ياسعيد اركب وعرضه السمومي = ما تعودنا على برد الأظله
عرضه حدب الريادي والحزومي = واسهج اللاهوب خل النوم خله
ما ينام إلا قليلين الهمومي = كل خبل كثر نومه عادتن له
سرّحه ياسعيد من دار القرومي = وانت سواقه ومنهاجك تدله
سرّحه من دار ذربين السلومي = دار ابو سحمي مداوي كل علة
شايب شيّب على طيب العلومي = من شبابه والرجوله منهج له
والسبوع اللي خذينا كنه يومي = ومن تعمّق في طبوعه ما يمله
وانقضا من عندهم بعض اللزومي = وما بقى ياسعيد جعله فدوتن له

يافليح الفلح يافلح العزومي = المهم إنه فليح الري كله
قرب اللي مستعد ومحشومي = مع طلوع الشمس واركب واعتدله
نحرّه دار ابو خالد يامغنومي = عند راشد مقعده فإنه هل له
لا لفيت بن عويضة بالعلومي = وبسلامي والخبر دقه وجله
حب لي خشمه عسى عمره يدومي=عد مابيني وبينه حشمة له
مرحبا برسالته عد النجومي = وعد وبل من مخاييل تهله
والله إن أذكره حتى في الحلومي = وإن خياله ثابت لي في محله
جعل يفدونه دهاديد الهزومي = والبخيل اللي غناته حسرة له
والله إن طب الحسايس والحثومي = رفقة اللي كل طيب يرتحل له
ما تغوّي به برابيس الرخومي = يابس رايه ورايه معتدل له