اخي ابو محمد مساك الله بالخير
القصيدة اللي ذكرت موجود عندي ردها ولكنها في كلام تجريح ولاتنقال ياخي العزيز
ولكن هناك قصيده ثانيه لانها كثرت القصايد بين عجران بن شرفي وراكان بن حثلين
ومنها هذي القصيده
ردا على قصيدة راكان بن حثلين الميميه والكافيه في فرسه وانه لن يبيعها عندما طلبها منه الامام
قال عجران بن شرفي يرد عليه
بديت باسم الله خيار الاسامي=عساه يانفسي على الخير يهديك
علي من علمن لفاني ملامي=ياضيقتن بالصدر مانيب بكاميك
القاف جاله في حشاي ازدحامي=ابدعك يازينات الامثال وابنيك
يوم أن راكانن يرد العلامي=مستصعبن ماطوعنه هذوليك
من ضد ابو تركي طواه الهيامي=أجرب نحط له المساحي محاكيك
ان كان يطري السابق اللي شمامي=ارجو ان كذبه ياجواده يدربيك
يالله يالحمرا يجيب الوسامي=حتى براي الله سريع نقاضيك
ياهل الرمك زيدو لهن بالقيامي=اشرو عليق ودر عرب محاسيك
لابد من يومن يثور القتامي=في ساعتن فيها تثور المشاويك
من فعل حرن صيرمين قطامي=عبدالله اللي برك الشره تبريك
ومضرين قومه بعزل الجهامي=خز الوضاح وخز صهب محاسيك (1)
العام حدر في ليال الصيامي=وأودع هل النقرة دكوك ودواكيك
صبح هل الوفره وخذهم شمامي=بليل وخلينا غنمهم مشاكيك
والصبح ابن حجرف ونجعه قسامي=غشاهم العج الحمر له دواميك
واليوم الأخر فيه جردة حزامي=بين العدام وبين وارة مكاويك
ورابع نهار جاعليكم غمامي=وجموعنا لجموع يام محابيك
معنا هل العوجا كما النور زامي=ربع لهم مخ الفرنجي مساليك
لباسة للجوخ لي جا الزحامي=بارواحهم لى جا الملاقا مماليك
بسيف مضاريبه تقص العظامي=والملح في جر الفتايل محاريك
ذا فعلنا بمخالفين الامامي=يالضبعة العرجا تعالي نعشيك
أربع سنين تجدلين الطعامي=اكلي ونادي ربعك اللي حواليك
نزل على الحلة وبنى الخيامي=من غب كونه يغتنون الصعاليك
متى لبو تركي يهب الولامي=حتى نحط معادي الدين درميك
الله يرمي من غدر بالوهامي=الباير اللي حط في الدين تشكيك
ابوه قبله قد رمته المرامي=رماه رماي الوحش بالشبابيك ..
((1) : أي عود قومه على عزل الغنائم من الابل الطيبه سواء كانت وضحا ولا صبها .. الخزيره : خيار الابل المكسوبه من الاعداء
وسلامتكم
تحياتي لكم
اخوكم /فكــاك^النشايب