يا شاص جيتك ناوي اليوم أعزيـك =قرب يجيك الموت حـان ارتحالـك
من يوم شفنا لابس ألكـاب راعيـك=مدري وش اللي غير اليـوم حالـك
أبـو سبيـب كنهـا شكـة الديـك=يمشـي وكنـه مـوردك للمهالـك
إن كـان ذا حالـك فحنـا نخليـك=يوم الربـع قالـو ترانـا رجالـك
عقب الكوامر والعبث بالشرابيـك=واليوم فوق الشاص عقب الكدالـك
مـا بـاقي الايقلبـونـك تماتـيـك=ويبـدلـون ألمرتـبـه بالمـدالـك
مادام حطوا لـك جنـوط وسيراميـك=اصبر تحمّـل كـل شـي ينالـك
يا للي ركبته وش تبـي بالمهاليـك=غلطان أبوك اللي رضا واشترى لـك
الشاص ماهو لك ولا هـوب باغيـك=الشاص لرجال(ن) تعرف المسالك
لصار جـو البـر يمخـش اياديـك=خله يجـي قرم (ـن) يسوقـه بدالـك
مدام طوقك مرتفـع عـن علابيـك=وأبـوك زود بالنعـومـة دلالــك
عز الله إن أبوك عجز(ن) يربيـك=ولامسك نصب المساحـي شمالـك
لمـع وظلـل صافيـات الشبابيـك=لا يفارق الفيري مع الوقـت بالـك
الشاص مالك به أقصار خطاويـك=حـدك تراه الدائـري ذا مجـالـك