هذه القصيدة مرثية للشاعر سويد بن راشد الحقباني في والده راشد ابن سويد الحقباني رحمه الله تعالى وأموات المسلمين
الله من علم(ن) نهار الربوعي=الله لا يجزى صديق(ن) لفابه
قالوا توفى قلت علم(ن) يروعي=وعزالله ان القلب طول صوابه
وقلبي يفز ويردعنه ظلوعي= وخطر(ن)يذوب القلب من حر مابه
وعيني عليه تهل صافي دموعي=ودموعها تشدي لوبل السحابه
ولو البكى ينفع وفزعة ربوعي=نخيت ربع(ن) في المواجه ذيابه
ربع على الداعي يجونك سروعي=وبافعالهم يختال جالي اعذابه
حقبان لا عد الأصل والفروعي=وهم لابتي وقت الرخى والحرابه
لا شك هذا حق وأعلن خضوعي=للواحد المعبود منزل كتابه
ومرحوم يا عود(ن) حسين الطبوعي=اللي جمع مع التواضع مهابه
الله ينور مسكنه بالشموعي=ويسقيه من حوض(ن) قراح(ن) شرابه
اللي يصلي الفجر قبل الطلوعي=تابع وكنه من رعيل الصحابه
واصل مع الأرحام ماهو قطوعي=ومزين(ن) وصلة بلينة جنابه
حكيم راي وبالشدايد بتوعي=وعلى الصعايب فيه حزم وصلابه
ولاهو على الغره حريص(ن) دنوعي= وعن الدنس يكرم وبيض(ن) ثيابه
والضيف لامن جاه عجل(ن) يفوعي= ويعجل اكرامه ويكرم ركابه
وملفى لمن يشكي مع البرد جوعي= وله مجلس(ن) مفتوح ما صك بابه
والمال ماحسّب حسابه قنوعي= وعنده ولا يازن جناح الذبابه
رحم الله الوالد راشد ابن سويد الحقباني وأسكنه فسيح الجنان وأموات المسلمين
تقبلوا تحياتي
ملحق التالي