قبل حوالى مده طويله كان فيه شاب يامي وله صديق من إحدى القبائل الاخرى الله
يستر علينا وعليهم وكان اليامي صادق مع خويه لدرجة ما يعلم بها إلا الله وكان خوي
اليامي هذا شغّال مع امير المهم كعادة الاصدقاء كل واحد يشكي همه للآخر وكان عند
اليامي موضوع مقلقه وشاغل باله وهو فيه رجال عزيز عليه في احد مقابر الاحياء في
المملكه وبحكم صداقته مع خويه كلمه عن موضوع الرجال وقال خوي اليامي ابشر
اعتبر ان الرجال هذا ما عاد يطول في السجن وكلها اسبوع اسبوعين وراح يطلع
بس ما ابي منك إلا قصيده قال ابشر ما دام القصيده ذي بتطلع الرجال اللي ماخذ قلبي
ولا يهمك وقال بالقصيده :
فيك يابن سعـود سويـت القصيـده=واستوت لي فيك يالحـر القطامـي
يابو مبارك جعلـت ايامـك سعيـده=ياعريب الاصل يا شبـل الكرامـي
من هل الطولات وافيـن العقيـده =لابتـن يـو الملاقـا مـا تضامـي
واضـح تاريخهـم قبـل القصيـده=(...........) مـا يهابـون الزحـامـي
منهم اللـي جعلـت ايامـه سعيـده=امبارك الوافي لما عـدت الاسامـي
الصديق اللي عسـى ربـي يزيـده=صادق يوحي بمضمـون الكلامـي
بشتكيلـه فرقـة الغالـي شـديـده=والفراق اكبر ذنوب اهل الغرامـي
بزهمك وانخاك يا حامـي الطريـده=ياصديقـي والله مـا اذوق المنامـي
ويش رايك وانت لك نظره سديـده=وانت من رووس الرجاجيل الحشامي
قلـت مـا تطلبـه بعـد القصيـده=والوفا لهل الوفاء فـي كـل عامـي
ذي علوم اللـي هواجيسـه عنيـده=والليالي السـود مخلفـت المرامـي
جاء اليامي وضبط القصيده وحطها في برواز واهداها لخويه اللي
يشتغل مع الامير لمكتبه ومر اسبوعين شهر شهرين ثلاثه اربعه سادس شهر والله
والرجال في السجن ويعطيه اليامي مثل ما يعطيه خويه من وعد خروجه مع العلم
ان خويه كل فتره يواعده ويوريه خطابات موقعه من امراء عده على بياض ويقول لا تشيل
هم الرجال طالع الأسبوع الجاي ومرت اسابيع المهم صار اليامي يدق على خويه
اللي يشتغل مع الامير ولا يرد والرجال اللي بالسجن يشره على اليامي ويقوله انت
كذاب ولا عندك سالفه المهم اليامي انقهر من خويه اللي يشتغل مع الامير ولا عاد يرد
على جواله ويتهرب منه ,,
وتحسف اليامي على القصيده بعد ماعرف ان خويه كذاب وجات في خاطره إلا يقول
قصيده في خويه اللي طلع ما عنده إلا الضعوي والمهايط ,,
يقول اليامي :
فيك يابن سعود سويـت النشيـده=واحسب انك (...................)
قلت لي قول وسواليـف عديـده=وما وصلت العلم باسميك الخمامي
اشهد انـك مـن رجـال عنيـده=وانت يا مبارك زكـاة للكرامـي
قلت لي قول تفـك اللـي بقيـده=وما وفيت بماتقوله مـن كلامـي
اثرك تسولف علشـان العصيـده=ياردي الفـال بعطيـك الطعامـي
ماتبي موجـود والدنيـا زهيـده=حن هل الطولات ( يام ) الي حلامي
من عصر { راكـان } حامين الطريـده=انشد وتلقـى التواريـخ القدامـي
ما علي خلاف وانشـر بالجريـده=ما نهاب ولا بنخطـي بالمرامـي
حنا احرار نعتلي في كـل حيـده=وانت يامبارك باسميـك المدامـي
ان بغيت اركبـك راس المليـده=بتشتكي من ضيمها تحت الحزامي
اشهد انك تشبـه العـذرا فريـده=وماعليك إلا تركب لـك زمامـي
ما يفكون الحديـد مـن الحديـده=كون واعين تقول انك الخمامـي
المهم اليامي اخذها صوب خويه ولا لقاه وقطع علاقته معه والرجال اللي بالسجن طلع
وفي النهايه اعزكم الله من ما ورد من الالفاظ الشينه في القصيده ,,
عسى ان تنال القصه والقصيده على إعجابكم ,,,
تقبلوا تحياتي واحترامي ,,,
اخيكم / راكان العجمي ,,,