::: مـنتدى قبيلـة الـدواسـر الـرسمي :::

::: مـنتدى قبيلـة الـدواسـر الـرسمي ::: (http://alduwaser.org/vb/index.php)
-   :: قسم إبداعات شعراء المنتدى ومساجلاتهم :: (http://alduwaser.org/vb/forumdisplay.php?f=17)
-   -   يانفس توبي وانظري كيف دنياك (http://alduwaser.org/vb/showthread.php?t=65833)

محبكم الدوسري 10-05-2013 05:38 PM
يانفس توبي وانظري كيف دنياك
 


يا نفس توبــي وانظري كيف دنيـاك



راحـت بنـاسٍ ما امهلتـهـــم لتوبـــه



توبـي قبــل ما حــرة المـوت تاطاك


وانتـي بحـــالٍ غــارقٍ فــي ذنوبـــه


المـوت يانفسـي إذا اليـــوم خــــلاّك


لا بــــد ما يــــومٍ يلفْـــك بثـوبـــــــه


اليـــوم في صحـة وباكــر تغشّـــاك


يــومٍ تهابيــن المشــي فـي دروبــه


يانفس عودي وارتجي الرب يالاك


يانفــس ربـك داعـي الخيـر صوبه


كم من صحيحٍ راح مثلك وشرواك


حطّــوه في قبــرٍ تصَكّـــكْ اجنوبـــه


ثم انقطــع يانفــس ذكرك وطريـاك


وكـلٍ تلَهّــى عنــك وانتِي امغلوبـة


وكـم واحــدٍ يا نفــس مـرَّ وتعــدّاك


وانتـــي بقبـــرك ترتجيــن المثوبة


عســى ولــي الخلق يرحم مناجاك


ربٍ رحـــــوم الخلايــق رضـوا به


إن كــان: ربــي ما عن النار نجَّاك


فتـــراكِ يا نفســي علــي امحسوبـه

محبكم الدوسري

خيالية 10-05-2013 06:22 PM
رد: يانفس توبي وانظري كيف دنياك
 
صححح لساااانك ، أسأل الله أن يجعل هذه القصيدة شاهده لك لا عليك

وينفع بها ، تميزت ببوحك وتشبيهك ،
أسأل الله أن يجعلنا واياك من التوابين المخلصييين لله وحده في توبتنا

تحتاج تلك النفس بالتذكير دائماً حتى وان عملت وان قصرت كذلك

بارك الله في حرفك ونفعك ..

محبكم الدوسري 11-05-2013 11:49 AM
رد: يانفس توبي وانظري كيف دنياك
 
بارك الله فيك
اختنا الفاضله
ورزقك مثل مادعوتي لنا به
واكثر

راشد المسعري 12-05-2013 01:28 PM
رد: يانفس توبي وانظري كيف دنياك
 
صح لسانك يابو محمد
متواجد دائما في كل مكان الله لا يضرك
في القصيد الغزل والقصيد النصح ورواية قصائد كبار السن
ابو محمد موسوعة من الشعر وعلوم الرجال الذربة
وفقك ربي وأسعدك ، ولك ودي وتقديري ،،،،

محبكم الدوسري 13-05-2013 12:20 AM
رد: يانفس توبي وانظري كيف دنياك
 
ماعليك زود
ياولد العود
شكري وتقديري اخوي راشد
ولايهونون اخواني واخواتي
فانا اتعلم منكم الكثير

ابومبخوت الدوسري 14-05-2013 02:19 AM
رد: يانفس توبي وانظري كيف دنياك
 
صح السانك يابومحمد

ويعطيك العافيه على هذه القصيده الاكثر من رائعه
اسال الله ان يتوب علينا ويغفر ذنوبنا ويرحمنا ,,

جزاك الله خير يابومحمد وتسلم يمناك
حقيقه تعجز الكلمات عن التعبير ,,, مبدع وجزل وممييّز
لله درّك يابطل

تقبل تحياتي واحترامي وتقديري ,,

ابومبخوت الدوسري 14-05-2013 02:29 AM
رد: يانفس توبي وانظري كيف دنياك
 
رجعت اقراها ثاني مرره ,,,

صراحه قصيده تستاهل التثبيت

وبيض الله وجهك عليها وجزاك الله خير الجزاء


تقبل مروري الثاني ,,

ابو حسين الدوسري 14-05-2013 06:40 AM
رد: يانفس توبي وانظري كيف دنياك
 
الله
صح السانك اخوي محب والله انهاتستحق التثبيت
لاهنت يبو مبخوت


الساعة الآن 04:20 AM

Powered by vBulletin® Copyright ©2000 - 2024, Jelsoft Enterprises Ltd.
---