::: مـنتدى قبيلـة الـدواسـر الـرسمي ::: - الشيخ الشاعر :- مبارك بن مويم آل راكان الودعاني ......

السلام عليكم ورحمة الله وبركاته

(( الشاعر :- مبارك بن مويم آل راكان الودعاني الدوسري ))

-- موضوعنا أخواني الأعزاء يدور على شاعر معروف من قبيلتنا الكريمة . أشتهر وعرف في أصقاع الجزيرة العربية وحفظت قصائده عند القبائل العربية بدون أستثناء . أتسمت أشعاره بقوة المعنى ( المخفي ) .

-- نبذة عن الشاعر :- هو مبارك بن مويم آل راكان الدوسري . هذا الشاعر يرجع الى ( آل راكان ) من فخذ ( الخماسين ) من قبيلة ( الوداعين ) من ( الدواسر ) . ولد وعاش بداية حياته في - وادي الدواسر - وما أن لبث أن أنتشر الى بقاع الجزيرة العربية . وهو شاعر معروف ولا زال الناس يتداولون قصائده على قدمها .

(( من قصصه وأشعاره ))

-- يحكى أن الشيخ :- جريس بن جلبان آل حبيش العجمي . كان مع فرسان من قبيلته والذين كانوا يبحثون عن أرزاقهم في ذلك الوقت ككثير من أبناء البادية وكانوا موقدين نارهم في أرض ما وكان الشاعر :- مبارك بن مويم على ذلوله وقد شم ريح النار و القهوه وهو يبحث عن رزقه أيضا مثلهم . وما كان منه الا أن وقف وأناخ ناقته وأتى مسلماً وجلس في صمت فأمر الشيخ بن جلبان بالقهوه والعشاء وبنفس الأسلوب جاء بن مجحود العرجاني وجلس دون كلام عدا سلام يارجال دون أن يعرف أحد من الآخر فلما صلحت القهوة كان الشاعر :- مبارك بن مويم على يمين جريس وبن مجحود على يساره فمد الفنجال على اليمين عادة السنة وقال له منشداً :-

سم فنجالٍ من البن له نيز=شغل اليمين اللي تعزز فخرها
فكم مرةٍ وقيت أنا الكف بالبيز=من دلةٍ ريح العويدي ذعرها

-- فرد عليه الشاعر :- مبارك بن مويم - قائلا :-

كم مرةٍ بدلتنا الكور بالعيز=وكم فرجةٍ عرضت نفسي خطرها
على ذلولٍ تقطع الليل تفزيز=في دورة النوماس حفيٍ ظهرها

-- فألتفت جريس الى يساره ثم قال :-

سم فنجالٍ من البن له ريز=من كيف شيخٍ دلته ما دمرها
يعرف يسويها بفن وتعزيز=يمناه في فعل الكرم ما عذرها

-- فرد عليه أبن مجحود العرجاني قائلا :-

وأنا بعد كفيت ربعٍ معاجيز=وأنا رقيبهم بعالي أقورها
ما هيب في الشطات ذب المراقيب=واسلمت ياللي للمراجل عمرها

-- فقال جريس بن جلبان عرفناكم يا ضيوف الرحمان أنت أبن مويم وانت أبن مجحود .

-- وهذه قصيدة - تقاسيم الرجال وتواصيف النساء - للشاعر :- مبارك بن مويم :-

أفكرت الى نور الديار أرجالها=هم نورها وثغورها وجمالها
هم سترها الى لفوا أهل النضا=لي جنَ من فجَ تسوج أحبالها
يثني عليها لأجل خطو الخيَر=ويكسونها بالذمَ لأجل أنذالها
ان كان هم فيها كسوها بالثنا=والاَ كسوها بالملام أرذالها
أدخل على الله من ملامة معسر=لي عاد ماله حيلةٍ يحتالها
ما يستحق الَذم كود أمتلَك=تقصر يده والمرجلة ما نالها
بالناس من حط الصخا له قسمة=خذا السمين وكبَ عنه أهزالها
وبهم من أخذ الراي وقفَى رايح=ياما يسدَد من دروب أخمالها
وبالناس من حطَ الشجاعة مغنم=نعمٍ بمن يصبر على غربالها
وبالناس من حطَ النميمة مقسم=خذا الرذالة كلَها بحثالها
أما الشجاعة:قسمتينٍ شاعن=عليا وسفلى وأخبرك بأحوالها
القسمة العليا:شجاعٍ على العدى=يرخص ذبيل الروح عند أقتالها
والقسمة السفلى:شجاع على الدنا=شلفا قصيرة في نحر نقَالها
هذا فلا تجزع عليه أليا ذهب=نفسه على الرب الكريم زوالها
هذي تواصيف الرجال أبديتها=وأما الديار أخبرك أنا بأحوالها
قس الديارعلى الوقار براحة=مستبطنٍ في جودها وخمالها
قيَس بفهمك لا تقيس بغيرك=ولا يغرَك كلمةٍ من قالها
ان كان حكَام الديار فهودها=وأسودها وأكبارها عقَالها
فلا تبَدلها بمنزل غيرها=العَز تهياله وهو يهيَالها
وان كان حكام الديار قرودها=ونجوسها وأخساسها عقَالها
أقول بدَلها بمنزل غيرها=ولا تسبَع في يدي نزَالها
دع ذا وقافيتها ثلاث خصايل=خصايلٍ يمدح بها فعَالها
الأولة فكَة ذةيد الصاحب= من الحفيف وصايرٍ عقَالها
والثانية توجيهته في كلَ زلَة= طمرتها وأقفى بها من جالها
والثالثة عزَ لجارٍ نازل= ولو عياله مكثرين خمالها
هذي تقاسيم الرجال أفهم لها =وأما الحريم أنا أخبرك بأشكالها
منهن دالهة الفؤاد مطيعة =وجهٍ سميحٍ دلًها ودلالها
ومنهن عذرامن الدنس محميَة= عند المحاضر يقلطون رجالها
ومنهن مصباح البيوت عفيفة= زينٍ على عقلٍ وصار حلالها
ومنهن عفرا زينةٍ مشهورة= ماقت ونادى زينها لخمالها
ومنهن مكملة العباة برجلها= تعدي ومرَ بالحكي يعدا لها
ومنهن فاقعة النظر لغويَة= مخلوقةٍ من (لا) وخلقة لالها
ومنهن عوبا شينةٍ ملَوية= قطه بشوف أقفايها وأقبالها
ومنهن دويبقة فويرة منزل =تخَش عند الناس قوت أعيالها
أختر على ما لاق لك يا السامع= ومن هو برك للحمل شال أثقالها
والختم صلَوا للنبي ياللي حضر= عَد النبات وعَد وبل خيالها

(( أبن قرملة وأبن مويم ))

-- كان لمحمد بن هادي عان من الدواسر وهو نوع رحم أو معرفة، فأعطاه الشيخ ناقة يسني عليها على نخله ولم يردها ، وحصل منه كلام أو شبهه أغضب الشيخ ابن هادي فطلب رد الناقة مع أنه يعطي أجزل منها ولكن أراد أن يثور بعضهم على بعض بسبب ردها ، ويتضح ذلك من معنى القصيدة .قال ابن هادي :-

يا راكب من فوق طلق الذراعيـن=يطوى مسير اليوم من طول باعه
يسرح من الظفرة بـلاد النسييـن=يعجبك بالخـد السمـاح ارتباعـه
حدر على الجريان هم والخزاميـن=شراية للمـدح ليـا جـا مباعـه
وسند على الرجبان هم والقثاميـن=من مثلهم حط الوداعـة طماعـه
يا فاطري حني قصور الوداعيـن=حني حنيـن مـن توحـاه راعـه
حني حنين حول قصر الخماسيـن=ومخصوص عبد الله صبي الوداعه
يا فاطري ياللـي ثمنهـا ثلاثيـن=وإلا معانقة الجمـل بـا ندفاعـه
باما رعت من باطن زاهره زيـن=ميرادهـا عـد تعـاون سباعـه
يبرى لها قـب سـواه الشياهيـن=قب إلى هد قومي غدوا به طماعه
بديارنا كل العرب عنـه عجزيـن=والا ترى قومي غدوا به طماعـه
ان كان هم نسيوا ولا هم بناسيـن=باروا ايجازيهـم ولـي الشفاعـه
الله يثبتنـا علـى كلمـة الـديـن=دين النبي ياحي ذيـك الطماعـه

-- وحيث أن ابن هادي نخا بقصيدته شيوخ وكبار الدواسر وسمى حمائلهم فقد أرسلوا له ( مخسارا ) كما يتضح لنا من الجواب التالي وهو مرد الشاعر مبارك بن مويم الودعاني على ابن هادي .حيث قال شاعرنا :-

يا الله يا المطلوب عدل الموازيـن=ياابا الجزايل منك نرجي الشفاعـه
إنك على تزينها وتظهر على الزين=وترفع مقام اللي رفيـع شراعـه
مبارك بدع قاف يشوق المغنيـن=قاف على المعنى يشوق استماعـه
صاح المصيح سابره شاف بالعين=واستحلق الفـزاع باقـي فزاعـه
هاتوا لنا فرخ من الطرس عجلين=نكتـب لـرداد القوافـي وداعـه
يركب مقيم وابن سيـف قعوديـن=أوارك مـا وقـفـن بالمبـاعـه
ما منهن اللي خرق خشمه ولا هين=ولا سيق في زرع الليالي وداعـه
من جيش أهل ضنك عليهن هوالين=يطون صحاصيح الفيافي بساعـه
يلفن لنا شيخ وراعـي نبـا زيـن=محمد ولد هادي طويـل ذراعـه
حاذور بالمسمار لايقـرب القيـن=فان الخطر من قينهـا بانقطاعـه
حنانتك ذا اللي تعـج بالوداعيـن=تقول لها حنـي حنيـن المراعـه
ماراعنا المدفع وقبـس العثانيـن=ولاحرك المقـداح راع الزعاعـه
ترسي بنا صفر الكرب والعراجين=ونضيف الخاطر نهـار المجاعـه
نذخر نقاوي من ثمرها المواعيـن=ما ازين تناطف دبسهـا باتباعـه
من جدنا في فرعة البقع مرسيـن=كم شيخ قوم حـط فوقـه شباعـه
حطييتها بينـك وبيـن القثاميـن=والشيخ مثلك في جنابـه طماعـه
حطيتها ذم وهـي محتسـب ديـن=وذي عادة الفراع يعطي الفراعـه
جاتك عرافة فاطرك جعلها البيـن=عنـا وعنكـم بالبـلا واندفاعـه
دوه لهـا جعلـه تشلـح بسكيـن=في ديرتك داجوا عليها الجماعـه
مسترفعينك من بواقي الحكا الشين=ومن كال لنا بالمد نوفيه صاعـه

-- ومن قصائده أيضا هذه التي تتمثل في الحكمة والأمنيات ومنها :-

ليت الذي تحت الثرى فوق الثرى=وليت الذي فوق الثرى مقبور
ليت الذي عندي قريب وحاضر=يغيبون، والغايبين حضور

أخوكم :- الهيلاني .