أنا ليا ضاق صدري واشتعل جاشـي = داويت نفسي من همـوم تناهشهـا
ضربت لي طرقة تصعب على اللاشي = وسريت رجلي ومسرى الليل ينعشها
ونحرت جوٍّ خلي يوحـش أوحاشـي =صحاصح البيد طبّ اللـي يعايشهـا
خالي جنابه من العالـم والأدباشـي = قفرٍّ مرب الوحوش ومأمن اوحشهـا
عشبه سواة الحمى مهـوب يناشـي = لا راعي البل ولا الشاوي بنايشهـا
ما يقطعن فرجته حـرار الابواشـي = الضمّر اللي وصوف الريم تلكشهـا
ما يسهجه غير جيب يطرب الماشي =مع واعر الارض ولا مع مفارشهـا
جيب يبعد عـن معشـاي مغباشـي = اللي يقص الـدروب اليـا تناوشهـا
ما يسمع من المكينه غير وشواشـي = ماكنها إلا الحيايـا فـي توشوشهـا
لا فر من دوس رجلي صابه خراشي = فـرة قطـاة دوي الملـح خارشهـا
يطيش من طيش سواقه ليا طاشـي = نوب ٍ يخمّ الخطوط ونوب يقرشهـا
أبيه لابـان نجـم ونجـم متلاشـي = وشفت السويبع مع خوانه مداقشهـا
في ليلـة وبلهـا هتـان ورشاشـي = وقلايد الوسـم مرخيتـن مراهشهـا
اليا ظمرن الفحول وجاهن طياشـي = والارض في بطنها قـرت هوايشهـا
وراع ِ الولع عقب موته له تنعواشي =طيره على الكف والدنيـا مطنشهـا
ما عاد يطري له الا برق الارياشـي =اللي على شانهـا البيـداء يفتشهـا
وانا معي عاري ٍ مهـوب بخياشـي =لاتل سيره علـى المقفـي تفرشهـا
عديم واسمه عديم ما اسمه شلاشي = زرق الشوش لا لحقها علق شوشها
ومن لا عرف لذة المقناص ما عاشي = ولعه بليـا طماعـه ميـر عايشهـا
يسلا بها الخاطر اليا ضاق وانداشي = وترتاح في النوم عيني يوم اغلمشها
ما تسمع اذني صدى لجلاج وهواشي = الا السواري مع الظلمـا تخترشهـا
يا لايمـي خلنـي أصـد وانحاشـي = عن شوف ناس مغير تلوي خششها
والله إن يبطي مع المقناص مطراشي = لين المنيـه اقابـل وجـه طارشهـا
هذا الدواء اللي يداوي حدب هشاشي -= من هاجس لاتحـرك قـام يجرشهـا
رفقة ردي المعرفة بعتهـا ديـن =على زبونٍ ضمّها واحتضنهـا
بغى يجيني بالثمن قلـت بعديـن = امسك فلوسك لين ننشـدك عنهـا
مابعتك الاّ سلعة يااحمر العيـن = ابيعهـا وابيـع حتـى ثمنـهـا
والله مبي فيها الثمن لـو قرشيـن = بس المهم انـي تخلصـت منهـا