أرجوك بعض المشاعر لاتهزهزهـا=ترى المشاعر تألم عنـد راعيهـا
وترى النفوس العزاز الها حواجزها=وحواجز النفس سترٍ من خوافيهـا
لا تقول لك كلمةٍ تحسبك تحرزهـا=وتطيح لاقمت منها منـت قاويهـا
وان قلت لك كلمةٍ حـاول تركزهـا=ولا ترى الصمت خيرٍ من حكاويها
ودعواك لاصار ما تقـدر تنجزهـا=ازبن على واحدٍ ساعـه وينهيهـا
ولا تجـود علـى صبـرٍ يعجزهـا=وتجيك في وسط بيتك مـا تناديهـا
وكم واحدٍ حاجتها بالصدر يكنزهـا=من قل من يستمعله يـوم يبديهـا
يخشى من اللي يهمزهـا يلمزهـا=يضحك بعض ناس لاكن ناس يبكيها
وشكواك لابن الردي حذرٍ تعنزهـا=يفضحك وتروح فيها وانت كاميهـا
وعليك تكبـر ولا تقـدر تميزهـا=وتضيع في طوشةٍ تبلـش بتاليهـا
والسالفـه يقـدر الواحـد يلفزهـا=ويقدر على ناس من شكله يمشيها
ولاتشغلك حرمةٍ منـت متجوزهـا=تطرد وراها وغيرك يهتنـي فيهـا
ولا يفرحك شوف الارنب لو تنقزها=مادام ما شفتهـا بالنـار شاويهـا
ولاتحسب إن الذهب باية يدٍ يزهـا=ترى الذهب ما يغير لـون اياديهـا
والنفس حاول بحد اقصى تعززهـا=نفسٍ بلا عزهـا مانـي مداريهـا
والناس لاتقوم بعيونـك تخززهـا=احمد على العافيه واسلك مماشيهـا
ومن طاوع النفس تشقيه بغرايزها=ومن طاوع العقل يسلم من بلاويها
والمرجله ماتحـب اللـي يهاوزهـا=تبي لهـا واحـدٍ دايـم يحاضيهـا
واللي عيونه مع الظلمـا يغمزهـا=ماحدٍ درى عن عيونه لـو يعنيهـا
ونفيستك وانت فانـي لاتغزغزهـا=المقبره بأنتظارك وانـت ناسيهـا
والناس دورات قادرهـا بعاجزهـا=ماخلق جنه ونـار وزعـوا فيهـا
وناسٍ مع الله وناس ابليس ناغزها=سبحان من ظل ناس وناس هاديها
ونـاسٍ تعلـت وعلتهـا مراكزهـا=وناسٍ تبي الطيب مير الطيب فاحيها
وناسٍ تحفـز ومعـروفٍ تحفزهـا=وناسٍ تبي من يشيمهـا ويعطيهـا
وناسٍ تلعوز وتسلم مـن تلعوزهـا=وناسٍ مع اللعوزه تبطـي لياليهـا
وناسٍ تبي نبز ناس وناس تنبزهـا=نابز ومنبوز لين المـوت يفنيهـا
وناسٍ عجز رزقها يكمل عوايزهـا=لاهي فقـارا وهـي مالله مغنيهـا
حتى العجايز تبـي نـاسٍ تهمزهـا=العافيـه والظنـا ماهـو مكفيـهـا
وان قمت اعاند تفاكيري وابارزهـا=صارت حجاوي وانا ماني محجيهـا