[معلومات العضو الإداره]

الحمد لله رب العالمين والصلاة والسلام على سيد الانبياء والمرسلين سيدنا ونبينا محمد ابن عبدالله وعلى آله وصحبه ومن وآلاه ومن اهتدى بهديه واستن بسنته الى يوم الدين إخواننا أعضاء وزوّار الموقع الرسمي لقبيلة الدواسر يقول الله تعالى جل شأنه : (( ومن أحياها فكأنما أحيا الناس جميعا)) ويقول الرسول صلى الله عليه وآله وسلم : من فرج عن مؤمن كربة من كرب الدنيا فرج الله عنه كربة من كرب يوم القيامة الدواسر لابةٍ تشبه البحر الطموم=شامخيينٍ بالوفاء والوفـاء يزهالهـا والدواسر لابةٍ كنها السيف الحسوم=لاتخالط شين الأيام هـي وإليالهـا والدواسر لابةٍ لاحصل يومٍ عسوم=تكسب الطولات في دقها واجلالهـا والدواسرلابةٍ تفرق بزين السلوم=في القصيروفي الخوي والعلا ترقالها وإن زبنهم مجرمٍ يشتكي ضيم وهموم=إهتنت عينه عقـب حالـةٍ يرثالهـا بيض الله وجه الشيخ هذّال بن راشد بن هذّال الحقباني ترفع لك البيضا على عالية ما بــان . قبيلة الدواسر قاطبة حاضرةً وباديةً ترفع البيضا على عالية ما بان لـ الشيخ هذّال بن راشد بن هذّال الحقباني ، والذي تنازل عن قاتل إبنه فهد دون شرط أو قيد لوجة الله تعالى فور سماعة الخبر بعدما نوّم وقبل أن ينتقل إلى جوار ربة ، متمسكاً بما يمليه إليه ضميره وما يقول الله سبحانه وتعالى في محكم تنزيله (( ومن أحياها فكأنما أحيا الناس جميعا ))وقول الحقّ : (( فَمَنْ عَفَا وَأَصْلَحَ فَأَجْرُهُ عَلَى اللَّهِ )) ، وما يقول الرسول صلى الله عليه وآله وسلم (( من فرج عن مؤمن كربة من كرب الدنيا فرج الله عنه كربة من كرب يوم القيامة )) . وقد جادت قريحة الشاعر صالح بن محمد الصليبي الحقباني بعدة أبياتٍ عندما سمع ما فعله إبن عمه الشيخ هذّال بن راشد بن هذّال الحقباني ، فقال منها : لك البيِض يا هذّال ترفـع علـى مـا بـان=على النّير و العارض و سلمى و مزبـوره جزاك الرّضى من خالق الكون و الغفـران=كسبت النّعم من كل مـن طالـت شبـوره كفيت و وفيت و شِمْت و آمنت يا كحيـلان=و جبرت النفوس اللي من الضّيم مكسـوره في الآيه رقم ستّين مـن سـورة الرّحمـن=رجيت الثواب و لِنت و النفـس مسـروره عسى الله يجازيـك بحسانيـك بالإحسـان=على ما عفيت و يغفر الذنـب و قصـوره نقلت الحمول اللي على أهل الحمول أحزان=و بهجت النفوس و نزغة ابليس مدحـوره ترى ما حصل غلطة جهل قادها الشيطـان=و لا من وقـف لـه مؤمـنٍ ينتهـي دوره الا من وقف له بالمواقـف طليـق أيمـان=يحب الصلاه و يكـره ابليـس و شـروره و لا هي غريبه وقفة الطيـب يـا بليهـان=مَدامك من اللي تمّن الجـار مـن جـوره عياضـيّـة لا كـلّـح الـنـاب للنّيـبـان=تضد الحفيف و تدهـش حمـاه و تـزوره اهل سربـةٍ مـن حربهـا تشبـع العقبـان=على كل مزغافٍ مـن الصـوت مذعـوره دواسـر كواسـر تـدّي الجـار بالمجّـان=من جدارها لا طـاح مـا هيـب معـذوره دواسر لهم في الطيب مبنىً رفيـع و شـان=هل الغرس و أهل البلّ و الأفعال مخبـوره ثعوا في الشريف و راح عقب السِطر منهان=يبي ابن مطرّف ثـورة و إحتسـى الثـوره على الشرّ سيفٍ ينسف الرّاس من الأمتـان=و على الخير و أهل الخير بالخير مأمـوره على اللـي زبنهـم جنّـة سلمهـا بستـان=وسوم العصا للي شكى الخـوف مذكـوره وأيضاً من القصائد التي قيلت بهذه المناسبة ، قصيدةً لـ الشاعر سويّد ابن راشد الهدايا الحقباني ، يقول في عدةِ أبياتٍ منها : سلام يـا محيـي للأجـواد سنّـه=هذال ابو راشد طويـل الأشابيـر اللي عفى من دون طلْبـه و مِنّـه=و لا تحـرّى دافعيـن الدنانـيـر قالـوا توفّـى قـال ملفـاه جنّـه=و الله ما أروّع الأم من زلّة صغير و ما جابته سـود الليالـي خذنّـه=تفرح و أنا هذال زبـن المخاسيـر و لا هي غريبه مدّة الجـود منّـه=طيّب و من ماكر حـرارٍ مناعيـر و من لابةٍ في الكون ترخي الأعنّه=و تروي السيوف الضاميات البواتير لاد العياضي خصمهـا مـا تحنّـه=حقبان بالهجمـه تبـوج الطّوابيـر وكذلك قال الشاعر محمد آل عزبين المري بعدما سمع بعفو الشيخ هذّال بن راشد بن هذّال الحقباني عن قاتل إبنه ، قال : هذال من بسمه بدا الشعر ذالحيـن=بديت به من فـوق منبـر وميـدان هذال جمّـل بيـت لشّعـار ويزيـن=يلين قـد لبيـات لولـو ومرجـان هـذال مايكفيـه بـيـتً وبيتـيـن=اسمه يقدم فـي بدايـات الالحـان هذال من لجله حضرنـا سريعيـن=هذال جينا مـن بعيـدات الاوطـان نبغـي نقّبـل هامتـك ياحمرالعيـن=نبغي نقّبـل كـف ذربيـن الايمـان لانك ملكت الناس يـاذرب اليميـن=بفعولك اللي جات جزلات وسمـان ماهو غريب منك يابـن السلاطيـن=افعالكـم يشهـد لهـا كـل ديـوان هذال وقفاتك لهـا القاسـي يليـن=هذال من قـوم لهـا عندنـا شـان هذال مـن فعلـه سبقلـه براهيـن=هذال سطر في سما المجد عنـوان سلام يـاروس الرجـال المسميـن=سـلام يالحقبـان شيـبً وشبـان سـلام يالحقبـان لقصـى ولدنيـن=سلام يالـي فعلهـا بالفخـر بـان انتم هل الوقفات ونجا الزمن شيـن=وانتم لكم تاريخ من ماض الازمـان وانتم هل الوقفات والنـاس داريـن=تدوون حق الجار بسبـاب جـدران قصيركم توسم عصاته مـن البيـن=يسرح ويمرح في سهـولً ووديـان دواسـر بالطيـب والعـز ناشيـن=واهل الشجاعه وقت زوغات الاذهان هـاذي فعـول الطيبيـن الكريمـين=هذال واف الطيب يالرجّل الانسـان والقصائد التي قيلت في هذا الجانب كثير جداً وعديدة أيضاً .. هذا وقد توجهت إدارة الموقع الرسمي لقبيلة الدواسر العريقة ممثلةً بـ الأستاذ فهد بن هادي الغريري عضو مجلس إدارة الموقع والمشرف الإعلامي العام بالموقع الحميدي بن محمد الغريري لـ منزل الشيخ هذّال بن راشد بن هذّال الحقباني ، وأجروا معه حوار تحدث من خلالها عن القضية منذ إنطلاقتها وحتى نهايتها حيث إستقبلنا بمنزله العامر بمدينة الجبيل مرحباً بالموقع الرسمي لقبيلة الدواسر العريقة والذي أكدّ بأنه رفض جميع اللقاءات التي طلبت منه عبر أكثر من صحيفة محليّة ولكنه إستجاب للموقع الرسمي للقبيلة لما يحمله هذا الموقع من رسالةٍ واضحة لجميع أبناء القبيلة وهو التواصل بين أفراد القبيلة الواحدة والمحبة والألفة . ولكي يتطرق لهذه الحادثة بالتفصيل بعدما قام الكثيرون بالتأليف وتزوير الحقائق التي حدث بهذه القضية . لقاءنا لهذا اليوم هو اللقاء الأول والحصري لـ والد المرحوم بإذن الله تعالى فهد بن هذّال الحقباني ، لقاءنا مع الشيخ هذّال بن راشد بن هذّال الحقباني . الشيخ هذال بن راشد الحقباني وبجابنة اخيه الشيخ سالم بن راشد الحقباني أجرى اللقاء ، وساهم بطرح الأسئلة : الأستاذ فهد بن عبدالهادي الغريري عضو مجلس إدارة الموقع ، والمشرف الإعلامي بالموقع الحميدي بن محمد الغريري . أجاب على أسئلة الموقع : الشيخ هذّال بن راشد بن هذّال الحقباني . حضر اللقاء وتابعه : الشيخ سالم بن راشد بن هذّال الحقباني ، راشد بن سالم بن راشد الحقباني ، ناصر بن سعد بن فجحان المشاوية ، نايف بن عبدالله الغريري, هذّال بن سالم بن راشد الحقباني ، محمد بن هذّال بن راشد الحقباني ، سعد بن سالم بن راشد الحقباني ، راشد بن هذّال بن راشد الحقباني ، سالم بن هذّال بن راشد الحقباني ، محمد بن راشد بن راشد الحقباني ، وجمعٌ من الحضور . من اليمين الشيخ سالم بن راشد بن هذّال الحقباني الأستاذ فهد بن عبدالهادي الغريري عضو مجلس إدارة الموقع ،الشيخ هذّال بن راشد بن هذّال الحقباني , الأستاذ عبدالله بن سلمان آل مصلح الخييلات عضو خاصّ بالموقع من اليمين الشيخ سالم بن راشد بن هذّال الحقباني, والمشرف الإعلامي بالموقع الحميدي بن محمد الغريري .الشيخ هذّال بن راشد بن هذّال الحقباني الحوار : س : في البداية بودنا لو تعرفنا وتعرف جميع زوّار الموقع الرسمي لقبيلة الدواسر العريقة سواءً أكان دوسري أم من خارج القبيلة بك ؟ ج : إسمي طال عمرك هذّال بن راشد بن هذّال الحقباني الدوسري . س : الجميع سمع عن قضية مقتل إبنكم المغفور له بإذن الله تعالى فهد بن هذّال الحقباني .. فهل ممكن أن تحدثنا عن القضية منذ وقوعها وماذا حدث ؟ ج : ذاك اليوم أنا ماني بموجود يوم جات القضية حيث كنت في (معرج السوبان) ، وعلمني ولدي عبدالله وأنا خابرةٍ عبدالله ذاك اليوم دوام صبح فقلت له : أنت طالع من الدوام . فقال : إيه طالع من الدوام والموضوع فيه كذا وكذا (المقصود بـ كذا وكذا ما جرى لإبنه فهد) وفهد صار في هوشةٍ وحتى هو ما بعد تأكد هي مقصودة الضربة ولا من خصمة ولا .. ، ولا يوم قام ولدي عبدالله وهو يكلمني يمغمغ . فقلت له : لا تمغمغ يا ولدي ترى حنّا أموات عيال أموات والله إللي عطا والله إللي يأخذ ، الولد هو ميت ولا حيّ . فقال : لا والله إلا حيّ بس فيه ضربةٍ بليغة وأنا ذا الحين موقع على العملية في مستشفى الفناتير وبيسون له عملية في رأسة . فقلت له : الله يكتب إللي فيه الخير إن حيا فمن حضنا وإن مات فاللي عطانا إياه خذاه . عاد أنا معي ولدي عبدالله بن سالم وحنّا رايحين قدام الأبل بنحولها في الدبدبة فقلت لـ ولدي عبدالله شف أنا بيني وبينك 400 كيلومتر والله ما أدري تشوفني ولا ما تشوفني وأنا كذلك ما أدري أضمن إنك أنت بعد موجود إذا رجعت أنا والمهم تراني متنازل إن حيا الولد وإن مات ولاني بدري في ذيك الساعة من هو الطرف الثاني . المهم وأجي لـ الجبيل عقب المغرب ويوم جاء عقب العشاء وروح لـ الولد لين قده مسوين العملية ولافينه بس أنا من يوم شفته والعيال مغبين عليّ انه ميت دماغياً وأنا فاطن باللي فيه وذا الأجهزة إللي عليه . المهم وفي اليوم الثاني جاني أبو الولد (سالم بن ناصر الغيياثين المري) ومعه مطلق إبن نبا القحطاني ومعه حوالي خمسة رجاجيل ، المهم يوم جاوا قالوا حنّا جاين نسلم عليكم ونواجركم والولد ولدنا والحين أنتم مقتنعين بالمستشفى ذا ولا ترانا بإستطاعتنا نوديّة لـ أي مستشفى . فقلت : مقتنعين ولله الحمد والمنه والعلاج يا طويل العمر والأطباء وسيلة والغاية عند إللي خلقة والرجال في أيدٍ أمينة وتحت لطيفٍ رحيم . والولد ذا الحين مسوا له عملية وثقتنا بالله كبيرة وأنتم ما قصرتوا وقاموا الرجاجيل وطلعوا ما قالوا شيء . وسلم عليّ المري وقال له كلامٍ الله يجزاه خير . فقلت له : إطمئن يا مريّ وإن شاء الله ما تعينون ما يكدركم . س : أبا راشد هل من الممكن أن تحدثنا عن كيفية وقوع المشاجرة بين الطرفين ؟ ج : هذا رفيقه المريّ معه مجموعة من الناس ، المهم المري طقّ ولدنا من دون ما يقصد يبي يضرب له واحدٍ ثاني وصار الوالد بينه وبينه هنا وصار فهد بينهم ويبي المريّ يظهر واحدٍ ثالث فتلاشاها ذاك وجاءت الطقة في فهد . ضيف اللقاء الشيخ هذال بن راشد الحقباني يتحدث للموقع الرسمي للقبيلة ، ويظهر بالصور بجانبه الأستاذ فهد بن هادي الغريري عضو مجلس إدارة الموقع والأستاذ عبدالله بن سلمان آل مصلح الخييلات عضو خاص بالموقع . س : نحب أن نستفسر منك طال عمرك ، هل توفى إبنكم فوراً أمّ ماذا ؟ ج : المهم إن الله يقبله يا طويل العمر ، وهو ما مات فوراً ولكن قعد في المستشفى تقريباً 15 يوم ، وهذا من الأشياء إللي هدّت علينا المصيبة شويّ شويّ . س : نشر في بعض المواقع الإلكترونيّة كـ صحيفة الوئام الإلكترونيّة بأنك لم تتنازل عن قاتل إبنك إلا بعد تدخل كبار وأمراء قبيلة آل مره .. وغيرها قال بأنك تنازلت بعد أن تمّ دفنه رحمه الله تعالى ؟ ج : هذا الأمر ما هوب صحيح ، ولا أنا متنازلٍ من أول ما سمعت بالسالفة يوم إني مع ولد أخوي عند الابل . س : طيب يا أبو راشد . ماذا حدث بعد كل هذه الأمور بعد وفاة إبنك فهد رحمه الله تعالى ؟ ج : عقّب ذاك الليل يوم جاني ولد القاتل سالم بن ناصر الغياثين المري ، جاني فهد بن ناصر بن غنّام الخييلات ولينه يقول : تكفى يا أبوراشد هؤلاء جيراني وهم رجاجيل . فقلت له : الولد ولدكم وأبشر بسعدك وطلقّ وجهك ولا أنتم معينين في هذه الحادثة إلا طول وجه الرفاقة كلهم ، وهو يوم إنه جاني قصدة يهدي الأمور ويسرها . وعقب 15 يوم وألحق والد القاتل سالم بن ناصر الغياثين المري فقلت له : أنا بروح البر والشرطة لا جيتهم ولا راجعتهم مكتفٍ بالعيال و ولدك إللي بالسجن هو ولدنا الحين . إن كانهم بيهدونه فرح وقلّ لهم : الرجال متنازل . إلا يوم الرجال كتّم شويّ وهو إن شاء الله متأكد من العلم الطيب ولكن مهب بهذه السرعة . وقلت له : المهم أنا ما ني برايح إلا بكرة يوم الأربعاء فشفهم إن كانهم بيهدونه وإن بغوا كفيل فأنا كفيلة عشان يتأكدون إنه ما وراء كفالة والد المعتدي علي شيء . ولو إنهم بيطاوعونا والله ما خليهم يحرمونه من الإختبارات لكن معادها بيدنا . ولين الرجال يوم تلوّا فيه ويدعي باللي الله يقبله وأنا مشيت ورحت وجلست هناك – البر- كم يوم وعودنا والولد على حالته . س : أقامت قبيلة آل مره برعاية الأمير طالب بن شريم أمير شمل قبيلة آل مرة وبحضور أمراء ومشائخ قبيلة آل مره حفلاً كبيراً هنا بمدينة الجبيل بمخيم المتحدة لـ قبيلة الدواسر وبالأخصّ لك شخصياً .. فهل حدثتنا عن هذه الإحتفاليّة الكبرى ؟ ج : والله يا طويل العمر الحفل علموني وأنا ماني براضي لأني أنا ما أبي صدى فخفخة وأشياءٍ مثل كذا ولكن شفتها بخطرهم وقالوا حنّا عزمنا جماعتنا وحنّا مسوين حفلٍ لكم يا دواسر نبي نبيّن لـ الناس عن عفوكم هذا ، المهم علموني وقالوا لي إنهم بمخيّم المتحدة بالجبيل والبرنامج بنجيك حنّا وأمراء آل مره المغرب في بيتك وبناخذ فنجال وبنتوكل على الله وحضر منهم : الأمير طالب بن شريم آل مره أمير قبيلة آل مره ورجالٍ كثيرين ، المهم عاد عقب ما تقهوا وتطيبوا حلفت عليهم إني لـ أسوي لهم كرامة وإتفقنا على الغداء يوم الأربعاء الموافق 14-4-2010 م . المهم وقوموا حفلٍ كبير إجتمعوا عليه الأمة من كل مكان . المهم يوم جاني المريّ قبل الحفل وعلمني بالدعوة ، فقال لي تأمرني بشيء . فقلت : إيه . مهنا حضرةٍ من القودة إلا الشيخ فيحان بن جروان بن قويد محافظ رأس تنورة والشيخ العقيد متعب بن سلطان بن قويد مدير مرور القطيف ولازم تسوون لهم دعوة رسميّة ، المهم قال حنّا حاضرين . وراحوا لـ الشيخ فيحان بن جروان بن قويد حوالي مرتين ولا لقوه وقالوا لهم إنه ماخذ جولة على الدوائر الحكومية إللي عنده . والقودة ذيك الأيام صار عندهم وفاة ولد الشيخ متعب بن متعب بن قويد إللي هو فيحان . فكلمت أنا محمد الحرشان مساعد الشيخ العقيد متعب بن سلطان بن قودي فقال لي : إنه يسلم عليك ويعتذر لأن عندهم حالة وفاة . صاحب السمو الملكي الأمير محمد بن فهد بن عبدالعزيز أمير المنطقة الشرقية خلال مراسم إستقبال الشيخ هذال بن راشد الحقباني الدوسري وعائلته وآل مره . س : طالعتنا الصحافة اليوميّة الصادرة يوم الثلاثاء الموافق 28 من شهر ربيع الأخر لعام 1431هـ ، 13 من شهر إبريل لعام 2010 م ، بأن صاحب السمو الملكي الأمير محمد بن فهد بن عبدالعزيز أمير المنطقة الشرقية إستقبلك وأستقبل عائلتك في مقرّ الإمارة بمدينة الدمام ظهر يوم الأثنين الموافق 27 من شهر ربيع الأخر لعام 1431هـ ، 12 من شهر إبريل لعام 2010 م .. كيف تمّ ذلك وماذا حدث خلال الإجتماع ؟ ج : دعانا صاحب السمو الملكي الأمير محمد بن فهد بن عبدالعزيز أمير المنطقة الشرقية ، وجاتنا الدعوة عن طريق غازي الشمري من الإمارة . ورحنا يوم الأثنين بناءً على الدعوة وتغدينا عنده ، جيناه حنّا ويا العيال . عاد عقب ما جينا وتقهوينا عنده وبعد صلاة الظهر قالوا لنا أنتم تبون جلسة خاصة ولا تبون جلسة عامة عشان الله يقبل دعاء الناس . فقلت : حنّا مدعوين والضيف في حكم المضيف وإللي يبي . قال : خلاص أجل في المجلس وهو شبة خاص ولكن فيه المراجعين . ما قعدنا شوي إلا وهذا الأمير محمد بن فهد جاي ونسلم عليه ويقعد يشرح الله يجزاه خير . ويوم خلصنا وإلا لحقنا غازي الشمري ومعه واحدٍ من الأمير لينه يقول إن الأمير يقول لكم الغداء ولازم تغدون . فقلت له : يا إبن الحلال تعذّر لنا من الأمير حنّا جينا وحنّا ماشين إللي عليه دوام وإللي جاي من الأحساء وردّ له هذا الخبر .شويّ لين هم لاحقينا مرةٍ ثانية ، قالوا إن الأمير حلف إنكم ما تروحون إلا وأنتم متغدين معنا وربعنا إللي من آل مره . المهم رجعنا ونقعد ونتقهوا مع الأمير ويتكلم علينا جزاه الله خير . المهم بعد ما تغدينا أنا في بالي شيء أبي أقوله لـ الأمير على فراغة من دون الناس وعقب ما خلص من الغداء وإلتفت عليّ وقام يسلم . فقلت له : يا أبوتركي أنا أبي منك طلب . قال لي : حاضر باللي تبيه . فقلت : والله لاني أكرم منكم ولاني بأقدر منكم ولكن ودي إنكم تطلقون الولد إللي مسجون . فقال : والله كملت بها يا دوسري ولكن أقسم لك بالله إن ما أذخر لأن هذه جناية . صورة ضوئية لبعض الصحف اليوميه لستقبال صاحب السمو الملكي الأمير محمد بن فهد بن عبدالعزيز أمير المنطقة الشرقية لشيخ هذال بن راشد الحقباني الدوسري http://www.alduwaser.org/meeting3/PrinceMohammed2.gif http://www.alduwaser.org/meeting3/PrinceMohammed3.jpg س : في ختام هذا اللقاء الخاص والحصري للموقع الرسمي لقبيلة الدواسر العريقة .. هل من كلمةٍ توجهها لـ أبناء قبيلة الدواسر في كل مكان ؟ ج : أول شيء يحفظون أنفسهم من الجهل والجهال يُحفظون لأن الجاهل يبلشك ويقول : العيّ عيّ لين ينشب وهو عيّ = ولا من إبتلش العيّ وأبلشك كبّ المعاياه الرجاجيل يحفظون جهالهم ويتكاتفون ، مهب بس أبوهم إللي مسئولٍ عنه لا على ما قال يبلشون الناس ويعودونهم عاد في همّ وغمّ ، أما قاموا على ما قال يتلقلقون (المقصود بـ يتلقلقون هو طلب العفو أو الصفح) الرجاجيل إن طاحوا في رجاجيل طيبين فهذا من حظهم وإن طاحوا في خلاف ذلك فهو أجاويد وطالبينٍ حقهم . ويحافظون الرجاجيل على جهالهم ويجافظون على سيرة أبائهم وأجدادهم وربوعهم الطيبين . صور من اللقاء : الشيخ هذال بن راشد الحقباني وبجانبه عضو مجلس الادارة الاستاذ فهد الغريري الشيخ هذال بن راشد الحقباني وبجانبه الاستاذ عبدالله بن سلمان الخييلات الشيخ سالم بن راشد الحقباني وبجانبه عضو مجلس الادارة الاستاذ فهد الغريري من اليمين محمد بن راشد الحقباني ويليه نايف بن عبدالله الغريري ويليه سعد بن سالم الحقباني يظهر من اليسار ناصر بن سعد بن فجحان المشاوية جانب من الحظور وفي الختام ، فإن لنتقدم بخالص الشكر و التقدير لله سبحانه وتعالى ثم لـ الشيخ هذّال بن راشد بن هذّال الحقباني على ما قام به من فعلٍ كبير لا يقوم به إلا الرجال الكبار وثانياً على خصّ الموقع الرسمي لقبيلة الدواسر بأول لقاء مطوّل يتحدث من خلالها عن هذه القضية التي تحدث الناس عنها بكثرة وإسهاب وغالطوا بها الكثير من الأمور . (( يتبع بالمتصفح التالي : التغطية المصوّرة والمرئيّة والصوتيّة لـ حفل قبيلة آل مره تكريماً لـ الشيخ هذّال بن راشد بن هذّال الحقباني بعدما تنازل عن قاتل إبنه فهد )) (صوت قبيلة الدواسر) موقع قبيلة الدواسر الرسمي www.alduwaser.org/vb