[معلومات العضو جلاجل الجلاجل]

مزاين جلاجل


قصيدة حفل التميز عام 1431هـ ، والذي اقيم بمدينة جلاجل على شرف صاحب السمو الامير سلطان بن محمد بن سعود الكبير

قبل القصيد وقبل دندنة القوافي والحروف=بسم الله ابدى وانتهي ربي عليه المتكل

الواحد اللي بالرجا والخوف نَرفع له كفوف=واللي نساله سلعة التوفيق في قول وعمل

واطيب صلاة للنبي بعَد من حج ويطوف=يالله ثبتنا على هديه عن اصحاب الملل

واكتب لنا في جملة القبلان عندك يارؤوف=إنا اليك ومنك لا نرجو سواك ولا نَسَـل

ثم السلام اطيب سلام لمن لفانا من ضيوف= هاليوم كَـن السعد بالدنيا علينا مُختزل

حيا الله اللي في جلاجل شرفوا حفل(ن) طفوف=استبشرت باللمـة افـــواد(ن) وقـرت بــه مُقل

متقدم فيهم ولد شقران في وجه الصفوف=استبشري ياجلاجل بجِيه ويالوجه اسفهل

رجل نعرفه باطيب السيرة على راس الكشوف=إليا حسبنا جامعين الشمل في دار وأهل

متسمي(ن) باسمه وله منه السماوه والوصوف=حياه ربي يوم شرف دارنا والمحتفل

اليوم يوم(ن) نكتب الأسماء في صدر القنوف=ذي عادة(ن) فينا قديمة لانمل ولا نكل

الله خلقنا في جلاجل ماخلق فينا نكوف=من حيننا نرسم تفاصيل الكمال ولم نزل

من شافنا فيها عليها قال تِلعبهم صروف=لا تشتغل معهم حلول ولا تحَيدهم حيل

ياسامعي قلي وش اللي في ثناياها تشوف= ياكن ربي مصطفيها كل مافيها كمل

فيها الليالي تنتشي وقعاً على اللحن العزوف=ومنها النهار اليا انسلخ يفتح على الدنيا أمل

ان رحت طب مع فهد وان جيت فقه مع هنوف=الكل فينا من تفاريد المعرفه قد نهل

من عصر ليحان الكتاتيب ومزاحمة الكتوف=إلين وقت الكمبيوتر والدفاتر والفصل

ومن وقـت سمّع ياولد ،، ياعيال خلفه بالهتوف=الين وقت ارسل لي الايميل واضرب به مثل

نجني ثمار المعرفة من كل غصن في ريوف=ونباهي اللي نافسونا في سباق مشتعل

العلم في عرف العرب ماهوب كتب بالرفوف=العلم بنزين العقول اللي لوجهتها تصِل

والعلم ماهو للطموح النوم والقطن الندوف=الرخو ماشال الامم والغث ما عز الدول

واركان قوه كل أمة علمها ثم السيوف=والله شرع فينا نظام اقرأ وعلم من سأل

والخاتمة يازين ماقال العرب في هالظروف=خير الكلام اللي على الأسماع ما قلّل ودَّل

في كل عام (ن) في جلاجل واثبتوها يالصفوف=هــــذا مــزاينّا وحـــنّا فـي مـزاينّا مـثــل

وسلامة الجميع