يصعب علي جرحي بعد ليلة العرس=اجي واحط عيني في وسط عينه
عزاه مدري من قريب(ن) ولا امس=كانت حروفه في عيوني ثمينه
مدري اضيق واشره على حظي النحس= ولا اعد في داخلي كم سنينه
ياشيب عيني لاغدا عشقنا طفس=واغلى غرام(ن) بايعه صار وينه
غيم الفراق الي حجب داخلي شمس=وباقي الفتات الي في قلبي دفينه
حبه في قلبي فاهق(ن) لعشق ابن عبس=لانه الوحيد بعيني يسوى مدينه
كان الغلا في داخلي منغرس غرس=وسيل الغرام بقلبي يروي يمينه
غزاني كود غزوة الروم للفرس=وبيرق غرامه رافعه من ايدنيه
والشوق في قلبي غدا داخلي حبس=حبس السجين الي عاشقله سجينه
وكثر الكلام من بعد هرجه غدا خرس=يلي كلامه دافي الروح زينه
ونبضات قلبي داخله عذبها همس=تحكي سوالف ماضيه لي وبينه
عشت الغرام الي خذا عمرنا الخمس=خمس السنين الي تفوح ياسمينه
الا ياجود من الحزن داخلي عس=واضحى يوفي داخلي باقي دينه
اصعب غرام(ن) داخلي صاير يحس=ان العيون اليوم تمسي حزينه
ياصاحبي صعبه اجي داخل العرس=ياكيف ابارك للي قلبي يدينه
يصعب علي ومن فوقها عزة النفس=اكشف دموعي داخل القلب حينه
برحل وقلبي فاهم(ن) باقي الدرس=وعلى جروح العشق ربي يعينه
وسلامتكم
محمد بن حسين الحضيري