مرحوم يا راعي الوفا والمروات
قصيدة في رثاء المغفور له بإذن الله تعالى معالي عبدالرحمن بن أحمد السديري أسكنه الله فسيح جناته
الأمر لله دايم بكل الأوقات =راضين في حكمة جزيل الوهايب
سبحان من بأمره ثبتن السموات =مبشر المسلم بحسن العقايب
سر يا قلم سجل من الشعر الأبيات =لو كنت من بدع التماثيل تايب
هلت دموع العين مني سريعات =من يوم ما كاحوا عليه الترايب
بكيت وأبكيت الربع والقرابات=وأبكيت ابن نصار والوقت غايب
يبكي امير له وقتٍ لهم فات =حسيبك الله يا زمان العجايب
يبكي عليه الغاط واللغف بالذات =والفاخرة ودكة عطيب الظرايب
مرحوم يا راعي الوفاء والمروات =لعل قبرك له مزون السحايب
تسقي ثرى قبرك مزون مديمات =تأخذ ثلاث أيام والجو رايب
مرحوم ياللي له مع الناس وقفات =مرحوم يا فكاك عسر النشايب
مرحوم ياللي ضاري للمهمات= شيال حمل اللي من الوقت هايب
مرحوم ياستر البني العفيفات = سعد الرفيق آليا غدى الوقت عايب
مرحوم يا راعي الخصال الحميدات =ياراعي الرأي العدل في الصعايب
نعم لبو سلطان زبن الونيات =لو كان في قبرِ علية النصايب
تركز له البيضاء بروس الطويلات =زبن الضعيف اللي حدته المصايب
ما مات أبو سلطان ياناس ما مات =عقّب شيوخ ما تهاب الحرايب
ياالله يا جالي الأمور الثقيلات =تجبر عزا سلطان هو والقرايب
ويالله يا منزل حكيمات الآيات =تسكنه في جنتك يوم الحسايب
مرحوم يا راعي الوفاء والمروات =لعل قبرك له مزون السحايب
وصلاة ربي عد ما فايت فات =على شفيع الخلف يوم الكرايب
محمد بن سعد بن نصار البرازي