هيه ياللي غرك الليل واغراك النديم
هيه ياللي هزك الشوق والمسرا ضياع
وقفي بين الخطا والصراط المستقيم
والعبي بين التراحيب وكفوف الــــوداع
سولفي مثل المشاريه في صوت الحشيم
واسكتي مثل الشفايف إليا طاح القناع
واضحكي مثل النواوير في روضة خريم
واغربي مثل المزاجات في غرب الرفاع
وابعدي مثل المتاهات في حلم اليتيم
واقربي بين السوالف وكتفي والذراع
وانظري لي نظرة الشوق للشئ القديم
واغرقي بالدمع الأزرق مظاليلن وساع
واصبري مثل المسافات في صبر الحليم
واسمعي صوت الهوا يوم فليت الشراع
يوم صرتي عود ريحان ورضاي النسيم
اصبري يانجمة الصبح ماللصبح داع
قد طلبت الله وأنا بين زمزم والهشيم
شوفتك يغلا ثنيه إليا صرتي ربـــــاع
العيون تجوع لك جوع والله العظيم
والعشاء في عيونك السود وعيوني جياع
إن عطيتي مايرد الكريم إلا اللئيم
وإن بخلتي قلت تكفين والدنيا متــاع
أقبلي مثل التباشير في وجه الكريم
وارحلي مثل التعازي على موت الشجاع