ياليل ياريف العيـون المساهيـر=أنا دخيلك لا جفى النـوم عنهـا
قبل أمس شعري ما حونّه تعابير=واليوم يوم احتجت له قام ينهـى
قال اعتزلتك ما ورا صحبتك خير=راحت سنيني أتبعك فـي محنهـا
قلت الصداقه قال دور على غيـر=قلت المراجـل قـال ولاّ زمنهـا
قلت انت خابرني وانا توني صغير=هذي طروقي وانت تهوى لحنهـا
ماهوب ذنبي لا عصتني المقادير=واصبح خفوقي للمصايب وطنهـا
دار تضيف من يجيهـا بتقديـر=اللي سكنها والـذي مـا سكنهـا
أحدن فراقه عن عيوني تباشيـر=وأحدن فراقه ياخذ الشوف منهـا

كذا تمضي حياتي يا حبيبي بالسهـر والقـاف=تعال اجلس مكاني واسأله عن حـال ميلافـه
هربت من المشاعر والجفون الباذلة باسـراف=ولقيت بوحدتي نبع الشعـور ومنبـت القافـة
تخيرت المكان اللي يشيل من الحمول اضعاف=وتخيرني مكاني للحمول اقـوى مـن أكتافـه
اراقب وارتقب باكر عسى ما مرّنـي بخـلاف=ظلام الليل في قلبي غدا وصفٍ مـن اوصافـه
هنا باوادع الجرح الندي والخاطـر الشفـاف=وهنا باعانق دروب الحزن لي مـر باضيافـه
واذا ما جازلي نظم القصيد وضاعت الاوصاف=تحايلت البكا لاجل آخـذه مـن عيـن ذرافـه
واذا كان الهوى بحرٍ يضم من العيون اصناف=تجود بدمعها.. ترجي حبيـبٍ غـاب مجدافـه
يجف من البحر مـوجٍ حزيـن وناظـرٍ ذراف=ومع هذا يسمونه بحر لـو ضاعـت اصدافـه
حبيبي للهنا فارق مكانـي وارحـل بمجـداف=انا موجٍ ـعلى ساحل ـنشف من هول ما شافه
وانابعت الغلا للي يعيشون الهـوى بانصـاف=انا مسكين لي حبيت ضـاق البحـر باطرافـه
تكرم روح لعيونٍ تجيرك ذا الرموش ضعـاف=تخيل كيف يدفا من رموشـه صـارت لحافـه
وانا برجوك لي صار الحكي في السالفه ينعاف=خلاص اهجر مكاني لا تمره يـوم.. وتخافـه