بدون مقدمات ....
تغيبت مالي عذر لو اكثر الاعذار=معاذير لو طالت فلاهيب معذوره
قطعت المواصل وادري ان العمار اقصار =ولكن نفسي يا اهل الطيب مجبوره
سلامي سلام كنه يالربع درّ بكار =رعت ديرةً على اول الوسم ممطوره
رعت من جديد النبت عشب و جلل و ازهار =تشم بـ لبنها ريحة العشب و ازهوره
سلامي سلام اسلام يسمع به الحضار =سلامي على لابة وفا مالها جوره
سلامي على كل الدواسر ..كبار صغار =سلامن من اشعاع القمر ماخذً نوره
سلامي على ربعي حزامي عزاز الجار =سيرهم على مرّ التواريخ معطوره
رجال ليا نخيو بساعه يرد الثار =مواقيفهم بالطيب و االخير مذكوره
لهم في النوايف من فعول الكبار اشعار= فعايل وفا بين الرجاجيل مخبوره
لو اني تغيبت انتم حزامي ليا صار =كما البندق اللي للمواجيب مذخوره
حزامي ليا من الزمن يا حزامي دار = مواقيفكم منها الاصاحيب مسروره
ليا عال عايل والاصايل غشاها غبار = مضاريبكم على المعادين ماموره
تعذرت لو مالي عذر و العذار قصار = ولكن عسى الاعذار يالربع معذوره
و صلاتي على اللي واجه الوحي وسط الغار = نبيً على كل الدير ساطع نوره