ف الكلام أسرار واجد ..ولكن الكلام=لاوصلت لآخره ..قلت يبغى تكمله
يامَرَهْ ..والطق ف الحي هو والله الحرام=بس كيف أناقش الأمر حول المسأله
شفتي اللي سنَوا الذم لمرور الكرام=لو حيو في وقتنا صدقيني هم هله
هويلام اللي كمى المشكله أو ما يلام=ان تحاكى بهذله .. وان تجاهل بهذله
مشكله مسترسله ما لها نية ختام=كيف تبغين اختصرها وهي مسترسله
مشكله متفشيّه فـ الخواص وفــ العوام=وفي نقاشات تشكّل لنا أردى مرحله
مشكلتنا بعضها !! ما تعوّدنا النظام=ومشكلتنا كلنا نعرف حل المشكله؟!
مشكلتنا بين جايز ومكروه وحرام=نقتنع بالشى لكن(عبط) ما نقبله
مشكلتنا.. ها.. تمام ..قالو الباقي تمام=وين معهم .. طبع بنموت قبل انبدله
مشكلتنا فقدنا للثقه والاحترام=وبرضو أرجع كلنا نعرف حل المشكله
منهو اللي يطرح الأسئله .. هنا الكلام ..!!=مين .. مدري مين أو مين فاضي نسأله
مشكلتنا مشكله .. لاكلام .. ولاسلام=لجل هذا مخرج العلم ينكر مدخله
مشكلتنا كنَها بين لام و بين لام=خبلةٍ فلَت شعرها لعمياً تنسله
اعوجاجات الأمر .. وانفلاتات الزمام=واستباحات الحُرم .. واستغاثات ارمله
كثر وطآت الإهانه .. وقل الإهتمام=وصغر همّات العزيمه .. وكبر المعضله
طول رجل الضايم .. وقصر كفين المضام=وذلة قلوب الرجال .. وهوان المنزله
وضعنا للخلف در .. والدعاء إلى الأمام=شعب يفخر وايتباها .. وأمه مُخجله
دام هذي مشكلتنا ودام .. ودام ..ودام=كيف أقول الدام والدام هذي مهزله
ياسنام شعيل غاربه ياالغارب سنام=كل جمّالٍ تشكك عيونه فــ جمله
البصيرة نورها ضاع في كومة عتام=مقفيه فــ يدينها السود كنها مقبله
واللغه شيهانةٍ برقعها .. والحمام=ايتندر .. والزمن يوم خربت ينقله
استريحي قبل عن وجهك أميط اللثام=لين أصب النار بشويش .. والماي اشعله
دام مانقدر نوجّه أصابع الاتهام=ودام أسفل الأمر أعلاه .. واعلاه أسفله
ليه ما نسكت ونهوى الكتابه فــ الظلام=وننتهي من الأجوبه ..قبل طرح الأسئله
وضعنا هرمٍ غشا وجهه المزري عسام=في يدينه قيد والقيد الآخر فــ أرجله
ماعلينا لا اعتذر عن صلاته بالصيام=لو علينا نعرف الدرب وين ونجهله
أتركي وجهٍ من الذله .. وحقر المقام=حوله عيون الأناثي تجي مسترجله
واسمعي نايٍ شدا بين أصابيع الغمام=حوله الغضات بكرٍ تهزع مهمله
كان ما لبسن من الغيم تيجان ووسام=كيف أخليهن ركايز لضرب الأمثله
النصع .. تدرين ما هيب تخطيه السهام=قوسها في كف صبيٍ مضرا ينبله
نادميني بين خلوه وسجّات وهيام=دام طفل البوح منهم ضُرب في مقلته
أقنعك .. أو ما أقنعك .. السهر ضيف المنام=ما يخلي الضيف رجلٍ يعرف المرجله
وكان قلت لك أصبري لين أبلغّك المرام=عيبةٍ ف الشاعر يقول مالا يفعله
التجارب عشتها .. تسعه وعشرين عام=انخلقت أودع العلم قبل استقبله
بس هذا الشي في ذمتك ما هو حرام؟!=شي ماني مقتنع به .. ومجبور أقبله!!