يهتز سطح الارض والشعر زالزال=زلزال في شرق اسيا يشبهه حيل
شعرٍ يخلدني على مر الاجيال=يبقى على مر الزمن مابقى سهيل
لاقلت بيت من الصدى زاحت جبال=وما استبعده يلغي شعر كل هالجيل
وان ما شهرني وانضرب فيه امثال=ماقول حرفي شمس وحروفهم ليل
وانت؟ ايه انت! يا طيب الفال=اربط حزام الدهشة بكف تحليل
شعري نوى يمدح غزيرين الافعال=الوافيين الشامخين الحلاحيل
اللابة اللي فعلها يسبق القال=مثل الرعد يسبقه برق المخاييل
الموت كنّه عندهم شرب فنجال=والخوف ماله فالحنايا مداهيل
مثل المحيط اليا ضرب موجه الجال=غريمهم شاف الغرابيل والويل
وصبيهم ينطح ثلاثين رجال=وقت اللقا له ضربة(ن) تسقط الخيل
كل الدواسر ياهل العرف ابطال=فعل القبايل غصن وافعالهم سيل
واخص منهم عمي معرب الخال=طير الهدد ذيب الجلد ذابح الحيل
المجلس اللي للمناعير مدهال=من عقبه اصبح (حاتم) بعيني ابخيل
هذاك ذكره يقلب الياس امال=وهذاك ذكره يظهر الشمس بالليل
الطيب لو له هامة اتطاول اجبال=تصير ساس لطيب راس الرجاجيل
مادام فزعة لابتي روس الاموال=والنخوة بعمي هي ذخر المقابيل
لاقلت ابن زايد من الوقت لامال=تضحك لي الدنيا ويتعدل الميل
ماهو غرورٍ لكن الحق ينقال=انا شموخي عانق الجدي وسهيل