من باب توضيح النباء للمخاليق=طرق على اخشوم المجنن ثبتنا
ان سرمدو مانلتفة للملاحيق= وان درهمو ترهي بهم طايلتنا
يفنون شيخان الرخاء واللصاميق= ماحصلو لو وجهة من جهتنا
والشيخه اللي ماعليها مواثيق=لاحدها سوط الزمان ازبنتنا
مانضلم اصحاب الهمم والمطاليق=ومانظلم العالم ونظلم بختنا
تركض ورى حب المضاهر مرازيق=وعن ذمهم ترجح بنا طيبتنا
منهم يجوز الصفح من دون تعليق=وعن كيدهم تسمو بنا منزلتنا
ناس مغير تلفق الهرج تلفيق=يقودها سلك الحرير او بلتنا
والى تلاحو بالغناء والطواريق=وتطاولونا بالحكي ماسكتنا
اثقل عليهم من حجا قمة طويق=ولو لا المخافه من زعلنا كلتنا
وان دنقو للهون والذل تدنيق=في مايخص اعراضهم ماشمتنا
نعيش وضلوع الحنايا صناديق= ونموت ماتنزل بنا معرفتنا
شم الجبال الشامخات الشواهيق=مهما رست فوق البسيطه تحتنا
حنا ذرالخايف الى من شكا الضيق = و الى ارتدم صف المعادي ثبتنا
بمزرجات ضربها ينكس الريق = منها القبايل في الجزيرة درتنا
دوسر ولا يحتاج للاسم تعليق=الفعل كايد والمعالي جهتنا