذيب سرحاني
دواسر وفعل الدوسري للبشر محفور = على الطيب يبصر كل مبصر وعمياني
دواسر معا ملوك العرب فعلنا مخبور = ولانا تسلسل والمواقيف برهاني
ولدنا ليا عنز علينا يفج نحور = ما يردا ولدنا يشهد فلان و فلاني
ولا ناكل الحرجة ولا ناكل من السور = ومن سلمنا الماء للجانيب مجاني
قليل الكثير ولابتي محكمين الشور = إليا من فخر في لابته كل ديقاني
أقوله وأنا ما نيب منهي ولا مامور = لكن ما يحكم به ضميري على لساني


الشاعر المعروف معيوف بن مبارك آل بوسبّاع المساعرة يلقي قصيدته بهذه المناسبة وقد ألهبت مشاعر الحضور، مما حدى الشيخ سعد بن مبارك بن قرنين رجل الأعمال المعروف بإهدائة بشته الذي يرتديته بالحفل على جزالة ورصانة قصيدته.





الشاعر محسن بن فالح الشكرة يلقي قصيدته المشارك بها بالحفل.

وألقى الشاعر محسن بن فالح الشكرة قصيدةً بمناسبة حفل إفتتاح مبرة قبيلة الدواسر الخيرية بدولة الكويت، حيث يقول فيها :
من منطلق حب التكاتف والإحسان = ونبذ الأنانية وحب الفضيله
حثيت نفسي واستعديت من شان = أوفي المكيال وأحسب مكيله
عن واجبي ما نيب ريض وكسلان = حتيش لو إن المسافة طويله
دعوة بني عمي طويلين الأيمان = أفخر بها والفرض قبل النفيله
للجهد منتوج وللعلم عنوان = مبرةٍ للخير باسم القبيله
ترفا خلول الوقت من ربع واخوان = بإذن الذي ينشي حقوق المخيله
وأرامل مستضعفين ويتمان = ونسف الديون الكايدات الثقيله
وتجهيز متزوج وتطبيب مرضان = وإلا معاقٍ ما لقا من شيله
وعز وفخر بين القبايل والأوطان = باسم الدواسر كاسبين النفيله
من غير نقصٍ فالقبايل وحقران = كلٍ على حقه يورد دليله
قولٍ بلا فعلٍ على الرجل نقصان = ومن لا يعدّ الصدق ويش يحكيله
وهذا اجتماعٍ فيه خيرٍ وصفطان = قاموا به اللي يحتمون الدبيله
مواردٍ يارد لها كل ظميان = لا من دفن بعض الموارد نثيله
درعٍ على صدر القبيلة والامتان = ضد الزمان إللي سيوفه صقيله
عسى لهم عند الولي حرز وكنان = والهرج يكفي عن كثيرة قليله
لا صار مبني جداره بسيسان = وان حافه النقّاد جنّب سبيله
فالخاتمة صلوا على نسل عدنان = نبينا اللي كلنا ننتميله
المصطفى من جملة الإنس والجان = في ليلةٍ تسوى ثلاثين ليله
وشكراً لكم من قلب واحساس ولسان = الحب غاية والقصايد وسيله





الشاعر شافي بن راشد آل سويلم النتيفات المراقب بالأقسام الأدبية للموقع الرسمي لقبيلة الدواسر .

وشارك الشاعر شافي بن راشد آل سويلم النتيفات المراقب بالأقسام الأدبية للموقع الرسمي لقبيلة الدواسر بقصيدة بمناسبة إفتتاح مبرة قبيلة الدواسر الخيريّة، يقول بها:
من ديرة ابن سعود دار الونين = لديرة الأمجاد دار الصباحي
سلام تسليمٍ على منهج الدين = ألذ وأحلى من شرابٍ قراحي
ينساق صوب اهل الوفاء السلاطين = إللي خذوا في المجد الأول وشاحي
عقب السلام ورحمة الله على دين = أقوم وأرحب بكل انشراحي
عن ربعي اهل الطيب في العسر واللين = وإللي بفعل الخير سوا إفتتاحي
ربعي حزامي في المواقيف قاسين = إللي على العدوان سمٍ ذحاحي
دواسرٍ لا احتجتهم دايم يبين = اهل الكرم يوم الليالي شحاحي
واهل الظفر يوم المناويخ ولين = واهل الفعول الطيبة والسماحي
والنعم يا ربعي كعام المعادين = يا اهل السيوف الحدب واهل الرماحي
يعيش من سوى مبرة وتحسين = لأوضاع من وضعة يبيله نجاحي
إن جيت يمّ الخير ما فيه تخمين = وإن جيت لحميّا فعلمٍ مباحي
الله يكثر خير من خيره يبين = إللي كسب علمٍ جزيل وفلاحي
هذه طراة العمر يا اهل الملايين = إللي إغتنمها حي قبل المراحي
فيا الله يا رب العباد المصلين = احفظ بلدنا وعز دار الصباحي




الشاعر سعد بن فهيد آل بريك ملقياً قصيدته المشارك بها بالحفل.

وشارك الشاعر سعد بن فهيد آل بريك بقصيدة بمناسبة إفتتاح مبرة قبيلة الدواسر الخيريّة . وكما شارك أيضاً بالحفل الشاعر علي بن ناصر بن سويّد المساعرة بقصيدةٍ بهذه المناسبة، يقول فيها:
يا هاجسي لو ما تجي بتشره = وازعل واقطع مع جميع المواثيق
لا زم تحضّر لي من الشعر دره = لا هيب سرقة ولا هي تلافيق
لو كان تطلع من حدود المجره = من شان نهديها الرجال المطاليق
بشب جمر الشعر ونتا تكره = واسوي دلال المعاني طواريق
يا مرحبا والطيب هذا مقره = ترحيبةٍ منزالها قمة طويق
باللي لفا من جو ربي وبره = عن الدواسر معتلين الشواهيق
قومٍ لهم في دروب الأمجاد جرّه = ترقد على مجد وعلى مجدٍ تفيق
وتحط في كبد المعادين حرّه = وخويها ما يلحقه جورٍ وضيق
يا مرحبا تنعاد مليون مره = لأهل الوفا اللي للمراجل عشاشيق
الليل هذا ليل خير ومسره = ليلٍ يليق بنا وحنا له نليق
حنّا إجتمعنا في افتتاح المبره = والله يقدينا دروب التوافيق
نبغى الأجر والخير لازم نشره = عاداتنا نوسّع صدورٍ مغاليق
فكرة عظيمة والذكي ما تغره = فوايد الفكرة إليا صار تنسيق
الضايق المنكوب حاله تسره = ويجفّ موقٍ من دموعه غواريق
لَحدِ يتراخى والكحل بانذره = في عيونكم يا اهل ضعافة وتفريق
يا قوم شدوا حيلكم في المبره = والأجر عند الله ولي التوافيق


الشاعر علي بن ناصر بن سويّد المساعرة





الشاعر زابن بن محمد آل عمّار يلقي قصيدته.

وشارك بحفل إفتتاح مبرة قبيلة الدواسر الخيريّة بدولة الكويت الشاعر زابن بن محمد آل عمّار بقصيدة. وأختتم سلسلة القصائد الملقاة بالحفل الشاعر فهد بن غانم الحراجين بقصيدة بهذه المناسبة .


الشاعر فهد بن غانم الحراجين يلقي قصيدته.




بعد إنتهاء الفقرات الشعريّة إختتم حفل إفتتاح مبرة قبيلة الدواسر الخيريّة بإفتتاح أبواب المضائف ليتناول الجميع طعام العشاء.





في الختام ، فإن إدارة الموقع الرسمي لقبيلة الدواسر لتقدم خالص شكرها وتقديرها لسعادة الدكتور جلوي بن مبارك بن عبدالله الجميعة المسعري على حسن الضيافة والإستقبال وعلى رقيّ التعامل وتسهيل جميع الأمور لإدارة الموقع الرسمي لرصد جميع الأحداث بسهولة وسلاسة . مباركين بذات الوقت لكافة أبناء قبيلة الدواسر إشهار مبرة قبيلة الدواسر الخيريّة والتي تحتضن دولة الكويت مقرها الرئيسي، سائلين المولى عزّ وجلّ أن يجعلها باب خيرٍ على من أنشئها وباب خيرٍ على كثيرٍ من أبناء قبيلة الدواسر.

(صوت قبيلة الدواسر)
منتدى قبيلة الدواسر الرسمي
www.alduwasser.org/vb

 

 

 

 

    

رد مع اقتباس