بسم الله الرحمن الرحيم
هذه قصيدة للشاعر / محمد بن سعود آل بريك الدوسري
وهي مهداه للشيخ الفاضل /
عبد الله بن فهّاد الفصام الدوسري
سلام يا شيخٍ مواقيفه جزال = سلامٍ اغلى من جواهر هللها
والذ واحلى من لبن عرب الاجهال = لا روّحت تتلا المدوه لهلها
من خايعٍ علّه من الوسم همّال= نوّار عشبه فاصلٍ في سهلها
خيرٍ عميم وعشبه أنواع وأشكال = والأرض جادت والسماء ما خذلها
بك يالنجيب معرّب الجد والخال = جتك المثايل واستمع في مثلها
تزهاك جزلات المعاني والأمثال = ومن طيب منصاها تسابق جملها
مشيٍ تجيه ونوبٍ المشي زرفال = تاصل لشيخٍ بالمراجل وصلها
وتهدى لليثٍ يرخص الروح والمال = دون القبيلة والنوايب حملها
تبقى الحمول ارداف واصعاب وثقال = وليا تعصّت مالها الا جملها
مادام أبو فهاد حيٍ ولا زال = تحيا المروه ويتوقف جدلها
هاذي سوات اللي تفاخر بالاعمال = ناسٍ تطيب وطيب الله عملها
أعمال برٍ نالها طيّب الفال = جت له وجاها واكتست من حللها
يسعى لها ويرجح القول بافعال = افعال طيبٍ تنفع اللي فعلها
ويلقى جزاها عند علاّم الاحوال = الواحد اللي كل الامة كفلها
الخير منّه والعقايب والاهوال = للعاصي اللي طاعته ماامتثلها
ولرزاق بيديه الكريمه ولآجال = وبيبان فضله لأمته ما قفلها
نفحات جوده تحيي آمال وآمال = وتبري عن النفس العليله عللها
جل وعلا منزل تبارك والأنفال = وغيثه وسيعات المواقع شملها
عساه يمهل للمناعير الأبطال = ويزيدهم مجدٍ ويطول مهلها
أهل الفخر عدّالة الحمل لامال = ولاجات ميلات الزمن تحتملها
الطيب يظهر له مناعير ورجال = ترقا الصعاب وتحترص من زللها
طيبٍ يسنونه على كل منوال = ولا صاب الأنفس في سبيله مللها
المرجله عدٍّ مجاذيبه طوال = تضيع في جمّه دواهي احيلها
ماهي بتطبيل وأهازيج وأقوال = ولا هيب نوقٍ من بغاها عقلها
تحتاج عرف وميز واقفاي واقبال = ورايٍ يصاحبها ويرفا خملها
شرهه تبي شيخٍ كريم وخيال = وفي ناظري رمز الدواسر بطلها
شامت لشيخٍ للعسيرات حلال = يفرح لفرحتها ويزعل زعلها
كلمة امصيب لابن فهاد تنقال = اعلن بها في موقفي وارتجلها
تبنا له البيضاء على روس الأطلال = خفّاقةٍ فوق الغما عن وحلها
في راس عيصاً للقرانيس مدهال = شقر الحرار امربحة من نقلها
مني لمن حاش الثنا دق وجلال = وجمايله من دون عرضه بذلها
سعد الرفيق اليا حداه اشهب اللال = لا ناشته بقعا بدورة عجلها
ينصاه لو دونه مسافات واميال = وعنه الحمول الكايدات ايعدلها
فعايله يضرب بها اوصاف وامثال = مضرب مثل في برها وامحفلها
والبل لها عنده مكانه ومنزال = يتعب عليها ويتنقا فحلها
خطوات سودٍ شوفها يشرح البال = الزين فيها ما يدور بدلها
راعي النظر يحتار فيها ويهتال = واقيامها بعض العرب ما وصلها
سودٍ لها سلّة عرانين واسبال = تليق لك لا شفت ضافي سبلها
وان جت على الماء قدمها الورد تنجال = من زود هيبتها وبعد امهملها
وان صدّرت كنها مراجيم وجبال = أو هضبةٍ منحازةٍ عن جبلها
ليلٍ كسا ارضه تختفي فيه الأزوال = سودٍ مشاعيف تشابه جملها
يرعا بها شيخٍ للأقفار نزّال = ولا زاف نوّار الخباري نزلها
في نجد واطرافه مقيم ورحّال = في شفها ساق القدم ما عذلها
في شفها ما طاع ناصح وعذال = وشفوفها وحقوقها ما جهلها
وصلاة ربي عد ما يظهر اهلال = على النبي خير البرية واملها
وســـــــــــلامـــتـــــــــ كــــم