ياكثر آهات الندم في حياتي=وياكثر ماصفقت بالكف ندمان
وياكثر ماكنيت فوح زفراتي=من شوف عيني للقهر شوف الاعيان
وياكثر ماجاهدت وهج عبراتي=لاتبدي الخافي لقوم وعدوان
من شين وقت شفت فيه حسراتي=وقت علينا معلن حربه إعلان
من قل ذات البين جفت لهاتي=مرت علي أيام مامرت انسان
من سوء حظٍ مايقل عثراتي=ماعاد خلالي من الناس صدقان
أطيبهم اصدقهم صديق يحاتي=يبغي فراق فيه راحه للإثنان
حظي ردي وجل ربعي اعداتي=وسود العمايل من القريبين برهان
((وحيد))والوحده تخذل هقواتي=والفقر الأشهب مكمل كل نقصان
وقت تغير يالله منك الثباتي=فيه العرب ماعاد توفي بالأديان
بالهرج جمعاً والنوايا شتاتي=ومن يكتفي عن حاجه الناس ربحان
والفايز اللي قبل إهانته ماتي=ولاعاش حياً بين ذلً وحقران
وقت غدا فيه الصقر كالحداتي=وبالحصيني كنه الذيب سرحان
أبا اتمنى لو تجي بامنياتي=ياليت لي ريش وسبق وجنحان
وأقلع كما تقلع طيور الفلاتي=ماترتبط بأرض ومسكن وورعان
لاضاقت البيداء عليها سواتي=فالجو لطيور السعد دوم مزبان
وفارق إبلاد بها الذل باتي=للي بها مجد ورمز وعنوان
لو كان صحراء مابها غير ذاتي=اخير من دارً بها الذل سكان
دارً بها عز ورزق غناتي=واللي بها ترزق تراها أم الاوطان
أحيا بها واوصي بدفنت رفاتي=بترابها حب وعشق وعرفان
قد قالها جيل سبقنا وفاتي=مافيه عود شب من غير دخان
يالله ياميسر دروب النجاتي=ياواحد فرد صمد مامعه ثان
ياعالم ماقلت أنا في سكاتي=منجي نبي الحق من ظلم هامان
يامن له ادعي وابتهل في صلاتي=خوف وطمع في رحمتك وانت رحمان
الطف بحالي وإستجب لدعواتي=وادخلني الجنه مع باب ريان
وضاعف ثوابي واغفر السيئاتي=لاحطت الاعمال عندك بميزان
وإنك تهون موتتي وسكراتي=واجعل خواتيم العمل بر وإحسان
عسى الشهاده تكون تال كلماتي=شهادة ليه على صدق الإيمان
وصلاة ربي عد ما أثمرنباتي=على نبي الخير من نسل عدنان