السلام عليكم ورحمة الله وبركاته
اخواني واخواتي في منتدانا الرسمي اعتذر لكم عن غيابي (وياكثر ماعتذر) لكن الظاهر انه طبع والطبع يغلب التطبع مثل مايقولون
واقدم لكم هالقصيده وعساها تنال اعجابكم
وش حيلتي لاطول الهم فالبال=غير القصيد وسج رجلي لحالي
سجيتها في درب ماتلمح ازوال=ماشوف فيه من المخاليق والي
الريح تلعب بي على كل موال=واقول هبي ياهبوب الشمالي
قمت اتذكر رسم خلي والاطلال= ذكرت زولن مانمسح من خيالي
اول جهاز اعرفه مع خط جوال= البرج برجي والمواصل وصالي
معها تعلمت الرسايل والارسال= وصندوقي الوارد قبل كان خالي
كم ساعتن فيها سرحنا بالامال=نبني بيوت ونهدم البيت تالي
قفا وقفينا وكلن على فال=وتقطعن من دون وصله حبالي
الوصل زال ولكن الحب لازال=الحب مستولي على كل حالي
ذكرت ذاك العرف باكبار واجلال=اطهر من المي القراح الزلالي
واليوم دار الوقت والوقت ختال=ومافيه رجلن عن عنا الوقت سالي
مرت علي انواع واصناف واشكال=جربتهم ماقول غيري حكالي
وعرفت ليه الناس تنطق بالامثال=اثرالتجارب مكسبي راس مالي
رجلن يحسب ان المراجل بالاقوال=والا بغيته راغ مثل الثعالي
ورجلن يجيك احوال ويغيب باحوال=في غيبته عذره والاجاك غالي
ورجلن على الدانين سون وغربال=ولا مع القاصين ريفن ظلالي
ورجلن صدوق اقوال واقواله افعال=ومن دون ربعه يرتكي للثقالي
ولاتحسب انك يارفيقي على جال=وتقول عندي من ربوعي غوالي
خلك على ماقيل حلال فتال=واحسب حسابك عن صدوف الليالي
لاترتجي جاهن ورى غيرك ومال=الجاه جاهك والهلل والريالي
شربك على ماقيل من كفك زلال=ومن كف غيرك مر لوكان حالي
ومن لايحسب مخرجه قبل مدخال=لايزعل ان داسو عليه الرجالي
ومن لايميز بين منصح وعذال=بيشوف من وقته سمومن وصالي
قلته وانا لي لابتن روسها طوال=ولامن بدا لي لازمن ينقضالي
لكن طراة القرم للحمل شيال=ومن بد ربعه شايلن مايشالي