اخواني الكرام هذه ردية قديمة بيني وبين الشاعر فراج فهد الشكره
في احوال العرب .واوضاع العرب اليوم وخيانة بعضهم في بعض
و الغرب وامريكا بانت نواياهم الفاسدة
بتسعيرالحروب وليس اطفائها .رأيت ان من الواجب اخراجهاواعتذر من
اخي الشاعر ابوفهد ان كنت قد زودت عليها شي فهي قديمه
اقول فيها......
ياسعود قلبي من عربنا شكا الجور =شاهت وجيه مضيعين الامانه
ياسعود عشنا سنين وسنين وشهور=وربعي محلك سر واقف مكانه
ياسعود ربعي في متاهات وبحور= وكل زعيم شايخ في زمانه
ياسعود ساد الناس قاصر ومثبور =وكل يصفق له بحب وميانه
ياسعود انا يابوك مانيب مغرور =مير البلا يابوك ذل ومهانه
لا واللي نزل تبارك مع الطور = وكل على ما قال يدفع رهانه
ان ما عقلتو من متاهات وشرور=والرابح اللي يعتبر ياجبانه
ان يندم الرماي مع راعي الشور=والعلم عند اهله لزوم بيانه
الجمع واجد مابه اخلاف وقصور = مير البلا لعانة في لعانه
على بعض شجعان والكلب مسعور= الكافر الملعون عنده حصانه
الشيخ ماله في زمان الردى دور= والشاطر اللي بارع في كمانه
ياضايعين الراي والراي مقدور =من زين النية ترى الله عانه
عبادة المظهر وساقط ومشهور =ياهل الوفا ياهل الشيم والديانه
يكفي كذب كلش مسجل ومسطور = ياهل الغدر والزور ياهل الخيانه
ان قلت مسرور فلا نيب مسرور = وازين لبوك يحط جرحه دفانه
انتم خراب الوقت وانتم لنا عور =شاهت وجيه مضيعين الامانه
وهذا رد ابو فهد
ياسعود دم ابوك من طيبه يفور =والا الردي ياقف دمه في مكانه
يغرف من بحور وينحت من صخور= يفداه شعار الترف والليانه
يشكي ونشكي كلنا الظلم والجور= معاد للمسلم مقام ومكانه
جرح العرب مافاد به طب دكتور = اكبر من الجراح والقيزخانه
انجاد من شرق بثمانين طابور =وبوش من الغرب يتفلت احصانه
وانا غدينا لقمة وسط حنجور =تلوكها اسنان الغدر والخيانه
اغلب سلاطين العرب مالهم دور =يرجون من قوات لعداء حصانه
من باع دين الله وهو خير دستور= لايرتجي شوف المعزة وزانه
مادهور اوضاع ولاضيق اصدور =الا المعاصي وانتقاص الديانه
ياسعود جاك العلم قاف على الفور= انتاج فكر مايبيله صيانه
للناهشي بلغ سلامي ومشكور =يالله عسى شرواه يبطي زمانه