السلام عليكم ورحمة الله وبركاته :
بدايةً أعتذر لكم عن هذه المشاركات المتقطعة وعن هذا التقصير في
حق هذا المنتدى الرائع...وإن شاء الله سنتلافى ذلك مستقبلاً.....
قبل عامين وفي مثل هذه الأيام من شهر رمضان حدث تفجير المحيا
وحدثت بعض القصائد
هذه مساجلة بيني وبين الشاعر (عامر النتيفات) الذي سيكون من بيننا
في القريب العاجل إن شاء الله ....
يقول الشاعر عامر النتيفات :
أبأبدع بيوتي وأنتقي طيب القيفان=بعد جاء مجالً للشعر وأنفتح بابه
بيوتً تبي وقفه ونظره من العربان=تخص الوطن والدين والغدر وأربابه
ظهر في وطنا زمرةً غرها الشيطان=لهم مذهبً مع مذهب الكفر متشابه
هدفهم يثيرون الفتن دوم في الأوطان=يبون الأمن يهتز والشر نبلابه
يبون البلاد اللي على منهج القرآن=تطبق فكر مغسول تفكير من جابه
يحسبونهم بإرهابهم يكسبون إحسان=هذا ظنهم خابوا وخسروا ونصابه
يحسبون شعب المملكه يجرفه خوان=بتفجير وألا إرهاب وأقوال كذابه
وهذا بفضل الواحد الخالق الديان=من المستحيل يصير والشعب يرضا به
عهودً وبيعه للملك والوفا عنوان=ولاباقها مسلم رجاء الله ويهابه
بلاد بها مكه وطيبه بلاد امان=وحكامها عمدان للدين وأطنابه
بلادً بها المصحف يوزع وبالمجان=وينشر بلا منه ويهدى لطلابه
بلاد على التوحيد بانينها بنيان=ملوكً سلالة وايليً تعزوابه
بلادً بها الحكام والشعب كالاخوان=بوقت الرخا ننعم وبالحرب حرابه
وحنا وبوفيصل وعبدالله وسلطان=بالارواح دون الدار والدين جلابه
نجدد عهودً راسخه طيلة الأزمان=ولاهمنا الأرهاب والكفر وأصحابه
هل العدل قتل النفس يازمره الطغيان=أجيبوا علي يازمرة الكفر واصحابه؟
هل العدل تفجير المباني على السكان=وهم نايمين ولذة النوم تهنابه؟
هل العدل نشر الرعب والخوف في البلدان=أمورً تحير خلت الناس منصابه؟!!
هل العدل قتل معاهدً جاء لنا من شان=مهمه والى انهاها ذلف والبلد سابه
وراعين ماتوا ظلم ماذنب هالورعان=تحت كومة التفجير وأحجار وترابه؟
من اللي إمحلل قتلهم هاتوا البرهان=هذامنهجً ماقره الله بكتابه
ترا العدل قطع ارقاب من حارب الرحمن= سعى في فساد الارض بالظلم وإرهابه
وجاريت قصيدته بالقصيدة التالية :
أناماقدرت أصبر عـن إمداعبـة الأوزان=وخوض البحور السبـع والبـر والغابـه
لفـا مايهيّضنـي علـى بدعـة القيفان=وجرّيـت طـاروق القصـيـد آتغنّـابـه
جذبني مثايل (عامر) وقافه الرنان=زعيـم القصايـد يرحـم الله مـن جابـه
معاني,قوافي,سبك نادر, وعـذب ألحـان=خصايص تخصّه يـوم الأشعـار تتشابـه
إذا مابدعنـا فـي وطنّـا القصـيـد الآن=فياعـنـك مافيـنـا إمــروّة ولاثـابـه
وطنّـا وطنّـا منبـع العـزّ والإيـمـان=إبلاد الرسـول وآلـه وخيـرة أصحابـه
سحاب الفتن الأسود تراكم على الوديـان=يصبّ الصواعق في ثرى نجد وإهضابـه
نتيجـة تهـوّر طغمـةٍ شوّهـوا الأديـان=حماسٍ على غير الهدى ويـش نبغابـه؟!
يبون الجهاد ونصرة الديـن يـوم إنهـان=ولاكل من صوّب تجـاه الهـدف صابـه
جهاد الكفـر مهـوب تفجيـرك الأوطـان=إتساعد عـدوّك يدخـل الـدار بأسبابـه
عصابة رئيس (البيت الأبيض) من الغربان=إتـدوّر علينـا مدخـلٍ تفتـح أبـوابـه
فياأهل(الخلايا النايمة) ادحـروا الشيطـان=وتوبوا يتوب الله على صاحـب (التابـه)
سموم (السعوديه) مـع الحـرّ والدخـان=ولا إظلال (بـوش الإبـن وابلير)وأحزابـه
تناسون ساحات الوغى في رُبا(الشيشان)=وتنسون (كابل), (والعراقي) على أعصابه
وجبتو المعارك لأرض أهلكم كما العـدوان=تسومونهـم بأسـوأ عـذابٍ سمعنـابـه
ولاأنسى (السفيه) الحاقد المغرض الخوّان=عميـل اليهـود بدارهـم تنبـح إكلابـه
يروّج الإشاعه فـي الإذاعـه بلابرهـان=وإلى شبّت الفتنـه يعبّـر عـن إعجابـه
وطنّا تحاصره المطامع وأهـل الأضغـان=وكـلٍّ علينـا ياعـرب كـشّـر انيـابـه
ولكـن بتقـوى ربّنـا الواحـد الـديّـان= تـزاح الكـروب وياخـذ الحـق طلاّبـه
وكان الرد من عامر :
تهيض هجوسي هيضّه شاعر الميدان=وهذا لقب مني لبوفهْد يحضابه
أقوله بدون اقصور في باقي العربان=وللكل عندي قدر وأحسب احسابه
هذا راينا قلته وعندي له البرهان=براهين قولي مثبته شعر وكتابه
قصيده ثمين وجزل يرجح به الميزان=قصيدً يخلي كاره الشعر يشقى به
بعد وصلنا فزيت والشعر بدعه زان=هجوسي تهيض قبل ماكمل إ كتابه
وسجلت قافي والشعر زينته لاحان=لزومه لوني حايرً وين أبا أبدابه
لكن عذرنا يامسندي لابدا نقصان=هدفنا نرد القاف والقدر لأصحابه
وهذي عوايد لابتي من على الجدان=مع أهل الوفا شرواك ياطيب اللابه
وطراة الشعر لاقيل في الدين والأوطان=وباقي القصيد إمزوح وأمداح كسابه
صحيح القصيد يعالج العاشق الولهان=لكن ويننا ذا الوقت والعشق وأبوابه
وطنا وطنا حافه الشر والعدوان=يبي وقفةٍ من شان عدوانه تهابه
يهود ونصارى مع هل المذهب الخربان=تحاموا وكلً يدفق السم من نابه
هدفهم يزيلون العقيده من الوجدان=وتبقى بلاد الدين في نار شبابه
تخالط علينا حابل ونابل الطغيان=ولا عاد ندري عن هل الشر واسبابه
سفينة وطنا دام حكامنا الربان=رست رغم أنف القايد البوش وأسرابه
تلاطم عليها أمواج والحافظ الرحمن=يعز الشريعه يخزي الكفر وأحزابه
وفقيه جار بلير والغرب له مسكان=وبيانه يخص به الجزيره وتعنابه
قناة تبث السم للجار والاخوان=مذيعينها اغلبهم نصارى وكذابه
يابوفهْد جاء الإسلام طير بلا جنحان=وترا الشرع في غير الوطن مااحدً هابه
عربنا عربنا في المدن ترفع الصلبان=مصيبه ترا الاسلام إسمً تسموابه
ألا عزتي للقدس عزاه للشيشان=يبادون والعدوان تسرف ولا تابه
عراق الحضاره صار مستعمره رومان=وحنا نشوف وساكتينن ولا جابه
ترا القاف شاب وطالبك تقفل البيبان= وقل تم والتقدير في الصدر متشابه
وسلامتكم ,,,ونأسف على الإطالة.....