::: مـنتدى قبيلـة الـدواسـر الـرسمي :::

::: مـنتدى قبيلـة الـدواسـر الـرسمي ::: (http://alduwaser.org/vb/index.php)
-   :: قسم المــحــاورة والألــغـاز:: (http://alduwaser.org/vb/forumdisplay.php?f=18)
-   -   مرادات سعد بين هتيل مع الشعراء عن المقناص والطيور (http://alduwaser.org/vb/showthread.php?t=65796)

محبكم الدوسري 08-05-2013 11:10 AM

مرادات سعد بين هتيل مع الشعراء عن المقناص والطيور
 


http://www.6rb.com/uploads/photos/itx00810.jpg

بسم الله الرحمن الرحيم

السلام عليكم ورحمة الله وبركاته

يشرفني طرح هذا الموضوع الذي ارجو ان يتشرف باعجابكم .
وهو لتوثيق بعض قصائد احد شعراء الدواسر الكرام الذي ذاع صيته, وسطر شعره في المملكة العربية السعودية بماء من ذهب.
الشاعر سعد بن ناصر بن هتيل المساعره الدوسري

( من كتاب ابنه الصديق الغالي الشاعر هتيل بن سعد واللذي شرفني باهدائه لشخصي المتواضع )

الشاعر ولد عام 1333هـ بالغاط,
وتوفي رحمه الله عام 1408هـ

http://www.alraimedia.com/Resources/...cc_smaller.jpg



جمع وتحرير
محبكم الدوسري

*************

قصائده عن المقناص والطيور

قال سعد بن هتيل الدوسري في طيره عندما فقده في المقناص هذه القصيده
ثم جاراه الشاعر بداح بن حبيب آل عاصم القحطاني بقصيدة اخرى
ردا على سعد موضحاً مبررات موقفه من الطير :

يا طيري اللي وين بالقى العوض فيــه

اللـــّي الْيــَا مِنْ هِـــدْ عجــــلٍ لحـوقــه

ذبّـــاحْ مادامـــتْ تشيـــــله مواسيــــه

في صايــــده لمرونــق الريش عوقهْ

الكبــــد فيــــها واهـــجٍ مـا يطفيــــّـهْ

الا لـــيّا طبيــّتْ ميقــافْ سِوقـــــــه

فقال بداح القحطاني

الطيـــر ياابنْ هتيــل يوم انت متليــــه

وراك تطلــــق له عمــايـــــل سبوقــه

الطيـــر صقّـــاره الا صـــار مغليــــه

كف الهـــدد منّه ليــالـــي خـفــوقــــه

مير انت هدّيتــــه ولا انتـب تراعيـه

ياشـــوق من يزها خلاخيــل طوقـه

فقال سعد بن هتيل

الطيـــرهدّيتــــه على شـــان راعيـــه

واليــا غدا يابـــداح هـاذي مروقــــــه

بلاي عــودٍ بالحبـــاري مضريّـــــــــه

يبغــا العشـا خربٍ تبايــض رفوقــــه

ولا نيب من طيره على الكـف بازيـه

وان صـــاد صيـدٍ ما قريبـــه يذوقــه

اللي يشيــل الطيــر والصيد مخفيـه

يا مـال ساروقٍ يجِــــثْ معــلوقــــهْ

**********

وقال سعد بن هتيل ايضا في الطير

ياعـــــل طيـــرٍ مايــصـيـــد الحباري

يامــــرعليــه الله اليــّا هِــدْ بعقــــاب

بيض الدغـــور مشمـرخاتْ الأثــاري

يازينهـــن ْمن خفقــــة الطير هرّابْ

يهيــــا لهن حـرٍ كفوفـــه عجـــاري

ماحـاش منهن مات من غير مخلابْ

*********

وقال الشاعرعيد بن هتيل مخاطبا سعد بن هتيل

متى يبوسحـميْ ننحـدرصوبهم ونشوف

هوى البـال دام الحــالْ ما صـار به خلّه

وليفـي كواني ياعضيدي على السرجوفْ

ولا لــي حيـــــاةٍ والمعاليـــــق منْتَلــــــّهْ

فانا شــف بالي ياسعـد مشرب الطفطوف

أداوي الضمـــاير عقـب الانهــال بالعلّه


فرد سعد بن هتيل ممازحاً

ترى البيض ياعيد النضا مابهن معروف

ملاعيــــــن صيـــرٍ مايعرفـــــنْ عهد الله

تصبّرْشهــر والا ركبنا على شاحــــوفْ

جديد العجـــلْ وان بان راس المثــل زلّه

نمِر ْالحبيِبْ اللّــي عطاك الكـلام ضيوف

يِبيْــــن ْالجفـا والا يبيـــــْن الغلا كلــــّه

عليْ الثمــــن لاقالوا المشتري ب آلوف

وعليك الجــــزع لابان مِنـــْهْ الجفا خَلّه

********

وعن سيارة الدوج في المقناص

دوجكــــــم يا الغانميــــن اسمه كسيبـه

ما خــــذا البيـــّاع ربحـــــه من غرامـه

يابعــد دوجٍ منافيعـــــــــه غصيبـــــــه

قرّبــــه راعيـــه من سـودا الجهامــــه

في هوا الظفــــــران خلــــّه يا نديبـــه

وامهلــــه ياعيد واحــذر من ملامـــه

فرد عيد بن هتيل

ياعضيــــــــدي قلت كلمــات ٍعجيبــه

من مشـــى بالطيــب ما يلقـــى ندامه

من وطـــاه الــدوج لزمٍ انــّه يجيبــه

ليــن يلفــــي به علـــى عزْ وكرامـه

فقال سعد بن هتيل

من بغـــا منك الجميـــل اهبه يجيبـه

وافهم الدنيــــا ترى اخرها حطامــه

أشهد ان رفض الجميل اكبر مصيبه

لآ تبــــيّن لك حلالــــه من حرامــه

بيتان رائعان للشاعر

يامـــــال فرقا العين يا والله اللــــــــــــي

كثرت عذاريبـي على شـــان طيــــــــري

احـــــــدٍ يقول انك بهرجــــــــك تِزلـّـــيْ

واحـــد ٍيقـــــــول الاّ ضربــت البحيـري

محبكم الدوسري

http://up.2sw2r.com/upfiles/R8j00810.jpg




انا ابو نايف 08-05-2013 12:14 PM

رد: مرادات سعد بين هتيل مع الشعراء عن المقناص والطيور
 
الله يارحم ابن هتيل شاعر علم ذاع صيته في كل مكان
ومشكور اخوي على اتحافنا بهاذي القصايد الجزله

محبكم الدوسري 08-05-2013 12:21 PM

رد: مرادات سعد بين هتيل مع الشعراء عن المقناص والطيور
 
ارحب تراحيب
مالها عدد ولا مدد
اخوي الغالي
ابو نايف

فهد الغريري 08-05-2013 12:21 PM

رد: مرادات سعد بين هتيل مع الشعراء عن المقناص والطيور
 
ارررررحب ثم ارررررررحب يالدوسري


اهنيك على حسن اختيارك للمواضيع المميزه


والله يرحم ابن هتيل


وتقبل تقديري واحترامي

محبكم الدوسري 08-05-2013 01:04 PM

رد: مرادات سعد بين هتيل مع الشعراء عن المقناص والطيور
 
المهلي مايولي
ارحب ياقرم القروم
اخي الغالي
فهد الغريري
اشكرك على اطرائك الذي لااستحق الكثير منه
ولكن
مايجود علينا به الكرام
فخر لنا وشرف وتاج فوق رؤسنا
الى يوم الدين


الساعة الآن 12:04 PM

Powered by vBulletin® Copyright ©2000 - 2024, Jelsoft Enterprises Ltd.
---