السلام عليكم ورحمة الله وبركاته ،،، كيف حالكم يالمطاليق.
قصيدة عسى أن تنال على رضاكم ،، للشاعر/ مشهور الهاجري
الله خلق خلقـه بحسبـه وترتيـب=بعض العرَب يفرض عليك احترامه
من عاش في الدنيا يشوف التعاجيب=أحدٍ سديـد الـراي واحـدٍ هلامـه
وأحدٍ ليا احتجته بيوم المصاعيـب=زودٍ على العزوه رمـى بالعمامـه
وأحدٍ ليا احتجته بيـوم المواجيـب=دنّق براسـه مثـل راس النعامـه
وأحدٍ لو انه امن الادنيـن وقريـب=يسقى ليا فـارق جهامـك جهامـه
ينزاح همـي يـوم أذبّ العراقيـب=في خايع ٍ ما جـف ماطـر غمامـه
قفرٍ خلا مابه سوى شمّـخ النيـب=ويتلّ قلبي فيـه صـوت الحمامـه
ما أرتاح من ناس ٍ تحـب العذاريـب=أهل الكبِر والزود واهـل النمامـه
والكبر للرجّال عيـبٍ مـن العيـب=علامـةٍ يـا شينهـا مـن علامـه
سوٍّ على الأدنين.. ريف الاجانيـب=يغـث كبـدك لا تـزايـد كـلامـه
كنه يتغصّب لا ظهَر منـه ترحيـب=يظن كـل النـاس ترجـي سلامـه
ما يدري ان بالوقت دورة دولايـب=ما شيّ في الدنيـا يطـوّل دوامـه
ان ما لفاه الموت ياتي له الشيـب=أمرٍ مقـدّره الولـي فـي نظامـه
نهاية الإنسان حفـره مـن الغيـب=أمّا شقـى والاّ سعَـد فـي منامـه
وبكره ينادى عنـد فـك المطاليـب=ويلقى الجزا الوافي بيـوم القيامـه
وسلامتكم ،،، وتقبلوا خالص وأرق التحايا ،،،