::: مـنتدى قبيلـة الـدواسـر الـرسمي :::

على طاري حضوره

***

سـلام الله على شيـــخ ٍ ركـز رمحه و رد السيف
وعلـق بنـــدقـه واحزامـــها واغلــق وراه البـاب

وطـــالت غيبتـه في عزلته طول الشتـا والصيف
تخــلى عن ميادينــه وساحـــاته بـدون اســـباب

هجر كل الوجيه وغاب من مــده وهــو ماشــيف
بعد ماكان في الميــدان لـه صوله وجــولـه غاب

تباشر به شيوخ القوم واهل السيف واهل الكيف
مواقيفــه لــــها قيمه و لــه بين الرجــال حساب

على طاري حضـــوره يكثر التـاويل و التحـــريف
سوالف صادق يسولف بــها الكـذاب و النصــاب

لكن ياحيف يا بعض الهقـــاوي الطيبـــه ياحيف
وانا كيف اعرب اللي مالـــها خـانه من الاعراب

حقيقــه واظحــه مـا تقبــل التحـريف و التـزييف
لو ان الصدق مثل الكذب والصادق هو الكــذاب

سفينــــه مالــها ربان رسيّـها في اقــرب ســيف
قبـــل لاتغـــرق المركب و يغـــرق فوقـه الركاب

يقولــون العــرب قبلي يعـزّ السيف فعـل السيف
ولابه ســيف مرهف حـد في الدنيا بدون إنصاب

***

محمل بن فلاح