يقول الشيخ عايض سمعت 40 بيتا للشاعر حمير بن علي الدوسري حقيقةً أنها هزتني لأننا نلتقي نحن والدواسر في الأزد الذين منهم الأوس والخزرج .
القصيده
يبرق البارق إذا جيت والراعـد رعـد=وأرضنا تبهج لمقدمك والشاخص يميـل
الله من قلب على نغمتـك قـام وقعـد=كن قولك منهل بـاردن مـن سلسبيـل
أو كما ألعاب خوذن على المبسـم بـرد=ضاع فيها المسك والطعم طعم الزنجبيل
جعل عينن تنظلك نونهـا فيهـا الرمـد=جعل قلبن ما يحبـك إيقطـع بالصقيـل
يانشيد السحر لعلع ويسلـم مـن نشـد=عزوته بـالاد زايـد مزبنـة الدخيـل
يطرب القمري ويمسي يغنيـه الصـرد=والحمـام إلا سمعهـا يرتلهـا هديـل
ياحمير اسلم وجاك الوفا متـن وسنـد=مثل سيل الحشر نوه يخيـل ويستخيـل
من رجال الأزد نعمين والشاهـد شهـد=ما نبي من خايب الجد والمفلس دليـل
لو رصاص الحرب يهمي كما وبل البرد=فوقنا يابو علي فالجماجـم مـا تميـل
نشرب من الدم شـرب المولـه للفنـد=وننشق البارود كنـه رياحيـن النثيـل
والدخان ليا حضرنا الوغى كنـه ثمـد=نفتخربه والقنا عندنـا مكحـل وميـل
ربعنا الانصار في الحرب واردهـم ورد=وحمزة منا شهيدن وفي الجنه غسيـل
جيشنا في بدر بدع وجـوْد فـي أحـد=قطع روس الشرك بيماننا يشفي الغليـل
طعننا صوب الكـلا والحشايـا والكبـد=ضربنا بالسيف الأجرد على راس القتيل
مانهاب الموت لو كان في شدق الأسـد=باعث الأرواح في سوق يسلم من يشيل
وش بعد تطلبني احدثك عنه وش بعـد=اقصر الهقوات تكفى ترا المسرا طويـل
شيخنا لوجاك شوره تقـل يـوزن بلـد=طفلنا من جودة العقل جا شيـخ ثقيـل
والنميمه والخنـا سوقهـا فينـا كسـد=ما تسمعنا لهرجـة عليـل قـال قيـل
ماتغنينـا بسلمـى ولا نـوف ورغـد=ولاتغزلنا من الوجد بالطـرف الكحيـل
ارتضينـا منهـج الله وبايعنـا الفهـد=واقتدينا بالنبي صاحب النهـج الجليـل
المساجد عندنا عاش والله مـن سجـد=والمصاحف ذخرنا روحنا الذكر الجميـل
من يريد المجد يتعب ومن يزرع حصد=النجاة بطاعـة الله ويـا نعـم السبيـل
الله اللي صاحب الجود مال الجود احـد=وهبته تغنـي إذا قطّـب الاش البخيـل
يقبل التايب ومن رد مـا كنـه شـرد=أمره النافذ ولو قلـت هـذا مستحيـل
له نزول باخـر الليـل والعالـم هجـد=ومن دعا يبشر ويكرم وهذا كـل ميـل
ما نظمت الشعر لجل العطايـا والرفـد=ماطلبت من الخلايق ولو وزنـة فتيـل
الله من علم وشعر بصدري لـه زبـد=هايج ما يج اينيف على دجلـه ونيـل
كل ما قمت اطلبه ياقصيـدي هـد هـد=قام يغلبني بغزره وانا جسمـي نحيـل
كم تفجر مثل سيل العرمـرم واحتشـد=حطم الجدران من سطوته شال النخيـل
مقصده وادي الدواسر إيكرم من قصـد=جودهم لو سال فالناس ينسي كل سيـل
يامخايل وبل غيم علـى القبلـه ركـد=زعزعته الريح و الضو له زمر وصهيل
له مناشي في مخايل وزمجر في ضمـد=راعده زلـزل بفيفـا ودوا فـي بجيـل
احتكم في ديرة الجود واهمل واحتشـد=كن شبيه للدواسر تـرا الغالـي قليـل
قالها عبـد لمـولاه مـا يعـزب أحـد=غير رب الناس حسبي وهو نعم الوكيل
والصلاه على محمد تسير ابـلا عـدد=وآل بيته والصحابه خلاصة كـل جيـل