ياليل دام الشعر يقضيلي النوب = ودام التجارب درس والعمر خبره

سنة حياة المرء غالب ومغلوب= والفرق من يملك مروه ودبره

الكون عندي راح في وسع الانبوب= وكسر المشاعر مانفع فيه جبره

الله ياعمر قضيته ومحسوب = راع الهوى بيح كنينه وصبره

احيان احس بضيقة الصدرمن صوب= واحيان تخفي ضيقة الصدر عبره

والصدر صندوقن للاسرار محجوب= ومن جر راس الخيط تاتيه لبره

قولو لمنهو يلبس البشت مقلوب= فيه اختلافن بين صوفه ووبره

يانور عيني حاول الصد بسلوب= ماعاد في قلبي من الحب نبره

انا دخيلك من مواعيد عرقوب= احداث وقتك لا تخليك عبره

غنيت لجلك كل سامر ومسحوب= ودفنت لجلك كل حاسد بقبره

ولاعاد تنشدني انا كيف باتوب= كلن يقيس حسب عرفه وشبره

ودام العمر يازين رايح ومحسوب= الله ولا حبن تواليه عبره