على شاطيء الراحة جذبني قصيد ( هلال )=قصيدٍ يغيث الروح من عقب طول محول
يصوّر معاناة الشعوب وشقا الأجيال=فداه القصيد اللي تزلف وقرع طبول
أقول أشهد أنّ (هلال) رجلٍ ونسل رجال=ومع نخبة الشعار فحلٍ ونسل فحول
نشيدة غلا الأسعار ياملحّن الموال=بنبطي نغنيها وليل العنا بيطول
سواءٍ جشع تجار وألا غسيل أموال=شربنا من العلقم وسرنا إلى المجهول
كثيف السحاب اللي تزبّر على الأقذال=تعدّى الديار الممحلة ماسقى الغرمول
أشوفه على ( لبنان ) يسبل عليها إسبال=وأشوفه على جبال ( اليمن ) ينثر الهملول
ياصدري تضايق ماتضايق .. بدون اجدال=تصبّر ولاتغضب إلهك ولا المسؤول
في أعناقنا بيعة وبين العيون أغلال=وصمت المقابر مالقينا سواه احلول
أقوله وأنا من جود ربي علي سربال=ولا أشكي من المشرب ولا أشكي من المأكول
لكنّ العيون تشوف مالا خطر في بال=يخلي الحكيم المتزن ينبهت مذهول
أناسٍ على عرش الترف صرفها شلال=وناسٍ على بساط الفقر ساقها مشلول
ثقيلات الأحمال أرهقت كاهل الرجال=وحتى الطفل من ضيقة البال غنّى .. يقول :
(سئمنا تكاليف الحياة ) وبعدنا أطفال=هجل كيف لو عشنا ثمانين حول وحول ؟!!
مادام ارتفاع النفط سبّب لنا غربال=عسى ( كوندليزا رايس ) تخفّض البترول