قصيدة الشاعر: سعد بن مهدي الحبابي القحطاني في مدح الوداعين أهل السليل عندما رافقهم اربع سنوات من خلال عمله كمعلم بمحافظة السليل
يالله يالمطلـوب ياقاضـي الديـن=ياواحـد كـل المـلا تلتجـي لـه
فرد صمـد مـد البلـد بالمياميـن=وامن وآمان عقب ماهـي محيلـة
يالله عساه ايـدوم آميـن وآميـن=ياناصـر دينـك ومـن ينتميـلـه
من بعدها والقـول يلقـا براهيـن=والعـز منهـاج القبايـل الاصيلـه
قول الحبابـي بالحقايـق ويازيـن=رسم الكـلام اللـي يثبـت دليلـه
في مركب الايام والعمـر يوميـن=حسب الضروف وللمعالي وسيلـه
ومن طيب حضي جيت بين الوداعين=قبيلـة بالـعـز نـعـم القبيـلـه
اهل السليل في المواقف سلاطيـن=عند القسى مثل السيوف الصقيلـه
روس الرجال مرجحين الموازيـن=اهل المراجـل والفعـول الجزيلـه
عاداتهم تعرف مع العسر والليـن=وقفاتهـم عنـد الشدايـد ثقيـلـه
واهل الفعايـل ملحقيـن المخليـن=واهل الجهام اللـي قليـل مثيلـه
يرعون به حـد المعـادي جرييـن=من بطن نجد الى النفـود المهيلـه
تشهد لهم طالاتهم فـي المياديـن=لاجـا نهـار فيـه قـدح الفتيلـه
وتشهد لهم عشر السوالف بتمكين=عند الخوي والجـار لاقـل حيلـه
وسلومهـم وعلومهـم بالعناويـن=في روس مشذوب الرجوم الطويله
اربع سنين بينهـم تعجـب العيـن=والطيب يثنـى كـل يـوم وليلـه
خوة شرف كني مع الربـع لدنيـن=عزي لمن دنيـاه ماتستـوي لـه
ماهيب تستغرب من اول وذالحيـن=مجنى حرار وكلهـم مـن فصيلـه
وكل اخويانا بافخـر فالهـم زيـن=ومن قدم النامـوس يلقـا بديلـه
واليوم جانا النقل من وين لا ويـن=الله يعـلـم والليـالـي كفيـلـه
والله لولا الخـط ماحـن براضيـن=لاكـن كـل ماضـي فـي سبيلـه
بين العمل والبيت ميـه وعشريـن=والوقت قاسي والمسافـة طويلـه
ان جيت منـا لا المناعيـر وافيـن=وان جيت منـا حاجـة مستحيلـه
لاكن على ماقيل لو طـول البيـن=القدر يمـلا الصـدر والله وكيلـه
وعلى المعزة والمواصـل مقيميـن=سلم الرجال ومن دعانا نجـي لـه
الله يثبتنـا علـى الحـق والديـن=ويزيـل عنـا كـل عيلـه وميلـه
وختامها ياشيـن فرقـا المحبيـن=واللي شكاها ياعرب عزتـي لـه
الشاعر سعد بن مهدي القحطاني
وهذه القصيده هي ردي عليه نيابة عن ربعي المطاليق أهل السليل بشكل عام ولايعني ذلك انني افضلهم ولكن انا من شرفوه بثقتهم
يامرحباً بك يابن قحطـان وأهليـن=ترحيبـة فـي مستواهـا نبيـلـه
ماترخـص إلا للرجـال الكريميـن=خليلها النشمي وهـي لـه خليلـه
وننطح بها قاف الرجـال العزيزيـن=وتثنى لقافـك عـد وبـل المخيلـه
واعداد ما صفت صفوف المصليـن=ومابان نور الصبح وانـزاح ليلـه
صح الله إلسانك على المنطق الزين=وعوايـدك بـدع الهـروج الدليلـه
على الجزاله ياسعد منـك ضاريـن=ولا نذكر انها جات منـك الهزيلـه
ولا هنت في مدحك لنا يا أحمر العين=فيما بدعت مـن البيـوت الجزيلـه
ولا عليكـم زود بالطيـب وافـيـن=يا أهل المراجل والسلـوم الجميلـه
يابن مهدي نعـم بذكـرك ونعميـن=وقولت نعم في حـق مثلـك قليلـه
قرم وساسك من زحول القحاطيـن=ساس الشرف واهل الوجيه الطويله
يجدبك للنامـوس والجـود جديـن=تمكنـت فيـك العـروق الاصيلـه
رافقتنا يابن الرجال اربـع اسنيـن=ومرت علينـا مثـل يـوم وليلـه
رفقتك تشـرى ياسعـد بالملاييـن=ومثلك يلامـن راح يصعـب بديلـه
عشنـا ورافقنـا رجـال عديديـن=ولا كل مـن قفـا شحنـا رحيلـه
ولا كل من جانا من الربع لقصيـن=يـروح منضـور بعيـنٍ جليـلـه
والرجـل بفعالـه لربعـه عناويـن=وانت لبني عمك كسبـت الفضيلـه
ولو غبت عنا عنك ماحن بساليـن=ولا نعتبر وصل الهواتـف وسيلـه
مايكفـي الجـوال مـره وثنتـيـن=دام اجتماعٍ بـك لنـا فيـه حيلـه
شوفتك يقرب لجلهـا نـازح البيـن=ورفيقنـا الطيـب لـزوم انعنيـلـه
وتمت وصلى الله على ناصر الديـن=نبينـا المختـار مـن بيـن جيلـه
وأقبل تحيـات ازمـلاك الوداعيـن=من بـاب تقديـر الزميـل لزميلـه
مشمومها الكادي وعطر الرياحيـن=ونفحٍ من الرسـلان لافـاح هيلـه
الشاعر: عبدالله بن مرضي الجماعين الودعاني