البارحه والنوم صوب عيوني الحزنه عيوف = والسهر غادي رفيقي لين سجات الصباح
غادين في وسط جوفي شيء من صوت الدفوف = دق خفاقي من الفرقا ودمع العين ساح
اخيل ذعذاع السما واطرب على ريح القنوف = واظيق من طول البعاد ونكبة اوجيهٍ سماح
ياللي غديتي للهجر خط ونقط فوق الحروف = حطي النقط فوق الحروف وحللي ماقد يباح
الصدر مجلس .. وصدمات الغلا وسطه ضيوف = والخفوق معزب الضيفان .. والزله مزاح
والوقت ساحة معركه .. والحظ طعنات السيوف = والمدامع دم شيخ .. وخيبة الظن الرماح
والفرح نخله .. وايدين الحزن عاشقْةَ القطوف = وابتسامتك مطر ومقابلك صوت الرياح
والغزال اللي عدم كل الوسايل والوصوف = أنتي .. وأنتي مدمنة فن الحلا والأجتياح
شتتي أجزائي (وله) ولا على الدنيا حسوف = وكيف ابشره عالزمن لاصرتي السم الذحاح
البعاد أكبر جريمه .. والحجج دايم ضعوف = وأنا مثل من طاح حظه مادرى وشلون طاح
سويت بي مالا يسوى والعواذل ما تروف = مثل شيبان (المهنا) في مشاكيل المراح
وخليتني عبره لمن لم يعتبر وأنا اشوف = وجليتيني من ديرتي وش قوم يا سيد الملاح
علمتني بأن العزوف أحيان ما يدعى عزوف = اذا بعدنا عن بعض واقلوبنا دايم صحاح
والحين تنسيني وانا اللي ماخذن منك حلوف = أنك تحبيني كثر حب العرب للأنفتاح
كيف يسمح لك ضميرك بالهجر يا أغلا هنوف = وليه أعاني من سقوط أعداي وأنتي لي نجاح
وليه في سكة غرامك صار ممنوع الوقوف = وليه علمتي دموعي معنى أطلاق السراح ؟
وأنا أجي للمستحيله دون رعب ودون خوف = اللين صار الياس منفي من عقب رمز الكفاح
وكنت أصدق باني أقوى من متاهات الظروف = حتى غديت معارض أمريكا على نزع السلاح
وانقد على حزب التحالف واقنع ان راسي حلوف = واشغل رئيس منظمه تسعى على نشر الصلاح
وأرى بكلماتي حكم / وأرى بـقصيدي فيلسوف = واجزم ان العز للأسلام لو طال النباح
واليوم اشوف اني غديت اقود من حزني صفوف = واشوف منصب دولتي وشلون كان وكيف طاح !