ما كل مـن يضحـك بدنيـاه مسـرور=لـو ضحكتـه دايـم تحـرك حجـاجـه
وما كل من يبكي مـن النـاس مقهـور=بعض الدموع رخاص من شـان حاجـه
وما كل صادق لو حكا لك مـن شعـور=يا كثر مـن زيـف المشاعـر خراجـه
وما كل ما يخفـا مـن السـر مستـور=بعض الوجيه ابين من ارهـف زجاجـه
وما كل بيت ( ن ) بابه انصك مهجـور=كم بيت ( ن ) اطفا الشح واهج سراجـه
وما كل ورد ( ن ) نزرع ينثّر عطـور=لو مـاه صافـي مـا يخالـط هماجـه
وما كل مرهف قلب لـو يـبذر زهـور=قلـب يحـب الـورد وجـواه صـاجـه
وما كل من يخطي من النـاس معـذور=البعض يخطـي مـن علـوم العواجـه
وما كل من يسكت على الظيـم مجبـور=لجل الغـلا ساكـت ويدعـي انفراجـه
وما كل راس ( ن ) ضيع الفكر مسحور=كم راس سحر الحـب جـاب ارتجاجـه
ومـا كـل علـه فادهـا طـب دكتـور=كم من عليل ( ن ) وصل خلـه علاجـه
وما كل من شاور حكيم ( ن ) خذا الشور=بعـض البشـر مـا يقنـع الا مزاجـه
وما كل فزاع ( ن ) لجل مـدح مشكـور=البعـض مرجلتـه وسـامـه وتـاجـه
وما كل من سمي صقر يشبـه صقـور=كم من صقـر وقـت الشدايـد دجاجـه

وما كل من سمي صقر يشبـه صقـور=كم من صقـر وقـت الشدايـد دجاجـه