السلام عليكم ورحمة الله وبركاته:
أسعد الله أوقاتكم بالخير والمسرات
هذه قصيدة القاها الإسبوع الماضي الشاعر نايف بن مسرع الدوسري بمناسبة زيارة أمير منطقة الرياض الأمير خالد بن بندر بن عبدالعزيز ونائبه صاحب السمو الملكي الأمير تركي بن عبدالله بن عبدالعزيز وبحضور صاحب السمو الملكي الأمير نواف بن فيصل بن فهد " أسير الشوق " وبعض الأمراء الضيوف:- |
هبت ذعاذيع الهجوس ولاح براق القصيد =وساقت صبا نجد الكلام إللي مهوب أية كلام
في ليلة وقّف لها التاريخ وألبسها الجديد=توشحت تاج الفخر والمجد لبست له وسام
هزيتنا جذع الهجوس وجيت بالطلع النضيد=إللي يليق بحضرة عيال الملوك أبناء الإمام
يامرحبا يالعز يالتاريخ يالمجد التليد=يامرحبا ترحيبة ميدانها حد الغمام
يامرحبا ماداعبت الأنسام ميّال الجريد=يامرحبا ماغطرفت بالصوت ساجعة الحمام
يامرحبا صوّت بها الوادي وتسمع من بعيد=وردد صداها نجد كله لين سمعوها الانام
يامرحبا ياطود نجد ومنتهى العلم الأكيد=يالخالد إللي تجمع الهيبة وفرض الإحترام
يامن قسمت سنين عمرك ياعسى عمرك مديد=على ميادين الشرف والمجد لعزومك مرام
العام دون أغلى ثرى وقّفت مثل إبن الوليد=تَقْـدُم مغاويرٍ توارَد للخطر ورد الحيام
واليوم واصلت المسير وهامتك فيها المزيد = هامة بطل في غرة التاريخ شيّد له مقام
ويامرحبا ياتركي الوقفات والراي السديد=يانادرٍ من كف أبو متعب على الطالات حام
كبرت ظنونه فيك ياحرٍ مخاليبه تصيد=وأطلق سبوقك وإنتهضت إلين حققت المرام
الله خلقك ونظرتك عليا ومنهاجك فريد=في الارض تفتكّ الرقاب وفي السماء ترم الحِمام
كفٍ ذخرته للعدا لاهام مضرابه جويد =وكفٍ تمده طيب لأهل الطيب ودعاة السلام
وحييت يانواف يامن عمّر القصر المشيد =في ساحة العليا يسوقك للعلا خال وعمام
يحق لك تمشي وراسك فوق مادامك حفيد=للهامتين الخالدة بالذكر يامال الرحام
فهد فهد شرّف على العليا وحقّق مايريد=وسلطان أبو خالد حليف الجود لاشحّ الخمام
يامرحبا يا أخوان نوره عندنا وإنا رصيد=لأطهر ثرى.. وأغلى ثرى.. وإنا لحكامه حزام
على دروب أسلافنا نصرة معزي مانحيد=يحمد مواقفنا وطنا لا غشا جوه عَسام
وادي الدواسر يشهد التاريخ والماضي المجيد=منبع دهاةٍ فعلهم ينشاف في يوم الزحام
لا جاء نهارٍ مايفل أعتى الحديد إلا الحديد=ًإنا لها.. ورجالها.. وإنا مقابيس الظلام
لبس الكفن لاصاح فينا أخوان نوره لبس عيد=الذل عار... ونقضة البيعة من الخالق حرام
الصف واحد والولاء ثابت نبيد ولا يبيد=علّم دعاة البلبلة... والزعزعة.. والإنقسام
إللي غلوا وإللي بغوا وإللي بلا عقلٍ رشيد=روسٍ تساوت وأينعت ولا لها غير الحسام
حوادث الأيام خلتنا نشوف ونستفيد=وبانت حقايق منكرين الفضل وعيال الحرام
الزمرة اللي للعدا وأهل الردى صارت عبيد=تطعن بخاصرة الوطن وتخون في جنح الظلام
وإن ما وطينا النار دون الدار بالباس الشديد =تحلق شواربنا (جزا).. ووجيهنا تلحق ملام
دارٍ نبتنا في ثراها.. عشقها (ماهو جديد)=من القرون إللي مضت ورث الكرام من الكرام
لاغاب نجمٍ في سماها لاح.. جاء نجمٍ جديد=أرض العظيم إللي توارث حبها عقبه إعظام
عَذرا تبختر مع حلاها طيب ساس وطول جيد=تفخر بنا ونشوقها لا من رمت عنها اللثام
في ظل هيبات الشيوخ إللي تسيّد كل سِيـد=ذروة هل العوجا حماة الدين والبيت الحرام
تفاخري يادارنا... غلاك في دم الوريد=ثراك مولد عزنا...وبتربتك مسك الختام
وقبل النهاية ياطوال العمر وختام القصيد=وقبل تلوّح كف شاعركم بتوديع المقام
لكم علينا بيعة من اليوم لايوم الوعيد =ولنا عليكم لفتة يحظى بها وادي الحشام
وادي العطا وادي الوفا يامير حاجاته تزيد=وعيونكم شافت مطالبنا.. وكبّرنا الحَلام
إضرب بيمنىً كفها يامير مضرابه حديد= من لايقوم بواجب الكرسي وتطبيق النظام
تكبر هقاوينا بكم ونتوق للفجر الجديد=وآمالنا بجهودكم فوق الثريا... والسلام
القصيدة صوتية هنا على الرابط