[معلومات العضو أصمعي الدواسر]

في أحد الأيام التقاء الأمير شيبان بن قويد مع الشيخ صالح بن قهسان آل هندي من قبيلة يام المعروفه.

فقال صالح مخاطبا الأمير شيبان :

انتوا ياشيبان ماتاخذون الا ابل الضعيف واللي ماعندها احد يحميها.

فرد عليها الأمير شيبان :

اجل لا جينا ابلك احمها ان قدرت .

وبعدها بفترة ذكر للدواسر ان جمع من ابل بعض القبائل الياميه موجوده في منطقة ((الرِجع )) بكسر الراء وهو باطن بين جبل العان والصعيد.

فغاروا عليهم الدواسر في الضحى بعد أن قسم الأمير شيبان الجيش الى قسمين:

القسم الأول يغير على الابل ، والقسم الثاني يسمى (الرقيبه) .

القسم الأول يأخذ الابل ويذهب بها والرقيبه في انتظار أهل فزعة الابل الذي يريدون ارجاع ابلهم .

ودارت الوقعة الأولى عند (العان) وسمي فيما بعد بــ( عان شيبان) ، وأخذوا الدواسر الإبل وهي من أجمل وأطيب إبل الجزيرة العربية . وصاح في يام النذير واجتمعوا ولحقوا بالدواسر لإسترداد الإبل ولكنهم وجدوا المصيبه عندما صاروا بين مطرقة الجيش الذي مع الابل و سندان جيش الرقيبه ، فدرات المعركة وفيها كسرت يدي ابن قهسان،
فقال شيبان : لا تقتلونه فأنه كبير ربعه وعقيدهم .

وكان من ضمن الإبل التي كسبها الدواسر فاطر لصالح بن قهسان ، وكان من أحب الابل اليه وتسمى (الركباء) ولما قسّم الدواسر الابل كانت من نصيب الأمير شيبان ، فكان اذا اعتزى لا يعتزي الا بها ويقول (( رعى الركباء مترك)) .

والغريب ان صالح بن قهسان ذم قومه وعاب عليهم بخلهم بأعمارها فقال:


ياوجودي ماحضرك الا المذله= ربع ٍ ذاخرين بالعمار الغالياتي

وفي نفس الوقت مدحهم الأمير شيبان بن قويد فقال:


هم لحقونا هل البل فزعة ٍ له= ( آل هندي) المداغيش العصاتي

واليكم قصيدة صالح بن قهسان آل هندي اليامي والتي مدح الدواسر وحذر منهم في آخرها:


فاطري في الرجع كم لك من محله= ياوجودي ذي عهودك خالياتي
ياوجودي ماحضرك الا المذله= ربع ٍ ذاخرين ٍ بالعمار الغالياتي
ليتنا عندك ولو كنا مقله= كل ياخذ من نصيبه من الحياتي
لا تجي المشراف واحذر يامسله= لا تجي المشراف حولك نايفاتي
احذروا من ضمر كنهن الأهله= فوقها ربع ٍ ينوسون العداتي
الوضيحي ذرينّه من محله= والغضيض االلي يديه مرصعاتي

وعندما سمع الأمير شيبان بقصيدة صالح رد عليه فقال:


راكب اللي زين العساف دله= يم (بن قهسان) رد له الوصاتي
لا لفيتوا (صالح) بالعلم قلّه= فعلنا ذا من عصور ٍ مبطياتي
لا ركبنا الجيش للحربي ندلّه= مانهيب البل على الماء والفلاتي
يوم شفنا البل ركوز ٍ في الأظله= مانشدنا عن الحياة والمماتي
هم جرينا عليها غارة ٍ له= العقيد اللي فعوله ماضياتي
(ابن قهسان) خذينا فاطر ٍ له= بين ( عان) و(الصعيد) البياناتي
لحقنا يبغي فككها عادة ٍ له= ثم كسرنا يديه الشاطراتي
هم لحقونا هل البل فزعة ٍ له= آل هندي المداغيش العصاتي
هم حولنا لهم في الارض سله= هم نوخنا لهم بمردفاتي
كل فعل له طرات في محله= لا تلاقن الوجيه المنكراتي
بنت اللي فوقها راس ٍ تهلّه= من الحمايل من زيان البناتي
ليتك تشوفين من جاء فيه ذله= تنذرين اللي وراك من الخواتي
من ضربنا طاح ماله من يشله=في ثر البل ميت ٍ للحايماتي
راحت البل عقب هوش فيه فله= هم هزمناهم ضرب مقرراتي
ثم قسمنا البل على قوم مهله= قسمنا التالي على ثر الاولاتي
سبعة ٍ ذلوا وجاء في الربع خله=هم عطيناهم حققة مصمعاتي


رحم الله أمير قبيلة الدواسر شيبان بن قويد واسكنه فسيح جناته

جميع الحقوق محفوظة وحصريا لمنتدى الدواسر الرسمي