يا اللبيب اكتب وراجع ودقق بالكتاب= من بيوت ٍ بالمواجيب تقضي نوبها
المعاني حضّرت من عقب طول الغياب=والمشاعر تصطلي والهجوس تلوبها
قمت اراجع واتخير نوادرها العذاب= مقصدي تعجب هل العرف لا غنوبها
الفخر للمنتدى في عزيزين الجناب= والقيادة عند اهلها تجدد ثوبها
عند شيخ من شيوخ يهدون الصعاب= عند (ابو زابن) سعد عينها وعجوبها
قادها ابن قويد ((مرّان)) حلال الصعاب= شيخنا لامن شيوخ العرب مارو ابها
شيخته من شبته بالجزاله لين شاب= قايد ٍ للدوسري شرقها وغروبها
شيخته ماهي بالختم ولا الانتخاب=ينقل ثقال المعاني اليا بحلوبها
بالكرم والحلم والعرف مع لين الجناب= وجاه ٍ مقدر وفزعاتٍ بماجوبها
من سلايل مروية باللقا علط الحراب= محتمين الطايلة لا انتخى مندوبها
الشيوخ اللي تحسب العرب لهم الحساب = شيخة ٍ وسط الميادين ماهي دوبها
في قيادة مقدمة الجيش مانعت العقاب=الشيوخ اللي تعنى الهداوي صوبها
انشد التاريخ يعطيك ماكود الجواب= في صدارة صفحته يومهم حلوا بها
من صغار فعالهم يوم بالملح اشتباب= كسرة الحكام لا جا الزعل مندوبها
في دكاك (المعتلى) يوم نور الشمس غاب= من محاذيف الرمك كل ما ردوبها
رعدها النقريز والبرق منقوش النصاب= وسيلها الدم الحمر والعجاج نصوبها
فوق قب ٍ ضريّت بالملاقا ما تهاب= من كثر ما هم على المعركة وردوا بها
في زمان فيه للخيل ورده وانقلاب=وردوا الريشة اللي يذكر جوبها
لين عز معزي الدين والشيطان خاب= وخمدت نار الفتن وانطفى شبوبها
واسمحلوا لي يالنشاما قبل ختم الجواب= برفع بيضا اللواهق لمن فازوا بها
بيض الله وجه من قام في حفظ الآداب = وحفظ تاريخ القبيلة و حفظ حروبها
المدايح (( بالعماني)) مضاربها صواب= تفتخر فيه الادارة ومن قاموا بها
مارث جدار العطايا واهل عوص الركاب= الثمان اللي ثنوا دونها واقفوا بها
والسلام ختام والشعر له منهج وباب= سجلوها يالنشاما علي واحكوا بها