[معلومات العضو الذيال]

المشاركة الأصلية كتبت بواسطة راشد المسعري

أبيات أتمنى تحوز على بعض رضاكم أرسلتها للشاعر: علي المالكي أحد أصدقاء الدراسة وكان بيني وبينه مراسلات أضع أمامكم أحدها ، وأقول:-

اللـه من قـلب همومـه مـراديف= لا قـلت راح الهـم جـاني رديفـه
أسباب وقت جل ما فيـه تزييـف = وعجزت أميّـز بين صدقه وزيـفه
(وقت تغيـّر فيـه حتى العواصيـف)= قد قالها إبن سرور من زود حيـفه
حتى الرجال اللي بـروس المشاريف = الحظ مقفي وأشـهر الوقـت سيفه
واللاّش حظه صاير له على الكـيف =وصارت له الدنـيا على كيف كيفه
متى يطيب الحـظ لأهل المـواقيف = أهل النـفوس الطيـبة والنظـيفـه
هذا سؤال موجـه لمكـرم الضيف = اللي على العلـيـا عزومـه شريفه
يالجابـري قلـبي همومـه مراديف =لا قلت راح الهـم عـوّد رديفــه

وكان هذا رد الشاعر علي المالكي :-

جانا الكـتاب مغـلـّفٍ بالمـظاريـف= يحوي قصـيد وسط ذيك الصحيفه
من صاحب يشكـي همـوم مراديـف = ويشكي زمـان زاد حـره وصيفه
صيف على أهل الجود واهل المعاريف = زان الربيع لمـن عـلومه سخيفه
لاشك في مخبـاه زود المـصـاريف= وهذا يرفّـع من رجـال كسـيفـه
صار القيـاس المـال والمرجلة طيف = وهذا زمـان بـه علـومن مخيفه
بالواسطة تقــدر تفـك المكاتيـف =ويصـير لـك جمهور تسمع هتيفه
لاشـك دنيـا زايـلـة كلهـا زيف= وتظهر خفـايا فعـلـنا بالصحيـفه
يوم يفـرّق بيـن كـل المـواليـف = وكلن بـذاك اليـوم ينسـى وليـفه
ما ينـفعـك ياكـود فعـل الـتكاليف = والبعد عـن كـل العـلوم السفيفه
واحذر مـن الغيبـة تـراها سواليف = واحذر من ذنـوبٍ بظنـك خـفيفه
إحرص على ماينفـعك دون تخفـيف = لو إسمـنت " بقـعا " تراها ضعيفه
وصلّوا على من خضّع الفرس بالسيف = إعـداد مامسـلم قطـر دم سيـفه

الله
الله
الله

هنا أجد الابداع

هنا أقرأ لعمالقة

هنا الشعر كما ينبغي
مشرفنا القدير راشد المسعري بيض الله وجهك وصح لسانك
وصح لسان زميلك المالكي الذي أتمنى توجه له الدعوة لمشاركتنا في هذا المنتدى الكبير

لن تكفينا منكما هاتين الرائعتين وبانتظار المزيد

تقبل ود وتقدير أخوك الصغير الذيال